BILANGAN 1
1
Dibaen halak Israel bilangan na parjolo
1Di tanggal sada bulan dua di taon paduahon dung ditinggalkon halak Israel tano Mesir, manghatai ma Tuhan tu si Musa di bagasan Bandar Parmianan Ni Tuhan di Parhorsihan Sinai. 2Ninna ma, “Ho dohot si Harun, rap baen hamu pamilangion tu bangso Israel, mangihutkon marga, ganop ripe. Baen ma daftar, goar ni sude halaklahi 3na marumur 20 taon tu ginjang, na dung tarbaen masuk tentara. 4Sian ganop marga pangido ma sahalak gabe kapala ni marga i laho mangurupi hamu.” 5-16On ma goar ni angka halaklahi na gabe kapala ni ganop marga, na nipili sian bangso i, mangkarejohon karejo na nitaringotan i:
| MARGA | KAPALA NI MARGA |
|---|---|
| Ruben | Elisur anak ni si Sedeur |
| Simeon | Selumiel anak ni si Zurisiadai |
| Juda | Nahason anak ni si Aminadab |
| Isakar | Natanael anak ni si Zuar |
| Zebulon | Eliab anak ni si Helon |
| Efraim | Elisama anak ni si Amihud |
| Manase | Gamaliel anak ni si Pedasur |
| Benyamin | Abidan anak ni si Gideoni |
| Dan | Ahieser anak ni si Amisadai |
| Aser | Pagiel anak ni si Okran |
| Gad | Eliasap anak ni si Rehuel |
| Naftali | Ahira anak ni si Enan |
17Marhite partolongan ni na dua bolas halak i disuru si Musa dohot si Harun ma 18anso marlagut sude jolma i di tanggal sada bulan dua, anso didaftar sude bangso i mangihutkon marga dohot ganop ripe. Goar ni sude halaklahi na marumur dua pulu taon tu ginjang disurat jana dietong, 19songon na dung diparentahon Tuhan i. Sasudena i dipatulus si Musa di Parhorsihan Sinai. 20-46Angka halaklahi na marumur dua pulu taon tu ginjang na bisa masuk tu tentara, didaftarkon ma goarna mangihutkon marga dohot ripe mamungka sian si Ruben, panggoaran ni si Jakob. Songon on ma bahatna:
| MARGA | BAHATNA |
|---|---|
| Ruben | 46.500 |
| Simeon | 59.300 |
| Gad | 45.650 |
| Juda | 74.600 |
| Isakar | 54.400 |
| Zebulon | 57.400 |
| Efraim | 40.500 |
| Manase | 32.200 |
| Benyamin | 35.400 |
| Dan | 62.700 |
| Aser | 41.500 |
| Naftali | 53.400 |
| Sudena: | 603.550 |
47Angka halak Levi nada didaftar i rap dohot marga na asing. 48Angke madung didok Tuhan tu si Musa, 49“Muda dung disurati ho goar-goar ni na tarbaen masuk tentara, anggo Marga Levi nangkon pola suratkon. 50Dokkon ma anso halahi markarejo di Bandar ParmiananKu dohot pasingkop parkokasna. Karejo ni halahi, i ma: Mamorsan Bandar ParmiananKi dohot parkokasna lalu markarejo gabe malim jana marbandar humaliangna. 51Muda bungkas hamu, halak Levi i ma mambuka Bandar ParmiananKi, dung i mamasang mangulahi di inganan parbandaran na baru. Asing sian halahi, sanga ise na donok tu Bandar Parmianan angkon mate uhuman. 52Angka halak Israel na asing i, pajongjongon ni halahi ma bandar ni halahi marturpuk-turpuk, ganop halak di bagasan turpuk i rap di toru ni manderana be. 53Tapi anggo halak Levi angkon donok tu Bandar ParmiananKu do bandar ni halahi. Angkon jagoon ni halahi anso ulang adong halak na donok, anso ulang gabe muruk Au gabe Huuhumi halak Israel.” 54Jadi halak Israel pe dikarejohon halahi do sude na niparentahon ni Tuhan tu si Musa.
Currently Selected:
BILANGAN 1: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
