HAMALIMON 27
27
Aturan taringot tu angka silehenon tu Tuhan
1Dilehen Tuhan ma tu si Musa 2deba nari paraturan tu halak Israel, “Muda dilehen sada halak tu Tuhan i panggarar ni niet na mardohonan, tola do gararon ni halahi dohot hepeng, songon on pangalahona. 3-7Mangihutkon arga na dung ditotopkon:
– halaklahi sian umur dua pulu tu onom pulu taon, 50 hepeng perak
– dadaboru na magodang 30 pulu hepeng perak
– anak halaklahi, umur lima tu dua pulu taon, 20 hepeng perak
– anak dadaboru 10 hepeng perak
– anak halaklahi na menek di toru ni lima taon 5 hepeng perak
– anak dadaboru na menek 3 hepeng perak
– halaklahi di ginjang ni 60 taon, 15 hepeng perak
– dadaboru di ginjang ni 60 taon, 10 hepeng perak.
8Muda pogos situtu do halak na marniet i angkon dioban do ia tu jolo ni malim. Malim i sandiri do manontuhon arga na tumoruk, na targarar halak na marniet i.
9-10Muda niet taringot tu binatang na halal sipasahaton tu Tuhan do nietnia i, nada tola gontion ni na marniet i dohot binatang na asing angke sude silehen-lehen silehenon tu Tuhan, na badia do i. Muda laing dibaen ia, gabe Tuhan noma nampuna pahan-pahanan na dua i. 11Tapi muda binatang na haram do nietnia i, na so tarjagit gabe silehenon tu Tuhan, angkon obanon ni halak na marniet i do pahan-pahanan i tu jolo ni malim. 12Tontuhonon ni malim i ma arga ni i, mangihutkon pangalahona. Jadi argana dung ditotopkon i nada tola be tawaron. 13Muda giot tobusonnia mangulahi binatang i, gararonnia ma saargana i ditamba dua pulu porsen.
14Muda dilehen sada halak bagasnia tu Tuhan, tontuhonon ni malim ma argana mangihutkon pangalaho ni bagas i. Arga na dung ditontuhon i nada tola be tawaron. 15Muda giot tobuson ni na pasahat bagas i mangulahi bagas i angkon gararonnia ma argana ditamba dua pulu porsen.
16Muda adong sahalak mangalehen sabagian sian tanonia tu Tuhan, arga ni tano i ditontuhon mangihutkon bahat ni same na masuk tu tano i. Ganop dua pulu kilogram gandum ditontuhon ma sampulu hepeng perak. 17Muda dilehen torus tano i dung Taon Haluaan, gok ma argana. 18Muda dung sanga piga-piga taon dung i, disi pe dilehen tano i, timbangon ni malim ma arga kontan mangihutkon bahat ni taon na lobi lalu tu Taon Haluaan na giot ro, dung i ditotopkon ma arga na ummura. 19Muda giot tobuson ni halak na mangalehen ladang i mangulahi ladang i, angkon gararonnia ma argana ditamba dope dua pulu porsen. 20Muda digadis ia ladang i so jolo ditobus ia sian Tuhan, nada adong haknia be manobus ladang i mangulahi. 21Di Taon Haluaan na giot ro gabe ladang ni Tuhan noma i ro di salolotna, jana lehenon ma i tu malim.
22Muda dilehen sada halak ladang na baru ditobusi ia tu Tuhan, 23angkon timbangon ni malim i ma argana mangihutkon taon na lobi lalu tu Taon Haluaan na giot ro. Dung i gararon ni halahi ma argana laing di ari i. Hepengna i gabe Tuhan ma nampunasa. 24Di Taon Haluaan angkon paulahon ma ladang i tu nampunasa parjolo sanga tu pomparanna.
25Sude arga ditontuhon mangihutkon arga na dung ditotopkon.
26Pahan-pahanan na adong parjolo Tuhan do nampuna i. Jadi sahalak pe nada tola mangalehen i tu Tuhan gabe haul jop ni roha. Anak ni lombu, anak ni biri-biri sanga anak ni hambeng na adong parjolo Tuhan do nampuna i. 27Binatang na haram na adong parjolo tola ditobus mangihutkon arga na ditontuhon ditamba dua pulu porsen. Muda so ditobus, tola do gadison binatang i tu halak na leban mangihutkon arga na rasmi.
28Sada pe nada tola manggadis sanga manobusi mulak sanga aha na dung dilehen tu Tuhan, sanga na jolma pe i, pahan-pahanan sanga tano. Tuhan do nampuna i ro di salolotna. 29Haru jolma na nilehen nada tola ditobus, pasti do ia dibunu.
30Saparsampulu sian sude suha ni tano bagi na gandum, parbatu ni hayu, di Tuhan do i. 31Muda giot tobusan ni sasahalak mangulahi sabagian, angkon gararonnia argana i ditamba dua pulu porsen. 32Sada sian sampulu pahan-pahanan, Tuhan do nampuna i. Muda dietong pahan-pahanan i, ganop na pasampuluhon, Tuhan do nampuna i. 33Nada tola aturon ni nampuna pahan-pahanan i pahan-pahanannia hum songon i sajo gabe hum na jatna i tarpili. Nada tola muse gontionnia pahan-pahanan i. Muda digonti ia dohot pahan-pahanan na asing, angkon lehenon ma dua-dua pahan-pahanan i tu Tuhan nada tola ditobusi mangulahi.”
34I ma angka parenta na nilehen ni Tuhan di ginjang ni Dolok Sinai tu halak Israel marhite si Musa.
Currently Selected:
HAMALIMON 27: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
