MIKA 5

Dijanjihon Debata sahalak parkuaso sian Betlehem

1Tapi anggo ho, ale Betlehem Efrata, ho ma sada kota na ummenek di Juda! Hape sian ho ma giot pabangkitonKu sada halak na markuaso di Israel na marasal mula sian narobi.

2Hara ni i padiaronnia ma halahi lopus tubuan anak sada dadaboru na denggan hian pamatangna. Dung i pasadaonna ma mangulahi angka dongan sabangsona na adong di habuangan dohot bangso ni halahi. 3Markarejo ma ia jana marmahani halahi markite-hite hagogoon ni Tuhan i dohot markite-hite hamuliaan ni goar ni Tuhan Debatania sandiri. Mangolu di bagasan sonang ma bangsona i, dibaen okuon ni jolma na satano on do hagodangannia, 4jana ia do hadameon i.

Haluaan dohot uhuman

Muda ro tentara ni Asur mamorangi tanonta on dohot mangarumpakkon partahananta, pabangkitonta ma pitu halak parmahan mangalaho halahi, bope sanga salapan halak pamimpin ni jolma. 5Taluhonon ni halahi ma Asur dohot luat ni si Nimrod marhite podang; jana paluaon ni halahi ma hita sian halak Asur, muda ro halahi masuk tu tanonta dohot mamolus luatta jana mandege luatta.

6Halak Israel na teba i, gabe songon ombun na lambok ma i sian Tuhan maradopkon angka bangso na bahat, jana songon parro ni udan tu suan-suanan. Marpangunsandean ma halahi tu Debata, jana nada be tu jolma. 7Angka halak Israel na tading dope di tonga-tonga ni angka bangso, tudos tu singa ma i na manjalahi panganonna di harangan sanga di padang-padang. Manyaroso ma singa i tu tonga-tonga ni punguan ni biri-biri, soroanna ma biri-biri i jana parsibakkononna; nada adong na ro mangurupi biri-biri i. 8Taluhonon ni Israel ma angka musuna jana roncohononna i sudena.

9Didok Tuhan ma: “Masa ma di hatiha i, pangabisonKu ma angka kudo sian tonga-tongamunu jana ropuhonKu ma angka kudo porangmu. 10Huroncohon angka kota na adong di tanomu jana Hurumpakkon sude partahananmu. 11Hulantuk sude angka ajimatmu jana Hubonom sude angka datumu. 12RopuhonKu angka patungmu dohot angka tugu pameleanmu; nada be sombaonmunu angka barang-barang na nibaen ni tanganmu sandiri. 13RumpakkononKu ma angka patung ni debata boru-boru Asera na adong di tanomu, jana Huroncohon angka kotamunu. 14Di bagasan panggasa-gasa ni murukKu, baloskononKu ma hajahatan ni sandok bangso na so marpangoloion tu Au.”

Currently Selected:

MIKA 5: LAIAKB

Highlight

Copy

Compare