MIKA 4
4
Diparenta Tuhan portibi on di bagasan dame
(Jes. 2:2-4)
1Anggo tu angka ari na ro
dolok ni Bagas Ni Tuhan tarida ma gumincat
jana tigor ma i jongjong
manyalpui angka dolok na gincat.
Marroan ma tusi angka bangso;
2dokkonon ni halahi sudena ma,
“Manangkok ma hita tu dolok ni Tuhan#4:2 DOLOK NI Tuhan: Dolok Sion.
tu Bagas Ni Debata na nisomba ni Israel bangsoNa!
AjarkononNia ma tu hita
sanga aha na patut baenonta.
Ihutkononta ma dalan na nipiliNia.
Angke sian Sion do haroro ni pangajaran,
jana hata ni Tuhan sian Jerusalem.”
3Putuskonon ni Tuhan ma parkaro
antara ni bahat bangso na adong di tano,
antara ni angka harajaan na gogo,
na donok pe dohot na dao.
Topaon ma podang gabe bajak
piso parpangkas manggonti tombak.
Nada be marsiporangan angka bangso,
nada be markobas kehe manyaroso.
4Mangolu be jolma di bagasan na aman jana marhasonangan
ditonga-tonga ni kobun anggur dohot kobun arana;
nada adong be na pabiar-biarkon,
i ma da janji ni Tuhan Na Markuaso.
5Ganop bangso na adong di portibi
mangoloi be jana marsomba tu debatana sandiri.
Tapi anggo hita haburjuhononta ma mangoloi Tuhan Debatanta
jana tasomba Ia salolot-lolotna.
Mulak ma Israel sian habuangan
6Didok Tuhan ma, “Dapot do i muse hatihana palagutonKu angka jolma na Huuhumi i, i ma angka na markancit di habuangan i. 7Damos halahi dionyakkon jana dao sian huta hagodangan. Tapi sian angka jolma na teba i, giot pungkaonKu ma sada sundut na imbaru. Gabe bangso na godang ma halahi boti na gogo. Au do na mamarenta halahi di Dolok Sion salolot-lolotna.”
8Jana ho, ale Tugu Punguan ni Biribiri, ale Tor ni boru Sion, giot ro ma tu ho jana angkon mulak muse harajaanmu songon na jolo, harajaan ni boru Jerusalem. 9Biasi mangangguhi ho tangis? Biasi marnyae ho songon ina na giot hipas? Adong he hara ni na so adong rajamunu jana marmatean angka panuturimu? 10Ale halak Jerusalem, marngeat jana mangangguhi ma hamu songon ina na tubu-tubuan! Harana, angkon tadingkononmunu noma kota saonnari jana maringanan di padang-padang noma hamu. Angkon kehe ma hamu tu Babel, tapi paluaon ni Tuhan do hamu disi sian angka musumunu. 11Madung marlagut bahat bangso laho mamorangi ho, ale Jerusalem! Pandok ni halahi, “Angkon roncohonon do Jerusalem! Idaonnami ma kota i gabe timbunan ni angka batu!” 12Tapi na so diboto ni angka bangso i do sanga aha na di bagasan sangkap ni Tuhan. Sian na so pamotoan ni halahi, na dipalagut do halahi anso diuhum, tudos tu gandum na dilunggukkon anso didege.
13Didok Tuhan do, “Ale halak Jerusalem, kehe ma hamu manguhumi angka musumunu! BaenonKu ma hamu margogo songon lombu na martanduk bosi jana marsisilon tumbaga. Ropuhonmunu ma bahat bangso jana sinadonganna i na dapot songon barang rampasan haulkononmunu ma i tu Au, Tuhan ni sandok tano on.”
14On pe, ale halak Jerusalem, patogu hamu ma partahananmunu! Madung hona hobuk hita! Madung diporangi musu i pamimpin ni Israel!
Currently Selected:
MIKA 4: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
