JUNUS 4
4
Parmuruhon ni si Junus dohot ampunan ni Debata
1Muruk sajo ma si Junus nada sonang rohania di haputusan ni Debata i; mur muruk ma ia. 2Jadi martangiang ma ia, “Nada he hudok hian do ale Tuhan taran so kehe sian bagasku na salpu i, na giot songon i hian do baenonMu? Hara ni i ma umbaen na huompoti kehe tu Tarsis! Huboto humani do Debata pangusayang dohot parholong Ho, na lambok jana mura sajo do manigor di Ho pauba sangkapMu manguhumi. 3Saonnari ale Tuhan, padiar ma mate au, angke gumonan noma au mate ulang pado mangolu.”
4Didok Tuhan ma mangalusi, “Patut ma he ho muruk?”
5Dung i kehe ma si Junus sabola Habincaran ni kota i, juguk ma ia disi. Dipature ia ma sada undung-undung jana marsilaung ma ia di bagasan, lalu painte-intehon sanga aha na giot masa di kota Ninive. 6Jadi dipatubu Tuhan Debata ma sada suan-suanan na marandor na mangalaungi si Junus gabe sonang pangkilalaannia. Laing na sonang hian do tutu roha ni si Junus tu suan-suanan i. 7Tapi ancogotna i taran andostorang dope, dibaen Debata ma sada ulok-ulok na manggirik urat ni suan-suanan i, gabe malos ma i. 8Dung bincar mataniari, diparo Debata ma alogo na milas na mangombus sian Habincaran. Giot tarkatos ma si Junus hara ni pandoit ni mataniari i songon dia na manutung ulunia. Gabe mandele ma ia jana por rohania sugari mate. Ning ia ma, “Gumonan noma da iba mate ulang pado mangolu!”
9Tapi didok Debata ma tusia, “Nada didalanna gabe songon i arsakmu hara ni suan-suanan i!”
Didok si Junus ma mangalusi, “Biasi nada? Dalanna ma da au muruk sajo lopus mate.”
10Jadi didok Debata ma tusia, “Di bagasan saborngin sajo do tubu suan-suanan on, jana manigor mate ia ancogotna i; nada ho na patubuhon i sanga pature-turehon i. Haru songon i pe laing marsak ho hara ni na mate ia. 11Patut ma da marsak Au pasari-sari Ninive, kota na godang i. Angke asing sian angka pahan-pahananna na so taretong i, adong do disi lobi 120.000 dakdanak na so marsala.”
Currently Selected:
JUNUS 4: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
