HOSEA 7

1“Muda Hupamalum Israel, gabe tarida ma hasalaan ni Efraim dohot angka hajahatan ni Samaria; angke dikarejohon halahi do margabus, manombom panangko laho masuk jana panyamun mangarampas di luar. 2Na so unjung do mamolus di pikiran ni halahi, sai paingot-ingotonKu do sude hajahatan ni halahi i. Humaliang halahi do angka dosa ni halahi gabe tangkas do Huida sudena.”

Partahi na jahat di bagas godang

3Didok Tuhan ma, “Martahi ma angka jolma laho pasonangkon raja i dohot angka pagawena anso i dalanna paoto-otohon halahi. 4Sude do halahi angka parkarosuan, songon dapur na torus marapi, hatiha tukang roti maradian pagarahon apina, dompak mambaen adonan dope ia. 5Di ari pesta ni raja i dibaen halahi do marsahit angka pamimpin marhite anggur na pamilaskon, mardomu do ia dohot angka panghianat. 6Songon api di dalihan, songon i ma gara-gara roha jahat ni halahi saborngin i, jana manyogotna i gabe api na gara ma i manggasa-gasa.

7Di bagasan muruk na nihagiotanna i, dibunu halahi ma angka pamimpin ni halahi i. Dibunu halahi do raja ni halahi pasada-sada. Tapi haru songon i pe jorbutna na masa i, sahalak pe nada adong na martangiang tu Au mangido tolong.”

Israel dohot angka bangso

8Didok Tuhan ma, “Marsada roha do bangso Israel dohot angka bangso na humaliang, gabe songon roti na mosok mambaribai ma halahi. 9Hape na so pamotoan ni halahi, mago do hagogoan ni halahi hara ni hasadaan ni tahi ni halahi dohot angka bangso-bangso i. Donok noma ajal ni halahi, hape nada diboto halahi. 10Tarida ma tangkas haginjangon ni roha ni Israel, jana gabe bukti ni hasalaan ni halahi ma i. Haru pe madung tarjadi sudena i, laing na so ra muse do halahi mulak tu Au, Tuhan Debata ni halahi. 11Moncong-oncong Israel songon unggas darapati na oto; mula-mulana kehe angka halak ni halahi mangido bantuan tu Mesir, dung i marlojong muse ma halahi tu Asur! 12Tapi taononKu noma jaring, jana tangkuponKu halahi songon na manangkup unggas na mamolus. UhumanKu noma halahi hara ni angka parbuatan ni halahi na jahat i.

13Marjaya do halahi hara ni na nitadingkon ni halahi Au. Angkon maropuk halahi hara ni na mangalo tu Au. Sai giot paluaonKu do nian halahi, tapi margabus do halahi tu Au. 14Nada tutu situtu na ruar sian roha tangiang ni halahi. Angke muda martangiang halahi, diompaskon halahi do dirina tu podoman, jana mangandung songon na nibaen ni angka jolma na so mananda Au, hape tangiang ni halahi i nada ruar sian ate-ate na ias. Muda martangiang halahi mangido gandum dohot anggur, digomahi halahi ma pamatangna i songon halak sisomba gana-ganaan, mangalo do halahi tu Au! 15Haru pe Au na pagodang-godangkon dohot na margogoihon halahi, laing martahi na jat do halahi mangalo Au. 16Laing dipupu halahi do mangihutkon angka debata na soada gogona i. Nada tarpangasahon halahi tudos tu sior na hendur. Angka pamimpin ni halahi mangkatai maradu bulbul, jadi mate hona bunu do halahi, kejam pambaenna jana partataan ni angka halak Mesir.”

Currently Selected:

HOSEA 7: LAIAKB

Highlight

Copy

Compare