JEHESKIEL 36

Pasupasu ni Debata di Israel

1Didok Tuhan ma, “Ale jolma parsantongkinan, mangkuling ma ho tu angka dolok ni Israel jana suru ma halahi manangihon jamita ni Tuhan Debata i, 2songon on ma didok Tuhan Debata, ‘Hara ni na nidokkon ni angka musu i taringot tu hamu: Tarimakasi, angka dolok sian na jolo madung gabe hita nampunasa. 3Hara ni i manyurirangi jana dokkon ma: Songon on ma didok Tuhan Debata. Hara ni musu na di humaliangmu, na mambaen hamu mamolngit jana na marpor ni roha tu hamu anso gabe nampuna ni angka bangso, jana madung dipahata-hata halak hamu. 4Hara ni i, ale angka dolok ni Israel, tangihon ma hata ni Tuhan Debata tu angka dolok dohot tor, tu angka batang aek dohot rura, tu angka inganan na dung sego jana na mamolngit dohot tu angka kota na dung tarulang, na dung gabe siincahan ni angka bangso na humaliangna; 5hara ni i songon on ma didok Tuhan Debata: Di bagasan piar-piar ni murukKu do Au mangalo angka bangso, jana mangalo sude halak Edom, na manontuhon tanongKu gabe nampunania di bagasan jop ni roha dohot incak-incak, ujungna nampunania noma tanongKu jana abis dirampas. 6Hara ni i manyurirangi ma taringot tu tano Israel jana dokkon ma tu angka dolok dohot tor: Songon on ma didok Tuhan Debata: Tutu di bagasan piar-piar ni murukKu do hara ni na dung marsitaonon hamu dibaen angka bangso. 7Au Tuhan Debata marsumpa angkon palayason muse angka bangso na humaliangmunu i. 8Tapi Au mandok tu hamu ale angka dolok ni Israel, martumbur ma angka hayumu mangulahi jana marbatu baen di bangsongKu Israel na giot mulak ne noma. 9Au ma jongjong di pihakmu ale Israel, jana Hupastihon mulak pangkuran mangulahi tanomi jana saburon same tusi. 10TambaanKu ma na mangingani luat i. Inganan ni halahi ma angka kota jana pajongjongon mangulahi sude na marsegoan i. 11TambaanKu ma halak dohot pahan-pahananmu, lopus bahat sajo, umbahat sian di mulana i, jana marpinompari halahi bahat-bahat. Dos ma halahi mangolu songon di mulana i jana sonang baenonKu songon na so unjung dihilala hamu. Jadi gabe botoon ni halahi ma Au do Tuhan. 12Giot obanonKu mulak bangsongKu Israel laho mangingani tanona sandiri. Halahi sandiri noma nampuna kota i jana sai mangalehen suha do i anso ulang be tangkuraparon angka dakdanak ni halahi.

13Songon on ma didok Tuhan Debata: Hara ni na nidok ni halak taringot tu ho: Dipangan ho do jolma jana diagohon ho do bangsomu 14hara ni i, nada panganonmu be jolma jana nada agohononmu be bangsomu, ninna Tuhan Debata. 15Nada padiaronKu be hata-hatahonon ni halak hajorbuton na nibaen ni angka bangso maradopkon ho, jana nada tanggungonmu be incak-incak ni angka bangso jana nada agohononna be bangsomu, ninna Tuhan Debata.’ ”

Dipaimbaru Israel

16Didok Tuhan ma tu Au, 17“Ale anak ni jolma parsantongkinan, taran maringanan halak Israel di tanona sandiri, dipahodar halahi do i marhite pambaenan dohot pangalaho ni halahi. Haram do Huetong pangalaho ni halahi i, songon dadaboru na ro bulanna.#36:17 HARAM ... BULANNA: Marojahan tu uhum ni si Musa do i, taringot tu haiason mangihutkon pandok ni ugamo. 18Jadi Huduruskon ma murukKu tu halahi hara ni bahatna pamunuon dibaen halahi di tano i jana dipahodar halahi do i marhite gana-ganaan ni halahi. 19Hona uhum ma halahi Hubaen hombar tu parngoluon dohot pangalaho ni halahi, jadi Hupaserak ma halahi tu angka luat na asing. 20Sanga tu dia pe halahi kehe, sai dipahodar halahi do goarKu na badia i. Angke didok angka jolma do songon on, ‘Bangso Ni Tuhan do nian bangso on, hape angkon tadingkonon ni halahi do tano na nilehen ni Debata tu halahi.’ 21Jadi marsak ma rohangKu hara ni goarKu na badia i na nipahodar ni angka halak Israel sanga na tu dia pe halahi kehe.

22Jadi hara ni i, palalu ma sanga aha na Hudok, Au Tuhan Debata mandok tu halak Israel, ‘Sanga aha na giot baenonKu sanoli on, nada hara ni hamu, ale angka halak Israel, tapi hara ni goarKu na badia i do, na nipahodarmu sanga na tu dia pe hamu kehe. 23PatuduhononKu ma godang ni goarKu na badia i, goar na nipahodarmunu di tonga-tonga ni angka bangso, jadi botoon ni halahi ma bahaso Au do Tuhan. Au Tuhan Debata madung mandok songon i. Pakeonku ma hamu laho pataridahon tu angka bangso paboa na badia do Au Tuhan. 24Sian ganop bangso dohot luat, palagutonKu ma hamu jana paulahonKu tu tanomu sandiri. 25Dung i pispisonKu ma hamu dohot aek na lan, anso ias hamu sian sude gana-ganaanmunu dohot sian sasude na pahodarkon hamu. 26Jadi Hulehen ma roha na imbaru dohot pikiran na imbaru gontionKu ma rohamunu na pir songon batu, jana lehenon roha pangoloion. 27DuruskononKu ma tondingKi tu bagasan rohamunu jana sai jagoanKu ma hamu anso mardalan mangihutkon angka aturan na sian Au jana anso mangoloi di sude na Huparentahon. 28Jadi maringanan ma hamu di tano na dung Hulehen di ompungmunu. Gabe bangsongKu ma hamu jana gabe Debatamunu ma Au. 29PaluaonKu ma hamu sian sasude na pahodar hamu. LehenonKu ma parenta tu gandum anso simbur tubu anso ulang be ro haleon mangalingkup hamu. 30Mur napu baenonKu bona ni suan-suananmunu jana tamba suha ni angka ladangmunu, anso ulang be bolusonmunu haleon na pajatjat goarmunu di tonga-tonga ni angka bangso. 31Taringot ma rohamunu tu pangalaho na jat dohot pambaenanmunu na so patut i, dung i gabe sobalan ma hamu di dirimunu hara ni angka dosa dohot hagigian na nibaenmunu i. 32Ingot ma ale Israel, Hubaen pe sasudena i nada hara ni hamu. Angkon ila ma nian rohamunu jana bile pangkilalaanmunu patunda ni pangalahomunu i. Au Tuhan Debata madung mandok songon i.’ ”

33Didok Tuhan Debata i ma, “Dung ias hamu Hubaen sian sasude dosamunu, paloasonKu ma hamu mangulahi maringanan di angka kotamunu dohot mambangun sego-segona i mangulahi. 34Najolo muda mardalan angka jolma mamolus sian angka padang-padangmi songon i ma santak ni gariang ni tano i diida halahi, tapi baenonKu ma sanga songon dia anso laing tarkarejohon hamu mangulahi tano i. 35Jadi gabe longang ma sude halak hara ni tano i na dung gasgas hian hape saonnari muba gabe Kobun Eden, jana angka kota na hona rampas humani masarsar jana gabe lobu, hape saonnari gabe angka kota na togu partahananna jana na diingani ni jolma. 36Jadi botoon ni angka bangso na hombar na tading i dope na dung Hubangun, Au Tuhan mambangun mangulahi angka kota na dung sego i, dohot mangkarejohon angka ladang na gariang. Au Tuhan madung mandok songon i jana tulus baenonKu songon i.”

37Didok Tuhan Debata i ma, “Ale bangso Israel, Hupaloas ma hamu mangulahi mangido tolong tu Au; tambaanKu ma bahat ni bilanganmunu songon punguan ni biri-biri. 38Angka kota na masego saonnari, gok ma sanolion manginganisa songon Jerusalem di hatiha na salpu na gok dohot biri-biri na dihaulkon di hatiha pesta. Jadi botoonmunu ma Au do Tuhan.”

Currently Selected:

JEHESKIEL 36: LAIAKB

Highlight

Copy

Compare