JEHESKIEL 22

Hajahatan ni Jerusalem

1Mangkuling ma Tuhan tu au, ning Ia ma, 2“Ale jolma parsantongkinan, na dung hobas dehe ho laho manguhumi kota na gok sibunu jolma i? Patuduhon ma tusia sude pangalahonia na nihagigihon i.”

3Jana dohononmu ma: Songon on hata ni Tuhan Debata: “Hara ni madung bahat dibunu ho sian halak bangsomu, jana dipahodar ho dirimu marhite na marsomba gana-ganaan na binaenmu sandiri, madung jumpang hatihamu uhumon. 4Markite-hite mudar na dung di duruskonmu marsala ho, jana marhite gana-ganaanmu hodar ho, hara ni i madung jumpang hatihamu marujung. Hara ni i do umbaen Hupadiar ho gabe siincahan dohot sipartataan ni angka bangso dohot luat sudena. 5Pailaon ni angka halak na di luat na dao dohot na donok ma ho hara ni na sai marpupu ho mangalanggar tona dohot aturan. 6Sude pamimpin ni Israel mangasahon gogo ni botohonna sandiri do jana sai mamunu jolma. 7Sahalak pe so adong halak na mangingani ho na pasangapkon simatobangna. Dikicu ho do halak jana dihaut ho untung sian hasusaan ni na mabalu dohot na so marama so marina. 8Dipahodar ho do angka inganan paribadatan tu Au jana Ari Sabat pe nada diargahon ho. 9Sian tonga-tonga ni halak na mangingani ho adong do deba pajajang-jajang na sai manilakoi halak na asing anso mate hona uhum. Adong muse do na giot mangankon juhut na dung dipelehon tu gana-ganaan. Adong muse dope na sai ra marhamainan. 10Adong do na manggoda inangna panggonti lalu dipakesa modom songon dadaboruna, marhamainan dohot dadaboru na ro bulanna, 11dadaboru ni halak sanga parumaenna sanga ibotona sian ina na asing. 12Adong muse do sigararon mamunu jolma, siincop mudar dohot na mamoro angka donganna sabangso. Madung dihalupahon halahi sudena Au. Au Tuhan Debata, madung mandok songon i.

13Tapi anggo saonnari libasonKu ma angka panangko dohot sibunu jolma. 14Puluk dope he ulaning sanga margogo dope ho mangangkat tanganmu dung sidung Huuhumi ho? Au Tuhan Debata madung mandok songon i, jana patulusonKu do sanga aha na dung Hudok. 15PaserahonKu ma halak na mangingani ho tu sude negara dohot bangso jana antahonKu ma pambaenanmu na jahat i. 16Marlayas ma ho baenon ni angka bangso na asing, jana gabe botoonmu ma Au do Tuhan.”

Api na mambaen ias

17Didok Tuhan ma tu au, 18“Ale jolma parsantongkinan, nada adong guna ni angka halak Israel i anggo di Au. Songon tasik ni logam campuran do halahi, songon kotoran ni tumbaga, simbora, bosi dohot simbora na lomlom dung jolo dipapita di pandusdusanna.” 19Hara ni i songon on do hata ni Tuhan Debata, “Hara ni na sandok hamunu madung gabe songon tasik palagutonKu ma hamunu tu Jerusalem. 20Songon palagut perak, tumbaga, bosi, simbora na lomlom dohot na bontar, na dipamasuk tu pandusdusan, laho papitahonsa. Songon i noma muse hamurukonKu, mangalala hamu. 21PalagutonKu ma halahi di Jerusalem, pagaraonKu api ni rimasKu di toru ni halahi, lopus malala halahi sudena. 22Songon perak na nidakdak di parapian, laing songon i ma halahi lalaon di Jerusalem. Jadi gabe botoon ni halahi ma Au do Tuhan na dung palaluhon rimasKu tu halahi.”

Dosa ni angka pamimpin ni Israel

23Mangkuling muse ma Tuhan tu au, ning Ia ma, 24“Ale jolma parsantongkinan, dokkon ma tu halak Israel na ramun do tano ni halahi jana hara ni i ma umbaen na muruk Au jana Huuhumi halahi. 25Songon singa na marngaur dung manyoro do angka pamimpin ni halahi. Dibunu halahi do rayat i, dirampas halahi do sude arta dohot sinadongan na dapot halahi jana patunda ni halahi gabe bahat dadaboru gabe mabalu. 26Dilaosi angka malim ni Israel do tona na sian Au, jana ramun dibaen halahi angka barang-barang na dung dibaen hapunjunganKu. Nada adong dibaen halahi parkotian ni na dung dihapunjungkon tu Au dohot na asing sian i. Boti muse nada diajari halahi rayat i laho paasingkon sanga dia na ias dohot na so ias mangihutkon aturan ni ugamo. Nada dipardulihon halahi Ari Sabat. Jadi songon i ma gabe marlayas Au dibaen bangso Israel. 27Songon sorigala na manyahe-nyahe soroanna do angka na marjabatan di pamarenta ni halahi. Mamunu jolma do halahi hum hara ni na manjalahi untung. 28Dibunihon angka panurirang do dosa i; songon na mangkapur tembok na hodar do halahi. Gabus do angka parnidaan ni halahi, songon i muse angka alatan ni halahi. Mangoku do halahi anggo tona na nipalalu ni halahi i na nijagit ni halahi do sian Tuhan Debata i, hape nada adong manghobari Au tu halahi. 29Mangicu dohot manangko do angka halak na kayo. Roha-roha ni halahi sajo do dibaen halahi tu halak na pogos jana mambuat untung do halahi sian halak sileban. 30Hujalahi do sian tonga-tonga ni halak Israel i na malo pajongjongkon tembok, sanga jongjong di angka inganan ni tembok na matolbak laho mampartahankon luat i muda ro Au mangaroncohon di bagasan parpiar ni murukKu; hape hum sahalak pe nada adong dapot au. 31Hara ni i, Hupalalu ma saonnari rimasKu maradopkon halahi, jana songon api pangabisonku ma halahi patunda ni sude pangalaho ni halahi. Au Tuhan Debata madung mandok songon i.”

Currently Selected:

JEHESKIEL 22: LAIAKB

Highlight

Copy

Compare