JEHESKIEL 21

Podang ni Tuhan

1Didok Tuhan ma tu au, 2“Ale anak ni jolma, burai ma Jerusalem. Burai ma angka inganan paribadatan na disi. Paingot ma tano Israel, 3Au Tuhan mandok songon on, ‘Musumu do Au. SintahonKu ma podangKu jana bunuonKu hamu sude, na jahat dohot na burju. 4Marhite podangKi giot aloonKu sude jolma sian Utara lalu tu Selatan. 5Jadi gabe botoon ni sude jolma ma Au do Tuhan, Husintak ma podangKu jana nada be pasarungonKu.’ ”

6“Ale anak ni jolma, mangangguk! Mangangguk ma ho di jolo ni halahi songon halak na matipul rusukna. Jana na maringanan di bagasan parhancitan na paet. 7Muda disapai halahi sanga hara ni aha umbaen na mangangguhi ho, dokkon ma na marsak ho hara ni barita na giot ro. Barita na mambaen mabiar roha ni halahi, gale tangan ni halahi jana humitir dugul ni halahi hara ni na mandele. Tutu do na dung dapot hatihana jana tarjadi do sudena i. Au Tuhan Debata madung mandok songon i.”

8Didok Tuhan ma tu au, 9“Ale anak ni jolma, manyurirangi ma ho! Paboa ma tu angka jolma i, Au Tuhan mandok songon on,

‘Adong ma sada podang, podang na dipatajom.

Podang na digarut jana dipalandit.

10Dipatajom do i anso tarpake pamatehon.

Digosok anso marlinang-linang.

Bisa dope he jop ni roha di hami?

Tungkot harajaan ni anak i do na pamatehon sasude hayu.

11Digarut podang i anso singkop pakeon do i

jana dipasahat ma i tu sada halak panyamboli.

12Mangandung ma ho, ale jolma parsantongkinan, mangarar ma ho jana pio-pio!

Angke madung hobas podang i mangalo bangsongKu.

Angka pamimpin ni Israel rap dohot bangso i sudena

tihamon ni podang i ma lopus marmatean.

Jadi tompuk ma andoramu hara ni dangolna,

13angke na topet Huuji do bangsongKu,

muda nada ra halahi padenggan pangalahona,

tarjadi noma i tu halahi sudena.’ ”

14“Jana ho anak ni jolma, manyurirangi ma ho jana martopap, padiar ma podang i gabe dua lompit, tolu lompit. I ma podang pamunu, podang pamunu tu halak na bahat, na marhuliang mangabiskon halahi. 15Mago do habaranion ni bangsongKu dibaen podang i jana tartuktuk lalu tinggang. Huondam kota ni halahi dohot podang na manyirlak songon hilap jana na hobas laho mambunu. 16O podang na tajom, lancimkon ma tu siamun dohot siambirang, sanga na adop dia pe giotmu. 17Au pe martopap-topap muse ma, dung i mombun ma muruk ni rohangKu, Au Tuhan, madung mandok songon i.”

Podang ni raja ni Babel

18Mangkuling ma Tuhan tu au, ning Ia ma, 19“Ale anak ni jolma gambar ma di ho dua dalan na bolas boluson ni raja ni Babel na maroban podangna. Dalan na dua i angkon di sada luat pangkalna. Baen ma papan tudu-tudu ni dalan i, pataridahon dalan panyirpangan tu angka kota. 20Gambar ma sian dalan dia haroro ni podang i mangalo Raba kota ni Amon, jana mangalo Juda, na marbenteng di Jerusalem. 21Jongjong ma raja ni Babel di lambung papan tudu-tudu ni dalan i. Laho manontuhon sanga dalan dia na giot bolusonnia, sapaannia do i gana-ganaannia, hursuhonnia pana jana paresoonnia ate-ate ni binatang#21:21 HURSUHONNIA PANA JANA PARESOONNIA ATE-ATE NI BINATANG: Muda giot mambuat haputusan, dihursuk jolma najolo do inganan ni anak ni pana dung i dipapitpit ia ma mambuat sada sian i. Adong muse do na mangalatkon tanda-tanda di ate-ate ni binatang na di sambol baen haul. na baru dipelehon. 22Madabu tu tangan siamunna anak ni pana na manudu Jerusalem! Na nidokna disi, angkon hobuhon ni raja i ma kota Jerusalem. Dung i disurakkon ia ma surak-surak parporangan anso dihobasi angka tentarania i angka parkokas sipakeon laho mangonjar, dipasang ma i di angka pintu ni horbangan ni Jerusalem, manimbun tano mambaen tembok pangkobuhan dohot manghuar angka bondar. 23Tapi nada porsaya halahi tu tondung i, hara ni parjanjian na binaen ni halahi. Tapi dipasingot tondung i do halahi di hasalaan ni halahi jana dipaboa na angkon tartangkup ma halahi. 24Au, Tuhan Debata mandok tu halahi, ‘Madung tarboto angka dosamunu jana sude halak umboto na marsala hamu. Tarida do hajahatanmunu i di sude na nibaenmunu. Saonnari madung dapot hatihana hona uhum hamu jana pasahatonKu ma hamu tu musumunu.’ ”

25Jana tu raja ni Israel hudok do, “Ale raja na jahat jana na hodar! Madung donok hatihana di ho manjagit uhuman na parpudi. 26Au, Tuhan Debata madung mandok songon i. Buka ma tukumi jana talduskon ma sarobenmi. Saonnari madung muba na masa. Pagincaton do na pogos jana patutoruon do na gincat. 27RoncohononKu ma sudena kota on, lopus di sude inganan hum sego-segona noma na adong. Tapi dung ro pe halak na Hutodo i laho manguhumi kota on anso tarjadi na songon i. Tusia ma pasahatonKu kota on.”

Podang dohot halak Amon

28“Ale anak ni jolma, maralatan ma ho! Paboa ma tu halak Amon na mangalayasi Israel i, Au Tuhan Debata mandok, ‘Madung hobas sada podang laho manyambol, madung digarut podang i manyirlak songon hilap, anso singkop laho mamunu. 29Gabus do parnidaan na niidamunu jana buras dohot bungkak do alatan na nipajojormunu. Na jahat do hamu jana na so hasaya jana madung donok hatihana manjagit uhuman na parpudi hamu. Ponggolkonon ni podang i ma rungkungmunu.’

30O hamu halak Amon, pasarung hamu ma mangulahi podangmunu i! Giot uhumanKu hamu di inganan disi hamu ditompa dohot ditubuhon. 31PalaluonKu ma tu ginjangmunu muruk ni rohangKu na gara-gara i. Jana pasahatonKu ma hamu tu angka jolma na jingar na dung somal mamatehon. 32Abis ma hamu panganon ni api. Durus ma mudarmunu di tanomunu sandiri, jana sahalak pe nada adong be na mangingot hamu. Au Tuhan, madung mandok songon i.”

Currently Selected:

JEHESKIEL 21: LAIAKB

Highlight

Copy

Compare