HARURUAR 31

Angka tukang na malo laho pature Bandar Parmianan Ni Tuhan

(Har. 35:30–36:1)

1Didok Tuhan ma tu si Musa, 2“Madung Hutodo si Besaleel anak ni si Uri, pahompu ni si Hur sian Marga Juda, 3jana Hugohi ia dohot Tondi Ni Debata. Madung Hulehen disia pangastuion, hamaloan dohot hagogoan domu tu sandok ragam ni hamaloan, hajegesan: 4laho mambaen rangrangan na manghaporluhon hamaloan lalu mangkarejohonsa sian sere, perak dohot tumbaga; 5laho manggarut simata na giot sipakeon; laho manggorga hayu bope sude ragam ni sude parkarejoan hajegesan na asing. 6Boti madung Hutodo si Oholiab, anak ni si Ahisamak sian Marga Dan laho mangurupi ia. Madung Hulehen muse hamaloan godang tu angka tukang na malo, anso laing tarpature halahi sanga aha na Huparentahon: 7Bandar ParmiananKu, Poti Parjanjian dohot tutupna, sude panjamaan ni Bandar Parmianan, 8meja dohot angka panjamaanna, parlampuan dohot panjamaanna, dohot langgatan panutungan i, 9langgatan panutungan dohot angka panjamaanna, sambong pamasuan dohot jongjonganna, 10pakean malim na tumbuk di si Harun dohot angka dakdanaknia, i ma sipakeon ni halahi muda hatiha mandalankon karejo songon malim, 11miak upacara, dohot hamonyan na huskus di Inganan Na Badia. Sasudena i angkon tumbuk do songon na Hudok tu ho baenon ni halahi.”

Sabat, Ari Paradianan

12Diparentahon Tuhan ma si Musa, 13paboahon tu bangso Israel, “Pagodang hamu ma Ari Sabat i, ari na dung Hutotopkon songon Ari Paradianan. Ari i ma na gabe tanda ni parjanjianKu dohot hamu ro di pinomparmunu, anso diboto hamu, Au do Tuhan na mambaen hamu gabe bangsongKu sandiri. 14Angkon pasangapanmunu do Ari Sabat, angke ari na badia do i di hamu; sanga ise mangalanggar habadiaan ni Ari Sabat i, simatehonon noma i; angke sanga ise na mambaen karejo di ari i, siagohononkon do i sian tonga-tonga ni bangsomunu. 15Onom ari lolotna tola markarejo, tapi anggo ari papituhon angkon marari Sabat do, i ma Ari Paradianan na gok, ari na badia di Tuhan: Sanga ise na mambaen karejona di Ari Sabat, nimatehon do uhuman ni i. 16Jadi angkon pasangapan ni halak Israel do Ari Sabat, markite-hite na manghagodangkon Ari Sabat i marsundut-sundut angke i ma parjanjian na manongtong. 17I ma sada tanda parjanjian antara Au dohot bangso Israel ro di salolot-lolotna; angke di bagasan onom ari do ditompa Tuhan langit dohot tano, jana maradian do Ia di ari papituhon i.”

18Dung sidung Debata manghatai dohot si Musa di Dolok Sinai, dilehen Ia ma tu si Musa batu panyuratan ni uhum ni Debata, batu sidua-dua na nisurat ni tangan ni Debata sandiri.

Currently Selected:

HARURUAR 31: LAIAKB

Highlight

Copy