HARURUAR 30

Langgatan panutungan ni haminjon

(Har. 37:25-28)

1“Baen ma sada langgatan sian hayu akasia, inganan panutungan ni haminjon. 2Sogi opat ma i baen, 45 sentimeter ginjangna jana 45 sentimeter bidangna, jana gincatna 90 sentimeter. Domu do tandukna na di suhi-suhi na opat i tu langgatan i. 3Angkon lampisonmu do i dohot sere na polin, humaliang di ginjang dohot humaliangna na opat i dohot angka tandukna i. Angkon baenonmu do bingkena sian sere humaliang. 4Angkon baenonmu do dua golang-golang ni langgatan i dua sian sere di toru ni bingkena i; angkon baenonmu do di rusukna na dua i golang-golangna i sabola lambungna na dua i, jana angkon tumbuk ma tu golang-golangna na dua i susukkonon hayu pamorsanna, anso songon i ma pambaenna laho maroban langgatan i. 5Angkon sian hayu ingul do baenonmu hayu pamorsanna i jana lampisi ma i dohot sere. 6Baen ma inganan ni langgatan on di ruar ni tire na di jolo ni Poti Parjanjian i. Disi ma Au giot marsuo dohot hamu.

7Di ginjangna i ma si Harun manutung hamonyan dohot angka na huskus; ganop manyogot muda laho paiaskon angka lampu, angkon tutungonnia ma i. 8Songon i muse muda laho manutung angka lampu i si Harun andospotang. Angkon laing tutungon do hamonyan i songon haul, torus ganop ari salolot-lolotna. 9Nada tola haulkononmunu hamonyan na so tola haulkonon, sanga haul binatang, sanga haul eme di ginjang ni langgatan i; ulang diduruskon muse aek ni anggur di ginjangna i. 10Sanoli sataon angkon baenon ni si Harun upacara pabadiahon langgatan i; dipispis ia ma tandukna na opat i dohot mudar ni binatang na dihaulkon i baen panyesa ni dosa. Angkon baenon do songon i ganop taon sapanjangna. Angkon badia do langgatan on sudena, dihaulkon tu Au Tuhan.”

Guguan tu Bandar Parmianan ni Tuhan

11Didok Tuhan ma tu si Musa, 12“Muda hatiha mangetong bahat ni halak Israel ho sanga sadia bahatna di na mandaftar halahi, angkon pasahaton ni halahi do haul tu Tuhan, i ma hepeng pandamei hara ni hosa ni halahi, di na nidaftarkon ni donganna halahi anso ulang adong na hona bala sian halahi di na mandaftar i. 13Songon on ma haul ni halahi, tarmasuk ma disi angka halak na tardaftar i; satonga sikal, na nitimbang di sikal na badia – dua pulu gera boratna sikal on; – satonga sikal on ma boratna haul sipasahaton tu Tuhan. 14Ganop halak na giot daftarkonon i, na marumur dua pulu taon tu ginjang, angkon pasahatonna ma haul sisongon i tu Tuhan. 15Ulang lobi dihaulkon halak na maradong, jana halak na pogos pe ulang hurang sian satonga sikal dipasahat haulna di na pasahatkon haul sisongon i maradopkon Tuhan laho manggarar hepeng tobus ni hosa ni halahi. 16Jana angkon pangidoonmu do hepeng pandamei i sian halak Israel jana pargunahononmu ma i pature-ture Bandar ParmiananKu, anso gabe parningotan ma i di adopan ni Tuhan laho paingotkon halak Israel dohot laho patupahon pandamei salaho tu hosamunu sasude.”

Sambong pamasuan

17Didok Tuhan ma tu si Musa, 18“Angkon baenonmu do sambong dohot muse do ingananna sian tumbaga baen pamasuan, jana baen ma i di antara ni Bandar Parmianan dohot langgatan i, jana baen ma aek tu bagasan. 19Jadi angkon sian aek na disi i ma si Harun dohot angka dakdanaknia mamasu pat dohot tangan ni halahi. 20Muda laho masuk halahi tu Bandar Parmianan i, angkon basuon ni halahi ma dohot aek i tangan dohot pat ni halahi, anso ulang mate halahi. Laing songon i muse ma muda giot ro halahi tu langgatan i laho mandalankon ibadat bope laho manutung haul na marapi tu Tuhan, 21angkon basuon ni halahi do tangan dohot pat ni halahi, anso ulang mate halahi. Songon i ma na nitotopkon di halahi tongtong salolot-lolotna, disia dohot di angka pomparannia marsundut-sundut.”

Miak upacara

22Didok Tuhan ma tu si Musa, 23“Pulung ma parmasak na dumenggan – onom kilo miak mur, tolu kilo hulim, tolu kilo tobu na huskus, 24dohot hayu teja onom kilo (sudena i nitimbang ma di timbangan na rasmi). Tambahon ma opat liter miak zetun, 25jana baen ma i gabe miak upacara na nibaur songon miak na huskus. 26I ma pake laho mamiahi Bandar ParmiananKu, Poti Parjanjian, 27meja dohot sude panjamaanna, inganan parlampuan dohot panjamaanna, 28langgatan panutungan ni hamonyan dohot sambong bope hajongjonganna. 29Baen ma sudena i gabe hapunjunganKu markite-hite cara na songon on gabe badia sasudena i. Marmara ma sanga ise jana sanga aha sajo na mangantulsa hara ni hagogoan ni haiasonna. 30Dung i miahi ma si Harun dohot angka anaknia i jana lantik ma halahi gabe malim laho mangoloi Au. 31Dok tu halak Israel, miak upacara angkon pakeon do sapanjangna di bagasan ibadatKu. 32Nada tola niusehon miak i tu angka jolma sihabahatan jana nada tola baenonmunu ramuan na sarupa laho mambaen pulungan na tudos tusi. Badia do miak i, jana angkon songon barang na badia do baenonmunu tusi. 33Sanga ise mambaen miak na songon i, sanga mamakesa sanga na tu ise pe na so malim, nada sietongon be i songon sahalak sian bangsongKu.”

Hamonyan

34Didok Tuhan ma tu si Musa, “Pulung ma angka parmasak on sarupa be bahatna – gota ni damar, lampak ni korang, gota ni hayu rasamala dohot pultak ni hamonyan. 35I ma pake sudena laho mambaen pulungan ni hamonyan songon miak na huskus. Baen sirana anso tongtong jeges jana badia. 36-37Deba sian pulunganna i angkon lamot do nigiling. Oban ma i tu Bandar ParmiananKu jana sirsirhon ma di jolo ni Poti Parjanjian i. Etong ma hamonyan i songon barang na badia sihaulkonon tu Au. Ulang dibaen ramuan na songon i laho mambaen hamonyan na sarupa tusi na giot di hamu sandiri. 38Sanga ise na mambaen na huskus sisongon i nada sietongon be songon sada halak sian bangsongKu.”

Currently Selected:

HARURUAR 30: LAIAKB

Highlight

Copy