HARURUAR 28

Pakean ni Malim

(Har. 39:1-7)

1“Piohon ma angkangmu si Harun dohot angka dakdanaknia i si Nadab, si Abihu, si Eleasar dohot si Itamar. Paasing ma halahi sian halak Israel, anso tarbaen halahi mangoloi Au songon malim. 2Baen ma pakean malim di angkangmu si Harun, anso tongam ia idaon jana sangap. 3Piohon ma tukang jait na malo, na dung Hupasahat hamaloonna. Dok ma tu angka tukang i anso dibaensa pakean ni si Harun; anso tumbuk ia marhapunjungan di Au, bope anso dioloi ia Au songon malim. 4Dok ma anso dibaen angka tukang i panutup ni andora, sada baju efod, sada mantel, sada baju na nisulam, sada saroben dohot bobat. Angkon baenon ni halahi do pakean malim on di si Harun angkangmi dohot di angka dakdanaknia, anso taroloi halahi Au songon pangoloi ni malim. 5Angkon sian wol na rata langit, na bunga torung dohot na rara, sian bonang sere dohot linen na halus do baenon ni angka tukangna i pakean i.

6Dok ma dibaen angka tukangna i baju efod sian wol na rata langit, na bunga torung dohot na rara, bonang sere dohot linen na halus, na ni pajeges dohot sulam-sulaman. 7Angkon baenon sidua ihot tali abara padomuhon abarana na dua i. 8Nibaen ma bobatna sian abit na halus panonunna na nitonun sian bonang na sarupa na niudut tu baju efod#28:8 EFOD: Pakean na suman potonganna tu rompi na nibaen sian abit na marrupa-rupa warnana na mararga situtu. Ditambatkon do tu baju i sada kantong na marisi Urim dohot Tumim, dua barang na nipake ni malim laho umboto sanga aha giot ni Debata. i anso gabe sada. 9Nibuat ma dua mata intan krisopras jana gorgahon ma tu mata intan i goar-goar ni anak ni si Jakob na dua bolas i 10marguru tu parjojor ni umurna, onom be ganop batu. 11Pabaenkon ma i tu tukang sere na malo manggorgahon goar-goar ni anak ni si Jakob na dua bolas i tu batu intan i. Dung i, angkon marbingke sere do baenon batu intan i. 12Baen ma batu intan i tu tali abara ni efod i, songon na mangwakili marga ni Israel na dua bolas i. Songon i ma carana baenon ni si Harun paoban-oban goar ni halahi di abarania, anso Au, Tuhan marningot tongtong di halahi. 13Baen ma dua bingke 14dohot dua rante sian sere na polin na nidandan songon tali. Jadi padomu ma rante i tu bingke sere sinangkinan i.”

Tutup ni andora

(Har. 39:8-21)

15“Baen ma sada tutup ni andora ni Malim Godang, i ma na angkon sipakeonnia muda giot botoonnia sanga aha na nipangido ni roha ni Debata. Angkon sarupa do bahan ni tutup ni andora i dohot bahan ni baju efod dohot panyulamna. 16Marsogi opat ma i nibaen jana nilompit dua, 22 sentimeter ma ginjangna jana 22 sentimeter bidangna. 17Baen ma opat baris batu intan di tutup ni andora i. Di baris na parjolo sian batu jakut, batu manikam dohot sada batu dalimo. 18Di baris na paduahon, baen ma batu zamrud, batu intan nilam dohot berlian. 19Di baris patoluhon, sada batu intan na rata langit, batu intan akik dohot batu intan amestist. 20Di baris na paopatkon baen ma batu intan na rata poso, batu intan krisopras dohot batu intan na gorsing. Angkon marbingke sere do baenon batu intan na dua bolas i. 21Di batu intan na dua bolas i angkon nigorgahon do sada be goar ni anak ni si Jakob na dua bolas i, laho mangwakili angka marga ni Israel. 22Angkon marrante sere polin do baenonmu tutup ni andora on, na nijalin songon tali. 23Baen ma dua golang sere jana nibaen ma i tu suhi-suhi na dua bagian parginjang ni tutup andora i 24jana pamasuk ma rante sere na dua i tu golang na dua sinangkin. 25Angkon nirahut do ujung ni rante na dua nari i tu bingke na dua i. Jadi gabe mardomu ma tutup ni andora i sian jolo dohot tali abara ni baju efod i. 26Baen muse ma dua golang sere, pasang ma i tu suhi-suhi partoru ni tutup andora i di bagasan na dais tu efod i. 27Baen muse ma dua golang sere jana tar tu toru sian jolo ni tali abara ni baju efod i di lambung ni pangkilimanna i, di ginjang ni bobat na nitonun na halus i. 28Anggo golang ni tutup andora i angkon nipadomu do tu golang ni baju efod i dohot tali na rata langit. Jadi gabe tongtong ma tutup andora i di ginjang ni bobat i jana nada ra taldus.

29Jadi muda masuk si Harun tu Inganan Na Badia, angkon pakeonnia do tutup andora na nigorgaan dohot goar ni marga-marga ni halak Israel, anso Au Tuhan, marningot tongtong di bangsongKu. 30Pasang ma Urim dohot Tumim#28:30 URIM DOHOT TUMIM: Dua ragam barang na nipake ni malim laho umboto giot ni Debata. Nada tontu binoto sanga na bia pamake ni barang-barang i. di tutup andora i anso tarpake si Harun i muda ro ia mangadop tu ingananKu na badia. Muda di hatiha na songon i, angkon pakeonnia tongtong tutup andora i, anso diboto ia sanga aha giot ni rohangKu di bangsongKu Israel.”

Pakean ni malim na asing

(Har. 39:22-31)

31“Mantel na nipake di ginjang ni baju efod i angkon sian wol na rata langit do i sude nibaen. 32Nibibiran ma parrungkunganna i, anso ulang momo masibak. 33Angkon baenonmu do batu ni dalimo sian abit wol na bunga torung, abit na rata langit dohot abit kirmisi tu ujung ni gamis i humaliang, jana parsolotkon ma giring-giring sere i marantara-antara, 34anso sada giring-giring sian sere dohot sada batu ni dalimo tongtong marantara-antara di ujung ni gamis i. 35Angkon pakeon ni si Harun do mantel on muda hatiha markarejo ia songon malim. Muda hatiha ro tu adopanKu di Inganan Na Badia sanga laho kehe sian i, tarbege ma sora ni giring-giring i, gabe nada be bunuon ia.

36Baen ma sada parhiasan sian sere na polin na nigorga dohot pandohan, ‘Nabadia di Tuhan’. 37Tambatkon ma i tu saroben i dohot tali na rata langit. 38Angkon pasangon ni si Harun do parhiasan sere i di bohinia anso ra Au Tuhan manjagit sude haul na nioban ni halak Israel tu Au, haru pe umpamana madung adong saotik na sala dibaen halahi.

39Anggo kameja ni si Harun, angkon sian abit linen na halus do partonunna baenon. Baen muse ma sada saroben sian abit linen na halus dohot bobat na nisulam.

40Baen ma kameja, bobat dohot kupia di angka dakdanak ni si Harun anso toman boti jeges idaon. 41Papakehon ma pakean i tu angkangmu si Harun dohot tu angka dakdanaknia i. Miahi ma halahi dohot miak zetun; jadi sah ma halahi gabe malim jana dipasahat laho mangoloi Au. 42Baen ma saraor pendek sian abit linen di halahi, ginjangna mamungka sian gonting lalu tu hae-haena, anso ulang haidaan na niabitanna i. 43Angkon tongtong do marsaraor si Harun dohot angka dakdanaknia i muda masuk halahi tu bagasan Bandar ParmiananKu sanga donok tu langgatan laho maribadat songon malim di Inganan Na Badia. Jadi gabe nada hona bunu be halahi hara ni na tarida na niabitan ni halahi. Hot do aturan on tu si Harun dohot pomparannia.”

Currently Selected:

HARURUAR 28: LAIAKB

Highlight

Copy