HARURUAR 27

Langgatan

(Har. 38:1-7)

1“Baen ma sada langgatan sian hayu akasia. Angkon marsogi opat do i baenonmu tohangna 2,2 meter jana unjurna 2,2 meter. Gincatna 1,3 meter. 2Baen ma martanduk di ganop suhi-suhina i. Angkon domu do gabe sada tanduk i dohot langgatan i jana nilampis dohot tumbaga do sudena i. 3Baen ma huali inganan ni abuan, sonduk, talam, garpu dohot inganan ni api. Angkon sian tumbaga do baenon sude panjamaan on. 4Baen ma sada karanjang sian tumbaga na nibayu jana baen muse ma sitiopan parobanan di suhi-suhi na opat i. 5Baen ma karanjang i tu toru di topi ni langgatan i satonga ni gincat ni langgatan i. 6Baen ma hayu porsan-porsan sian hayu akasia na nilampis dohot tumbaga, 7jana surukkon ma tu golang-golang pamorsanan na di topi ni langgatan i ganop mamorsan langgatan i. 8Sian papan do baenonmunu di bagasan marguru tu rancangan na Hupatuduhon tu ho di ginjang ni dolok i.”

Alaman ni Bandar Parmianan Ni Tuhan

(Har. 38:9-20)

9“Maralaman do baenonmu humaliang Bandar ParmiananKi, na nihandang dohot tire sian abit linen na halus. Bagian na sabola Selatan i, 44 meter ginjangna, 10na nipajongjong dohot dua pulu tiang tumbaga di ginjang ni dua pulu ojahan laing sian tumbaga rap dohot sangkotan dohot panguduti na sian perak. 11Laing songon i ma nibaen sian Utara. 12Anggo sabola Hasundutan, 22 meter ma ginjang ni tirena i rap dohot dua pulu tiang di ginjang ni dua pulu ojahanna. 13Sabola Habincaran disi ma parpintuanna, 22 meter muse ma ginjang ni alamanna i. 14-15Di siamun dohot siambirang ni pintu i angkon adong do tirena 6,6 meter martolu tiang di ginjang ni tolu ojahan. 16Tu pintuna i angkon adong do tire sambilan meter ginjangna sian abit linen na halus na nitonun dohot wol na rata langit, na bunga torung dohot na rara, jana na nisulaman. Na nipajongjong do tire i dohot opat tiang di ginjang ni opat ojahan.

17Sude tiang na humaliang pintuna i na marsitiopan do i na sada tu na asing dibaen hait-kaitna sian perak i; angkon sian perak do baenon hait-kaitna i jana ojahanna sian tumbaga. 18Handang ni alaman i humaliang, ginjangna 44 meter, tohangna 22 meter jana gincatna 2,2 meter. Sian abit linen na halus ma nibaen tirena i jana ojahanna sian tumbaga. 19Sude panjamaan sipakeon di bagasan Bandar Parmianan, sude rancang ni Bandar Parmianan dohot handangna humaliang, sian tumbaga do baenon.”

Pangurus ni lampu

(Ham. 24:1-4)

20“Suru ma halak Israel maroban miak zetun na dumenggan laho mangisi lampu na di bagasan Bandar ParmiananKi anso tarpagara ganop borngin. 21Angkon pagaraon ni si Harun dohot dakdanaknia do lampu i. Di ruar ni tire panutup ni Poti Parjanjian i ma inganan ni lampu i. Di Bandar ParmiananKi, angkon torus do gara lampu sian potang ari lalu tu torang ari. Angkon dalankonon ni halak Israel dohot pomparanna do parenta on sapanjangna.”

Currently Selected:

HARURUAR 27: LAIAKB

Highlight

Copy