HARURUAR 25

Haul pajongjongkon Bandar Na Badia

(Har. 35:4-9)

1Didok Tuhan ma tu si Musa, 2“Suruhon ma halak Israel maroban somba-somba tu Au. Jagiti sajo ma sanga aha na nipasahat ni halahi sian ias ni rohana be. 3Adong do i na maroban sere, perak dohot tumbaga; 4abit linen na halus, abit wol na rata langit, na bunga torung dohot na rara, abit na nibaen sian imbulu ni hambeng, 5huling-kuling ni biri-biri jantan na niraraan, huling-kuling na nipahalus, hayu akasia, 6miak lampu, parmasak sipakeon gabe miak badia dohot tu hamonyan na huskus, 7ragam-ragam ni simata sibaenon laho pajegeskon pakean ni Malim Godang dohot panutup ni andorania i. 8Suru ma anso dibaen bangso i di Au sada Bandar Na Badia, anso maringanan Au di tonga-tonga ni halahi. 9Angkon marguru tu sangkap na giot patuduhononKu tu hamu do baenonmunu Bandar Parmianan dohot sude panjamaan sipakeon disi.”

Poti Parjanjian

(Har. 37:1-9)

10“Baen ma sada poti sian hayu akasia, 110 sentimeter ginjangna, tohangna 66 sentimeter, jana Hincatna 66 sentimeter. 11Lampisi ma sian bagasan songon i sian duru dohot sere na polin jana baen bingkena humaliang laing sian sere. 12Baen ma opat golang-golangna sian sere anso adong sitiopanna jana di patna na opat i ma lohotkon golang-golangna i, dua sabariba. 13Baen ma hayu porsan-porsanna laing sian akasia jana lampisi muse ma i dohot sere, 14susukkon ma porsan-porsanna i tu golang-golang sinangkin na di ganop suhina i. 15Angkon hot do porsan-porsanna i di golang-golang i, nada tola ulduson. 16Jadi pamasuk ma tu bagasan poti i batu na dua, panyuratan ni angka parentangKi na giot pasahatonKu tu ho.

17Baen ma tutup ni poti i sian sere na polin, ginjangna 110 sentimeter, bidangna 66 sentimeter. 18Baen ma dua kerub sian sere na nitopa, 19sada be di ujung ni poti i. Malo ma mambaen anso laing sada kherubim na dua i dohot tutupna i. 20Angkon paadop-adop do kerub na dua i jana angkon tutupon ni habongna i ma poti i. 21Pamasuk ma batu panyuratan na dua i tu bagasan poti i, baru ma tutupi sian ginjang dohot tutup pardamean i. 22Disi ma Au marsuo dohot ho, jana sian ginjang tutupna i di holang-kolang ni kerub na dua na marhabong i, sian i ma lehenonKu angka aturan tu bangso Israel.”

Meja sipakeon inganan ni roti na nisombahon tu Debata

(Har. 37:10-16)

23“Baen ma sada meja sian hayu akasia, 88 sentimeter ginjangna, bidangna 44 sentimeter, jana gincatna 66 sentimeter. 24Lampis ma dohot sere na polin jana baen bingkena humaliang sian sere. 25Baen topina i 7,5 sentimeter jana baen ma sere batas ni topina i humaliang. 26Baen ma opat golang-golang sian sere panyusuhan ni porsan-porsanna jana di suhi-suhi na opat i ma sabola patna i lohotkon. 27Angkon sian lambungna do pasangon golang-golang panyusuhan ni porsan-porsanna i, di lambung ni topi ni meja i. 28Angkon sian hayu akasia do baen porsan-porsanna i jana nilampis dohot sere. 29Baen ma angka pinggan, sambong-sambong, gunci, dohot angka mangkuk inganan ni anggur sisombahononkon. Sian sere do sudena i baenon. 30Angkon di jolo ni Poti Parjanjian i do baenon meja i, jana di ginjang ni meja i angkon tongtong do adong roti na badia na nisombahon tu Au.”

Taringot tu parlampuan

(Har. 37:17-24)

31“Baen ma sada parlampuan sian sere. Jongjonganna dohot sitiopanna i angkon sian sere tompoan do baenonmunu; bunga-bunga parhiasanna, masuk ma disi lampusungna dohot bulung ni bungana i angkon laing sada dohot jongjonganna i dohot sitiopanna i. 32Baen ma mardangka onom sitiopanna i tolu be angkup bariba. 33Ganop dangkana na onom i, dibaen ma hiasanna songon bunga ni jambu na marlampusung dohot bunga na kombang. 34Di tiang ni parlampuan i angkon adong opat kelopak songon bunga ni jambu na marlampusung dohot bunga na kombang. 35Di toru ni ganop angka dangkana na tolu i adong ma sada lampusung. 36Angka lampusungna i, dangkana i sude dohot jongjonganna i sian sere na polin, na himpal, na nipatompohon. 37Baen ma pitu lampu di parlampuan i, adop ginjang ma baen sude anso marsinondang tu jolo. 38Pangkoisna dohot talamna, laing sian sere na polin ma baen. 39Angkon adong ma tolu pulu lima kilo borat ni sere hum mambaen parlampuan i dohot angka parkokasna. 40Jagohon ma anso laing tudosan ni parlampuan na Hupatidahon na di ginjang dolok i tu ho pambaenna.”

Currently Selected:

HARURUAR 25: LAIAKB

Highlight

Copy