HARURUAR 24

Pahotkon parjanjian

1Dung i didok Tuhan ma tu si Musa, “Nangkok ma hamu mandapotkon Au, ho rap dohot si Harun, si Nadab dohot si Abihu dohot pamimpin ni halak Israel na pitu pulu halak i. Jadi dompak dao dope hamu sian on, angkon marsomba do hamu. 2Sahalak pe nada tola padonok-donokkon tu Au asing sian ho sandiri. Tapi anggo halak na bahat i, hum manganangkohi dolok i pe nada tola.”

3Jadi kehe ma si Musa jana dipabotohon ia ma tu bangso i sude parenta dohot aturan na nilehen ni Tuhan i. Rap mangalusi ma rayat i sanoli mandok, “Patulusonnami ma sude na nidok ni Tuhan i.” 4Disuratkon si Musa ma sude parenta ni Tuhan i. Ancogotna i andos torang dope, dipajongjong ia ma langgatan di pat ni dolok i na nibaennia sian dua bolas batu; ganop batu ma mangwakili ganop marga ni Israel na dua bolas i. 5Dung i disuru si Musa ma angka doli-doli jana dipasahat halahi ma haul na nitutung tu Tuhan jana disambol halahi ma angka lombu songon haul pardonganan. 6Dibuat si Musa ma satonga sian mudar ni pahan-pahanan i jana dibaen ia ma i tu mangkuk-mangkuk. Deba nari dipispiskon ia ma tu ginjang ni langgatan i. 7Dung i dibuat si Musa ma buku parjanjian panyuratan ni angka parenta ni Tuhan i, jana disise ia ma i gogo di jolo ni bangso i. Didok halahi ma, “Oloannami ma Tuhan i, jana patulusonnami ma sandok na niparentahonNia.”

8Jadi dibuat si Musa muse ma mudar na di mangkuk-mangkuk i jana dipispiskon ia ma i tu rayat i. Ning ia ma, “Mudar on ma tanda ni parjanjian ni Tuhan dohot hamu di na nilehenNia angka parentaNia on.”

9Dung i manangkok ma si Musa, si Harun, si Nadab, si Abihu dohot pamimpin ni halak Israel na pitu pulu halak i tu dolok i, 10disi ma diida halahi Debata ni halak Israel i. Sidegean ni patNa i tarsongon lante na sian batu nilam, rata langit idaon. 11Nada mate dibaen Debata angka pamimpin ni halak Israel i haru pe na dung diida halahi Debata. Dung i rap mangan ma halahi jana rap minum.

Si Musa di Dolok Sinai

12Dung i ninna Tuhan i ma tu si Musa, “Dapotkon ma Au tu dolok on dompak dison ho, anso Hulehen tu ho dua batu parningotan na marisi sude uhum na Husurat songon pangajaran di bangso i.” 13Jadi markobas ma si Musa dohot si Josua pangurupinia i laho manangkok#24:13 Manangkok ma si Musa ... di sada terjemahan na honok tarsurat: Manangkok ma halahi ... tu dolok na badia i. 14Didok si Musa ma tu angka pamimpin ni halak Israel i, “Painte hamu ma di inganan parbandaran on lopus mulak hami. Dison do si Harun dohot si Hur donganmunu. Sanga ise na adong parsoalanna, mangadop ma tu halahi anso adong hasidunganna.”

15Jadi manangkok ma si Musa tu Dolok Sinai i, ro muse ma ombun manggupgupisa. 16-17Mijur muse ma sinondang na manyirlak sian hamianan ni Tuhan tu ginjang ni dolok i. Songon api na gara do diida halak Israel sinondang i di ginjang dolok i. Ditutupi ombun do dolok i onom ari lolotna. Di ari papituhon, pio-pio ma Tuhan sian ombun i tu si Musa. 18Jadi torus ma si Musa manangkok lopus masuk ia tu bagasan ombun i. Disi ma ia opat pulu ari opat pulu borngin honokna.

Currently Selected:

HARURUAR 24: LAIAKB

Highlight

Copy