HARURUAR 21

Sibaenon tu hatobanniba

(Pang. 15:12-18)

1Jadi didok Tuhan ma tu si Musa, “Pasahat ma tu halak Israel angka aturan on: 2Muda adong sian hamu na manobusi hatoban halak Ibrani, parhatoban hamu ma i onom taon honokna. Di taon papituhon angkon paluaonmunu ma ia so pola margarar sanga na aha. 3Sugari rupani laing na poso ia di na mamungka gabe hatoban, nada tola obanonnia daborunia i di na malua i ia. Tapi muda na dung marripe hian do ia di na mamungka gabe hatoban, tola ma boanonnia daborunia i. 4Muda dipabagas tuanna i do ia jana adong dakdanaknia, anggo dadaborunia dohot dakdanaknia i, nampuna ni tuanna i do i, jana sasada ia do kehe muda dung dapot hatihana malua ia. 5Tapi sugari sura didok hatoban i na holong rohania di tuannia i dohot di dadaborunia maradu tu dakdanaknia jana nada ra ia dipalua, 6jadi angkon obanon ni tuanna i do ia tu inganan paribadatan. Dung lalu disi, angkon suruon ni tuanna i ma ia jongjong markusande di pintu sanga di tiang ni pintu ni inganan paribadatan i jana ditura ia ma pinggolna i. Gabe hatobannia noma i salolot mangolu.

7Muda adong sanga na ise na manggadis boruna gabe hatoban, nada paluaon i haru pe na dung onom taon, songon na masa tu hatoban halaklahi. 8Muda nigadis i tu sada bayo na ra mamakesa gabe ripena, hape nada ringkot roha ni bayo i mida anak boru i, jadi angkon tu amangna i do gadisonnia mangulahi. Nada tola gadison ni bayo i anak boru sinangkinan i tu halak na asing, harana madung dibaen bayo i na so adil tu anak boru i. 9Muda nitobusan sada hatoban dadaboru baen di anakniba, angkon songon dakdanakniba sandiri do baenon tu hatoban i. 10Muda marsidua-dua do tuanna i, angkon laing songon na somal do lehenonnia bahat ni balanjo dohot pakean maradu sude hakna tu ripena na parjolo i. 11Anggo inda digohi ia na patut sipatupaonnia on, angkon paluaonnia do daborunia parjolo i, nada pola manjagit hepeng partobus.”

Aturan taringot tu tindakan na koras

12“Sanga ise na mamukuli halak jana mate, angkon mate niuhum. 13Tapi anggo so na nisangajona do na mamukul i jana nada adong hian maksudna mamatehonsa, tola do lari tu sada inganan sipaboaonKu tu ho, jana disi ma ia anso malua. 14Tapi muda adong sanga ise na mangamuk jana na sangajo mamunu halak na asing, angkon nimatehon do i, haru pe na dung lari ia tu langgatanKu laho palua dirina.

15Sanga ise na mamukul amangna sanga inangna, angkon mate niuhuman.

16Sanga ise na manangkup halak, anso gadisonna sanga parhatobanonna, angkon mate niuhuman.

17Sanga ise na mamurai amangna sanga inangna angkon mate niuhuman.

18Muda adong na marbada, didanggur na sada ma alona i dohot batu sanga ditenjusa, tapi nada dibunu ia, nada uhumon halakna i. Tapi muda tinggang halak na hona pukul i, 19hape tarbaen ia dope jongjong dohot mardalan mangulahi mamake tungkot, nada pola uhuman na mamukul i, tapi angkon lehenon na harugian ni na hona pukul i salolot so lobas ia karejo dohot pasiubatna lopus malum.

20Sanga ise na mamukul hatobanna halaklahi sanga dadaboru jabat manigor mate satongkin i, angkon niuhuman do halakna i. 21Tapi anggo na so mate dope hatoban na nipukulna i di bagasan sadari sanga dua ari, nada siuhumon tuanna i. Hararuginia hara ni na agoan ia di sinadongannia tuk ma i songon uhuman tusia.

22Muda adong halak na marbadai, jana tartondong sada halak ma ina-ina na denggan pamatangna gabe haambungan ia, tapi nada pola adong na asing na hancitnia; angkon gararan ni na manondong i do dangdangna sanga sadia dituntut halaklahi ni dadaboru i dung jolo satuju angka hakim. 23Tapi sugari rupani mabugang ina-ina i, gabe hosa ma gonti ni hosa uhumanna, 24mata gonti ni mata, ipon gonti ni ipon, tangan gonti ni tangan, pat gonti ni pat, 25tihas gonti ni tihas, bugang gonti ni na mabugang, marbosar gonti ni na marbosar.

26Sanga ise na mamukul mata ni hatobanna, halaklahi sanga dadaboru, jabat gabe mapitung mata ni hatobanna i, angkon paluaonna noma hatobanna i songon dangdang ni matana i. 27Muda adong sanga ise na mangaropang ipon ni hatobanna, angkon malua noma hatobanna i songon dangdang ni iponna i.”

Tanggung jawab parnampunaon

28“Muda adong lombu jantan mandogo-dogo halak, gabe mate na hona dogo i, angkon nidangguran lombu i dohot batu lopus mate, jana nada tola panganon juhutna i, tapi anggo nampuna lombu i nada pola uhuman. 29Tapi umpamana, na somal mandogo-dogo jolma do giot ni sada lombu jantan. Madung dipaingot nampunasa i, hape laing nada dihandangkon ia lombunia i. Jadi ampot didogo-dogo lombu i halak lopus mate, angkon nidangguran do lombu i dohot batu lopus mate dohot nampunasa i pe angkon laing dohot mate niuhuman. 30Tapi tola do nampuna lombu i mangalehen dangdang songon tobus ni hosania, tapi angkon gararonnia ma sanga sadia bahat ni hepeng na nituntut tusia. 31Muda mate dakdanak halaklahi sanga dadaboru didogo-dogo lombu jantan i, laing mardalan ma aturan sinangkinan i. 32Muda mate didogo-dogo lombu jantan i hatoban halaklahi sanga dadaboru, angkon gararon ni nampuna lombu i ma tolu pulu hepeng perak tu nampuna hatoban i, jana lombu i pe angkon nidangguran dohot batu lopus mate.

33Sanga ise na mambuat tutup ni sada sumur, sanga na mangkuar sumur hape nada dibaen ia tutupna, gabe madabu lombu jantan sanga halode tu bagasan sumur i, 34angkon dangdangan ni nampuna sumur i do pahan-pahanan na madabu i. Lehenonna ma hepeng dangdang i tu nampuna pahan-pahanan i jana tola do tahanonnia pahan-pahanan na dung mate i. 35Muda adong lombu jantan ni sada-sada halak mandogo lombu jantan ni halak na asing gabe mate, angkon gadison ni halahi na dua do lombu na mamatehon i, jana hepengna i dibagi dua halahi. Juhut ni lombu na mate i pe angkon bagi duaon ni halahi. 36Tapi anggo na dung tarboto hian do na somal mandogo lombu i, hape nada dihandangkon nampuna i, angkon gararonnia do dangdangna sada lombu jantan na mangolu jana tola disia lombu na mate i.”

Currently Selected:

HARURUAR 21: LAIAKB

Highlight

Copy