HARURUAR 20

Tona na sampulu

(Pang. 5:1-21)

1Dung i didok Debata ma songon on, 2“Au do Tuhan Debatamu, na maroban ho ruar sian tano Mesir, sian tano parhatobanan i.

3Ulang adong di ho debata na asing di jolongKu.

4Ulang baen di ho patung na manyarupai sanga aha pe na adong di langit di ginjang sanga na adong di tano on bope na adong di aek na di toru ni tano. 5Ulang unduk marsomba tusia sanga maribadat tusia, angke Au, Tuhan, Debatamu, i ma Debata na so ra padiarkon adong imbangKu. UhumanKu do sanga ise na margoyak ni roha di Au lopus tu sundut patoluhon dohot paopatkon. 6Tapi patidahononKu do holong ni rohangKu maradopkon marribu-ribu halak; i ma na mangkaholongi Au jana na mangoloi parentangKu.

7Ulang dokkon goar ni Tuhan Debatamu, di na so dalanna, dibaen uhumon ni Tuhan do halak na mandok goarNia di na so dalanna.

8Ingot ma Ari Sabat, anso diparbadiai ho ari i. 9Onom ari ma lolotmu mangkarejohon sude karejomu, 10tapi ari papituhon, i ma Ari Sabat ni Tuhan, Debatamu. Nada jadi mangkarejohon nasa karejo di na sadari i, bope ho, bope anakmu, bope borumu, bope naposomu halaklahi, bope naposomu dadaboru, bope pahan-pahananmu, bope halak na mardagang di hutamu. 11Dibaen di bagasan onom ari do lolotna ditompa Tuhan langit dohot tano, laut dohot nasa isina, jana maradian do Ia di ari papituhon i. Hara ni i ma dibaen dipasupasu Tuhan Ari Sabat i jana diparbadiai.

12Pasangap ma amangmu dohot inangmu, anso ginjang umurmu di tano na nilehen ni Tuhan Debatamu di ho.

13Ulang mamunu.

14Ulang markarosuan.

15Ulang manangko.

16Ulang gabe saksi pargabus maradopkon dongan.

17Ulang impol rohamu di bagas ni donganmu jolma; ulang impol rohamu di dadaborunia, bope naposona bope lombuna bope halodena, bope di sanga aha nampuna ni donganmu jolma.”

Mabiar halak Israel

(Pang. 5:22-33)

18Disi dibege angka jolma i ronggur dohot sora ni sarune i jana diida halahi dohot hilap bope dolok na martimus i, humitir ma halahi mabiar jana mandao ma halahi jongjong. 19Didok halahi ma tu si Musa, “Ho sajo ma mandok hata tu hami, hami bege pe; tapi ulang ma Debata na mandok hata tu hami, naron gabe mate hami.”

20Didok si Musa ma, “Ulang mabiar hamu, na giot mancubo rohamunu sajo do dibaen na ro Debata, anso tongtong mangoloi hamu tuSia jana ulang mardosa hamu.” 21Tapi anggo angka jolma i laing mandao-dao do jongjong, jana hum sasada si Musa sajo do na mandonohi ombun na golap i di inganan parmianan ni Debata.

Aturan taringot tu langgatan

22Diparentahon Tuhan ma tu si Musa anso dipaboa ia tu bangso Israel, “Madung diida hamu sanga songon dia, Au Tuhan, Au na mandok hata tu hamu sian banua ginjang. 23Ulang baen-baen hamu angka debata di hamu sian perak sanga sere gabe sisombaonmunu tamba ni Au. 24Baen hamu ma di Au sada langgatan sian tano jana pasahat hamu ma tu Au biri-biri dohot pahan-pahananmunu gabe haul situtungon dohot haul haluaan. Di ganop inganan paribadatanmunu tu Au na dung Hutontuhon, tusi ma Au ro mandapotkon hamu jana disi ma Hupasupasu hamu. 25Muda sian batu do baenonmunu langgatan di Au, ulang ma baen hamu batu na dituhil, harana anggo dipake hamu do tuhil laho mambola batu i, nada patut be pakeon di Au langgatan i. 26Ulang baen hamu langgatan na gincat na jabat martangga laho manaeksa, anso ulang haidaan goar-goaran ni pamatangmu na pantang idaon.”

Currently Selected:

HARURUAR 20: LAIAKB

Highlight

Copy