PANGARATAION 6

Parenta Na Gumodang

1“Tuhan Debatamunu i do marsuru au mangajarkon sude aturan on tu hamu. Oloi hamu ma sudena i di tano na giot siingananmunu di na so pola lolot be. 2Salolot mangolu hamu dohot pomparanmunu sai habiari hamu ma Tuhan Debatamunu jana oloi hamu ma sude aturanNa na giot silehenonku tu hamu, anso ginjang umurmunu di tano i. 3Hamu angka dongan sabangso, parrohahon hamu ma angka aturan i jana oloi hamu ma i, anso sonang hamu jana gabe bangso na godang di tano na mora boti na napu i, laing songon na dung dijanjihon Tuhan Debata ni ompunta i.

4Ingot hamu ma, angka dongan! Hum Tuhan, jana Tuhan sajo do Debatanta! 5Haholongi ma Tuhan Debatamu sian sude rohamu, sian sude tondimu dohot sian sude gogomu. 6Angka parenta na hulehen tu hamu sadari on, ulang jabat dihalupahon hamu i. 7Ajarkon hamu ma i tu angka dakdanakmunu. Hobar-hobari hamu ma i di bagasan bagasmunu dohot di ruar ni bagas, di na maradian dohot di na markarejo. 8Tambatkon ma i di tanganmu jana lilitkon di bohimu baen sipaingot-ingoton. 9Suratkon ma i di tiang ni pintu ni bagasmu dohot di pintu ni horbanganmu.”

Sipaingot anso ulang dilanggar parenta i

10“Na dung dijanjihon Tuhan Debatamu do tu ompumu si Abraham, si Ishak dohot si Jakob laho mangalehen tu ho sada luat rap dohot angka kota na godang jana na jeges, jana nada ho na pajongjongkonsa. 11Gok angka barang-barang na denggan angka bagasna i, jana nada ho na pamasukkonsa. Dapotonmu ma angka sumur, jana nada ho na mangkuarsa, angka kobun anggur dohot zetun, jana nada ho na manyuansa. Muda dioban Tuhan ho tu luat i, jana gabe butong ho, 12denggan ma jagohon hamu anso ulang jabat lupa ho tu Tuhan na dung paluahon ho sian Mesir, ingananmu diparhatoban. 13Habiari ma Tuhan Debatamu jana mangoloi tuSia sajo ma ho jana janjimu pe di bagasan goarNia sajo ma baen. 14Ulang oloi debata na asing, sanga debata ni angka bangso na humaliang ho. 15Muda disomba ho angka debata na asing, gabe dondonan ni rimas ni Tuhan ma hamu songon api, jana abis ma ho pusaonna, angke nada ra Tuhan Debatamu na maringanan di tonga-tongamunu i marimbang.

16Ulang uji hamu Tuhan Debatamunu i songon na dung dibaen ho di Masa. 17Oloi hamu ma sude aturan na dilehen ni Tuhan tu ho. 18Sanga aha na denggan dohot na tutu di Tuhan, i ma baen, jadi gabe sonang ma ho. Gabe hamu ma nampuna tano napu na dung dijanjihon Tuhan tu ompu na umpompar ho, 19jana paorotonmu ma angka musumu songon na nijanjihon ni Tuhan i.

20Di pudian ni ari sapa-sapa ma angka dakdanakmu tu ho, ‘Biasi disuru Tuhan Debatanta hita mangoloi sude angka aturan on?’ 21Jadi angkon alusanmu ma songon on, ‘Na jolo gabe hatoban ni halak Mesir do hita, dung i dipalua Tuhan ma hita mardongan hagogoon na godang. 22Taida sandiri do Tuhan mambaen angka hahomangan dohot angka pangalaho na godang-godang maradopkon halak Mesir dohot raja ni halahi maradu sude menterina. 23Dipalua Ia do hita sian Mesir laho maroban hita tuson jana mangalehen tano on tu hita songon na dung dijanjihonNia tu ompunta i. 24Disuru Tuhan Debatanta do hita mangoloi angka aturan i, giotNia anso tapasangap Ia. Muda tabaen na songon i, gabe tongtong ma sarihononNia bangsonta anso tongtong sonang. 25Muda tahaburjuhon do mangoloi sasude na niparentahon ni Debata i tu hita, gabe jop ma rohaNia tu hita.’ ”

Currently Selected:

PANGARATAION 6: LAIAKB

Highlight

Copy

Compare