PANGARATAION 26

Haul sian suha ni ladang

1“Muda dung dibuat hamu tano na giot silehenon ni Tuhan i tu hamu, jana dung maringanan hamu disi, 2angkon ganop be do hamu paindingkon patumonaan ni suha na dapot hamu tu bagasan sada ampang, lalu oban hamu ma i tu inganan paribadatan na sada i na dung ditontuhon humani. 3Dapotkon hamu ma malim na markarejo di hatiha i, jana dokkon ma tu malim i, ‘Na patorangkon ma au tu Tuhan Debatangku paboa na dung masuk do au tu tano na nijanjihonNa i tu ompunta silehenonNa di hita.’

4Dung i jagiton ni malim i ma ampang i sian tanganmunu jana baenonna ma i tu jolo ni langgatan ni Tuhan Debatamunu. 5Dung i di adopan ni Tuhan angkon pajojoronmu do hata on: ‘Halak Aram na mimbarimbar do daompung, sada halak na madang-adang na so adong bagas ingananna. Dioban ia do ripenia tu Mesir anso maringanan ia disi. Di na kehe i tusi, saotik do bilangan ni halahi, hape gabe bangso na godang do halahi jana na gogo. 6Na porsuk do pambaen ni halak Mesir tu hami jana dipaksa do hami markarejo songon hatoban. 7Dung i pio-pio ma hami mangido tolong tu Tuhan Debata ni ompunta i. Ditangihon Ia do pio-pionta i jana diida Ia do pardangolanta hasusaan dohot sitaononta i. 8Mardongan kuaso dohot hagogoonNia na sumurung i, dipalua Ia do hami sian Mesir. Dipatupa Ia angka tanda dohot hahomangan, jana dipamasa Ia angka na jorbut. 9Dung i dioban Ia ma hami tuson jana dilehen Ia tano na kayo boti na napu on di hami. 10Jadi hara ni i, saonnari huhaulkon ma tu Tuhan patumonaan ni pandapotanku na nilehenNia tu au.’

Dung i baen ma ampang i disi di adopan ni Tuhan, jana marsomba ma ho tuSia. 11Dokkon ma tarimakasi hara ni sude rasoki na nilehen ni Tuhan Debatamu di ho dohot di dongan sabagasmu. Laing piohon ma halak Levi dohot halak sileban na maringanan di tonga-tongamunu anso dohot di pesta i.

12Ganop di taon patoluhon angkon obanonmunu do haul parsampuluan – saparsampulu sian pandapotanmunu – di Malim Levi, halak sileban, dakdanak na so marama, dohot di angka na mabalu, anso di ganop kota dapotan halahi sandok na porlu di sipanganon. Muda dung dibaen hamu na songon i, 13dokkon hamu ma tu Tuhan, ‘Sian na saparsampulu pandapotan ni na hukarejohon na patut gabe nampuna ni Tuhan, saotik pe nada adong be tinggal di bagasku; madung hulehen sude di halak Levi, halak sileban dakdanak na so marama, dohot di angka na mabalu songon na diparentahon ni Tuhan tu au. Sada pe nada adong na hulanggar sian parenta ni Tuhan salaho tu parsampuluan i. 14Saotik pe sian haul parsampuluan i nada adong na hupangan di hatiha siluluton; sanga huoban tu ruar ni bagas dompak hodar au, jana saotik pe sian i nada adong na hulehen gabe pelean di halak na mate. Madung huoloi Ho, ale Tuhan; madung hupatulus sude na niparentahonMi taringot tu parsampuluan i. 15Sian ingananMu na badia i di banua ginjang, sai lomo ma rohaMu manatap dohot mamasumasu bangsoMu Israel, laing pasupasu muse ma tano na mora jana na napu na dung nilehenMu di hami, hombar tu janjiMi tu ompunami.’ ”

Bangso na nipili ni Tuhan

16“Sadari on diparentahon Tuhan Debatamunu do hamu laho mangoloi sude parentana on: Oloi hamu ma sudena i sian sandok rohamunu dohot sian sandok tondimunu. 17Di ari sadari on, madung dioku hamu Tuhan do Debatamunu. Madung dijanjihon hamu laho mangoloi tuSia dohot patuluskon sude aturan dohot parentaNia. 18Madung dijagit Tuhan hamu sadari on gabe bangsoNia sandiri, songon na nijanjihonNa i tu hamu, jana diparentahon Ia tu hamu anso oloanmunu sandok aturanNia i. 19Baenon ni Tuhan dope hamu gumodang sian sasude bangso na asing na dung dijadihon Ia, jana pujion boti pasangaponna hamu. Gabe bangso ni Tuhan ma hamu, laing songon na nijanjihonNa i.”

Currently Selected:

PANGARATAION 26: LAIAKB

Highlight

Copy

Compare