PANGARATAION 25

1Adong ma umpamana dua halak Israel na kehe tu pangadilan laho pauruskon sada parsalisian, gabe didok ma na so marsala na sada jana na sada nari i marsala. 2Muda hona balbal do uhuman na didabu tu na marsala i, disuru panguhum i ma ia manungkap anso disambok. Piga noli ia sambohon, marguru tu hajahatan na nibaennia ma i. 3Tola do opat pulu noli sambohon, tapi ulang be lobi. Muda lobi sian i, na pailahon halakna i noma i di jolo ni halak na bahat.

4Ulang huntam hamu baba ni lombu na nisurumu manarik gilingan gandum.”

Na patut sibaenon tu kahanggi na dung jumolo monding

5“Muda adong dua halak na martinadohon sainganan, jana mate ma sada halak, hape nada adong anaknia halaklahi, nada tola tading-tadinganna i marbagas dohot halak na asing di ruar ni na sabagas i. Na patut do buaton ni anggi ni na mate i na mabalu i. 6Anak siangkaan ni halahi etongon ma i gabe songon anak ni na jumolo monding i anso adong pomparannia di tonga-tonga ni bangso Israel. 7Tapi muda nada ra anggina i mambuat tading-tadingan ni mandiang i, angkon kehe do anak boru i tu harbangan ni kota paboahon tu angka hatobangon ni kota jana dokkononnia ma, ‘Nada ra anggi ni halaklahingku na jumolo i patupahon na patut baenonnia tu au. Digagai ia do laho mangalehen sada pomparan di tonga-tonga ni bangso Israel.’ 8Jadi angkon piohonon ni angka hatobangon ni kota i ma bayo i anso mangkobari dohot ia. Muda laing nada ra ia marripehon anak boru i, 9angkon padonohon ni tading-tadingan ni angkangnia ma tusia di jolo ni angka hatobangon ni kota i, sintahonna ma sada sandal ni bayo i, tijuranna bohina i jana dokkononna ma, ‘On ma sitaonon ni jolma na so ra mangalehen pomparan di kahanggina.’ 10Botoon ni halak ma na sabagas i di Israel gabe ‘Halak na dibuat sandalna sabariba.’ ”

Angka aturan na asing

11“Muda adong dua halaklahi na topet marbadai jana ro dadaboru ni na sada mangurupi halaklahina, dijomak ia na niabitan ni na sada nari i, 12ulang dibaen ibo ni roha tu dadaboru i; nigotapkon tanganna i.

13-14Ulang hamu mangicu di na mamake timbangan dohot ukuran. 15Timbangan dohot parsuhatan na pas ma pake hamu anso ginjang umurmunu di tano na giot silehenon ni Tuhan Debatamunu di hamu. 16Magigi do Tuhan tu angka jolma na sai tagi manipu.”

Parenta anso dibunu halak Amalek

17“Ingot hamu ma sanga na bia dibaen halak Amalek tu hamu di hatiha na haruar hamu sian Mesir. 18Nada dihabiari halahi Debata, jana gabe dialo halahi do hamu sian pudi, dompak hatiha loja boti abis gogo hamu, gabe dibunu halahi ma angka donganmunu na mardalan di pudi hara ni na so lobassa. 19Jadi hara ni i, muda dung dilehen Tuhan Debatamunu tano i tu hamu, jana dung aman hamu sian sasude musu na maringanan humaliang hamu, angkon bunuonmunu do sude halak Amalek i lopus nada ingoton ni sanga ise be halahi. Ulang hamu lupa disi!”

Currently Selected:

PANGARATAION 25: LAIAKB

Highlight

Copy

Compare