DANIEL 5

Mambaen pesta Raja Belsasar anak ni si Nebukadnesar

1Sanoli diontang Raja Belsasar ma saribu halak angka na godang-godang anso ro mandohoti pestania na marlobi-lobi, dohot na minum-minum anggur. 2Taran na minum-minum i halahi, diparentahon si Belsasar ma anso dipambuati angka mangkuk sere dohot perak na nirampas ni amangnia si Nebukadnesar sian bagasan Bagas Na Badia na di Jerusalem. Giot ni Raja Belsasar anso sian angka mangkuk i ma minum angka halak na godang-godang i, angka dadaboruna be, angka gundiknia dohot ia sandiri. 3Manigor dioban ma antong angka mangkuk i tusia, minum anggur ma halahi sudena sian panginuman i. 4Dipuji-puji halahi muse ma angka debata na nibaen sian sere, perak dohot tumbaga, bosi, hayu dohot batu.

5Laing di hatiha i tarida ma jari-jari ni jolma na manyuratkon sisuratonna di dingding ni bagas godang i, di inganan na tumorang hona sinondang ni lampu, gabe tangkas ma i diida raja i. 6Gabe rata lombam ma ia jana mabiar situtu jabat humitir totnia i. 7Mangarar ma ia lalu mangido anso dipiohon angka datu na malo manjujur, na malo marjampi-jampi dohot na umboto parhalaan. Dung ro halahi, didok raja i ma, “Sanga ise na malo mambasa suratan i dohot paboahon astuanna tu au, lehenonku ma pakean harajaan, i ma baju juba na bunga torung dohot borgok sere tanda ni hasangapon. Tamba ni i angkatonku ma ia gabe parkuaso na patoluhon di bagasan harajaanku.” 8Ro ma tu jolo angka na malo-malo i, tapi sada halak pe sian halahi nada adong na malo mambasa suratan i sanga paboahon astuanna tu raja i. 9Mur tamba biar muse ma roha niraja i jana mur langan; angka halak na godang-godang i pe nada dibotosa be sanga aha sibaenonna.

10Umbege pangangguk ni raja i dohot angka halak na godang-godang i, masuk ma inang ni raja i tu bagasan parpestaan i. Dung i didok ia ma, “Mangolu ma da raja i sapanjangna! Dipasonang raja i ma jolo roha ni raja i jana ulang pola langan. 11Angke adong do di harajaan ni raja i sada bayo na nirajaan ni angka tondi ni debata na badia. Taran amanta ni raja i mamarenta tarida do bahaso na tutu bayo i maniop hapistaran, parbinotoan dohot bisuk, tudos tu habisuhon ni angka debata. Amanta ni raja i Raja Nebukadnesar madung mangangkat bayo i gabe pamimpin ni angka na malo manjujur, na malo marjampi-jampi, angka halak na marilmu dohot angka na umboto parhalaan. 12Sun do malo ni bayo i dohot bisukna boti malo do ia patorangkon nipi, mambuka rahasia dohot pasidungkon angka soal-soal na maol. Si Daniel goarna, tapi anggo raja i mandok si Beltsasar do goarnia. Paboaonnia do tu raja i sanga aha astuan ni suratan on.”

Dipatorang si Daniel astuan ni suratan i

13Manigor ma si Daniel dioban mangadop tu jolo ni raja i. Jadi disapai raja i ma tusia, “Ho dehe si Daniel halak Jahudi na tarbuang na nioban ni damang sian tano Juda? 14Hubege dirajai angka tondi ni debata na badia do ho, jana adong do di ho hapistaran, parbinotoan dohot bisuk na sumurung. 15Madung diuji angka na malo dohot na umboto jampi mambasa surat on dohot paboahon astuanna tu au. Tapi nada malo halahi. 16On dope hubege paboa na malo ho mambuka sandok rahasia dohot pasidungkon angka soal-soal na maol. Muda malo ho mambasa surat on dohot paboahon astuanna tu au hulehen pe di ho pakean harajaan baju juba na bunga torung dohot borgok sere tanda ni hasangapan. Tamba ni i, huangkat pe ho gabe parkuaso na patoluhon di bagasan harajaanku.” 17Dialusi si Daniel ma: “Nada pola porlu lehenon ni raja i di au angka silehen-lehen i, tu halak na asing ma i dilehen raja i. Hubasa pe suratan i di raja i jana hupaboa pe dohot astuanna.

18Dibaen Debata Na Gumincat i do si Nebukadnesar simatobang ni raja i gabe raja bolon jana dilehen tusia hagodangan bope habonggalan. 19Songon i ma antong godangnia, jabat do angka jolma sian sandok bangso, marga ni bangso dohot hata na marragam-ragam, humitir jana mabiar tusia. Muda por rohania mamunu jolma, dibunu ia sajo do halakna i. Dipasangap sanga dipalayas ia do sanga na ise sajo giot ni rohania. 20Tapi dung ginjang rohania, jogal rohana jana jingar, didabuhon do ia sian harajaannia jabat mago dohot hagodangannia. 21Dipaorot do ia sian parngoluon ni jolma manusia jana pikirannia pe gabe songon pikiran ni binatang. Halode harangan noma dongannia mangolu, manjampal ruput songon lombu jana modom di na tardas so marsiholip maradopkon ombun. Ujungna dioku ia ma na markuaso do hape Debata Na Gumincat i maradopkon harajaan ni jolma jana dilehen Ia harajaan i sanga na tu ise sajo na nitodoNia.

22Hape anggo anaknia, i ma raja i sandiri, nada ra patoruk roha, haru pe nian diboto raja i do sudena i. 23Padorgak diri do raja i maradopkon Na Markuaso di banua ginjang i jana puluk do raja i marsuru maroban masuk angka mangkuk na hona rampas sian Bagas Na Badia i. Dung i minum anggur ma raja i, angka na sangap, angka dadaboruna be songon i dohot angka gundik ni raja i sian mangkuk na ni rampas i. Dipuji-puji raja i do angka debata na dibaen sian sere, perak, tumbaga, bosi, hayu dohot batu, i ma angka debata na so marnida sanga marbinege sanga mangastui bagi aha. Nada dipasangap raja i Debata na manontuhon ngolu dohot hamamate ni raja i dohot na manontuhon pardalanan ni ngolu ni raja i. 24Patunda ni i ma da umbaen na ditongos Debata tangan i laho manyuratkon tona i.

25On ma tona i, ‘Mene, mene, tekel, ufarsin.’ 26Jana on ma astuanna: Mene; astuanna madung dietong Debata sanga sadia honokna mamarenta raja i jana madung dipaujung Ia. 27Tekel; astuanna madung ditimbang raja i jana dapot ma na panayangtu. 28Peres; astuanna; madung dibagi harajaan ni raja i jana dipasahat tu halak Media dohot Persia.”#5:28 PERSIA: Di hata Aram, mandok Persia sarupa pandokna dohot hata “dibagi”.

29Manigor diparentahon si Belsasar ma angka pagawenia anso dipapakehon tu si Daniel baju juba na bunga torung jana dibaen borgok sere tu rungkungnia. Jadi diangkat ia ma si Daniel gabe parkuaso na patoluhon di bagasan harajaannia i. 30Laing di borngin i, hona bunu ma si Belsasar raja ni Babel i.

Currently Selected:

DANIEL 5: LAIAKB

Highlight

Copy

Compare