DANIEL 4

Marnipi si Nebukadnesar padua nolihon

1On ma boa-boa ni Raja Nebukadnesar na nitongosnia tu jolma sian sandok bangso, marga ni bangso dohot hata na marragam-ragam di sude portibi on:

“Mur martamba-tamba ma hadameon di hamu! 2Por do rohangku paboahon tu hamu taringot tu tanda dohot hahomangan na nipatupa ni Debata Na Gumincat i tu au.

3Halongangan situtu ma da tanda na nibaenNia!

Hahomangan godang do di roha na nipatupaNia!

Mamarenta salolot-lolotna do Debata!

Markuaso do Ia sapanjangna.”

4Sonang do au mangingani bagas godangku jana ngolungku marlobi-lobi. 5Tapi di sada borngin taran modom au, marnipi ma au jana manjagit parnidaan na mambaen rohangku marsak situtu. 6Jadi hupio ma angka halak na malo na adong di Babel laho patorangkon tu au astuan ni nipingki. 7Tapi di na ro angka partondung, na malo manjampi, angka halak Kasdim dohot angka halak na umboto parhalaan jana hupaboa nipingki tu halahi, sahalak pe nada adong na malo patorangkon astuanna. 8Ujungna ro ma si Daniel na nigoaran muse si Beltsasar songon goar ni debata na husomba i. Dirajai tondi ni angka debata na badia i ma si Daniel. Hupaboa muse ma nipingki tusia, 9“Ale Beltsasar, pamimpin ni angka halak na marilmu, huboto do na nirajaan ni tondi ni angka debata na badia ho, jadi nada adong rahasia na buni di ho. Tangihon ma nipingkon jana patorang ma astuanna.

10Jadi taran modom au huida ma sada hayu na gincat situtu na tubu di tonga-tonga ni portibi on. 11Na lobi gincat hayu i; bonana pe godang jana tohong. Lalu tu langit puncutna i, jabat tarida di sude jolma na satano on. 12Mangarata angka bulungna i, batuna pe ramos sajo, jabat tuk baen panganon ni jolma na satano on. Marmodoman angka binatang harangan di toruna i jana angka unggas pe marasari do di angka dangkana i. Jana sandok na mangolu dapotan sipanganon do sian ia.

13Taran mamikiri parnidaan i au, huida ma sada surusuruan mijur sian banua ginjang; idaon songon na hobas do ia jana manat-manat. 14Gogo ma sorania mangkuling mandok, ‘Taba ma hayu i jana tultuli ma angka dangkana, rurus ma bulungna i jana sarsarkon batuna i. Paorot ma angka binatang na marmodoman di toruna i dohot angka unggas na marasari di dangka-dangkana i. 15Tapi anggo tungkona i padiar ma laing di bagasan tano i. Tambat ma dohot rante bosi dohot tumbaga, jana tadingkon ma i di padang-padang dihuliangi angka ruput na rata. Padiar ma i hona ombun jana mangolu rap dohot angka binatang dohot suan-suanan. 16Padiar ma muba rohana sian roha jolma gabe roha ni binatang pitu taon honokna. 17I ma haputusannami angka surusuruan na hobas jana na manat-manat. On do maksudnami: Anso dioku angka jolma sanga na di dia pe, na markuaso do Na Gumincat i maradopkon harajaan ni jolma dohot mangalehen harajaan i sanga tu ise pe na nitodoNia, bope tu halahi na umbile situtu pe!’

18I ma da nipingki, ale Beltsasar. Saonnari paboa ma astuanna tu au. Sahalak pe sian angka halak na malo na adong di harajaankon nada malo paboahon tu au, hape anggo ho tarbaen ho do, dibaen dirajai tondi ni angka debata na badia do ho.”

Dipatorang si Daniel astuan ni nipi i

19Umbege i, tarsonggot jana longang ma sangombas si Daniel na nigoaran muse si Beltsasar. Jadi au Raja Nebukadnesar, hudok ma tusia, “Beltsasar, ulang pola susa rohamu hara ni nipi i dohot astuanna.”

Dialusi si Beltsasar ma, “Rajanami, denggan ma i sugari nian tu angka musu ni raja i ma masa angka na tarjadi na nipaboa ni nipi i jana ulang ma nian tu raja i. 20Songon i ma gincat ni hayu na niida ni raja i jabat lalu tu langit puncuna i jana bolas idaon ni jolma na satano on. 21Mangarata angka bulungna jana batuna pe ramos jabat tuk mangalehen panganon ni sude jolma na satano on. Marsilaung di toruna angka binatang harangan jana angka unggas pe marasari di dangka-dangkana i. 22O rajanami, raja i ma da hayu na gincat i. Sai martamba do hagodangan ni raja i lalu tu langit jana mabidang do kuaso ni raja i lopus tu ujung ni tano on. 23Diida raja i muse do sada surusuruan mijur sian banua ginjang na mandok, ‘Taba ma hayu on jana pamate, tapi padiar ma tungkona i tinggal di tano i. Tambat ma i dohot rante bosi dohot tumbaga lalu tadingkon ma di padang-padang dihuliangi angka ruput na rata. Padiar ma hona ombun ia jana mangolu rap dohot angka binatang pitu taon honokna.’

24Ale rajanami, on do astuan ni parnidaan i jana on ma na niputuskon ni Na Gumincat i taringot tu ari pangapudian ni raja i. 25Paoroton ma raja i sian tonga-tonga ni parngoluon ni jolma, jana mangolu di tonga-tonga ni angka binatang noma di padang. Pitu taon honokna sai mangan ruput raja i songon lombu jana modom di tano lapang na so martarup, gabe marombun-ombun. Dung salpu i, okuon ni raja i ma paboa na markuaso do Na Gumincat i di ginjang ni harajaan ni jolma, jana dilehen Ia harajaan i tu sanga ise sajo na nitodo ni rohaNia. 26Diparentahon surusuruan i do anso dipadiar tungko ni hayu i tinggal di bagasan tano i. Astuan ni i mandok gabe raja do mangulahi raja i dung dioku raja i, na guru di Debata do sude portibi on. 27Hara ni i, denggan ma diihutkon raja i sipaingotku. Ulang be sai mardosa raja i, tapi dipatulus raja i ma na denggan dohot na tigor, jana ibo ma roha ni raja i mida halak na pogos. Jadi muda songon i, sai tongtong ma martua raja i.”

28Tarjadi ma sudena i tu Raja Nebukadnesar. 29Dung dua bolas bulan muse, taran mardalan-dalan ia di kobun-kobun di tingkat parginjang ni bagas godang di Babel, 30didok ia ma, “Ligi da, na jeges ma antong kota Babel! Au ma da na mambangun i gabe kota sabungan ni negara laho patandahon kuaso ni hagogoonku, hagodangan dohot habonggalonku!”

31Nada abis dope ia mangkuling di na nibegenia sora sian langit mandok, “Tangihon ma on ale Raja Nebukadnesar! Madung dibuat sian ho kuasomu songon raja. 32Paoroton ma ho sian parngoluon ni jolma, jana mangolu di padang-padang ma ho songon angka binatang. Pitu taon honokna mangan ruput noma ho songon lombu. Dung salpu i okuonmu ma na markuaso do Na Gumincat i maradopkon harajaan ni jolma jana dilehen Ia harajaan i sanga na tu ise sajo na nitodoNia.”

33Laing di hatiha i, manigor tarjadi ma na nidok ni hata i. Hona usir ma si Nebukadnesar sian parngoluon ni jolma jana manjampal noma songon lombu. Hona ombun ma pamatangna, obukna songon ginjang ni imbulu ni halihi jana sisilonna songon ginjang ni sisilon ni unggas.

Dipuji si Nebukadnesar Debata

34“Dung salpu hatiha sipitu taon i, hupadorgak ma tu langit gabe sumuang ma torang rohangku. Jadi hupuji ma Na Gumincat i. Hupasangap jana hupagodang ma na Tongtong Mangolu i,

Mamarenta noma Debata salolot-lolotna.

Markuaso do Ia sapanjangna.

35Nada adong astuan ni bangso na di portibi on.

Dirajai Debata do surusuruan na di banua ginjang dohot jolma na di tano on.

Sahalak pe nada adong tarbaen mangalo hagiotNia,

nada adong na puluk manyapai sanga aha na nibaenNia.

36Dung sumuang torang rohangku, gabe dipaulak ma tu au hagodangan, habonggalan dohot barita ni goarku. Disambut angka pagawe dohot angka na marpangkat au jana dipaulak ma tu harajaanku, mur tu godangna noma tehe sian na salpu.

37Jadi au saonnari, au si Nebukadnesar mamuji, pagincatkon dohot pasangapkon Raja Ni Banua Ginjang. Tutu jana tigor do sude pambaenanNa jana bisa do Ia patorukkon halak na ginjang marroha.”

Currently Selected:

DANIEL 4: LAIAKB

Highlight

Copy

Compare