AMOS 8

Parnidaan taringot tu karanjang ni batu ni hayu

1Dapotan parnidaan muse ma au sada nari sian Tuhan Debata i. Huida ma sada karanjang na marisi parbatu na malamun. 2Disapai Tuhan ma, “Aha do diida ho Amos?”

Jadi hualusi ma, “Sada karanjang na marisi parbatu do.”

Didok Tuhan ma, “Madung dapot hatihana marujung ngolu#8:2 NGOLU: Di hata Ibrani, sarupa do pandok ni hata “ajal” dohot “parbatu” ni Israel. Nada ubaonKu be sangkapKu laho manguhum halahi. 3Gabe partangisan noma angka ende-ende na di bagas godang anggo di ari i. Marragean angka bangke sap ro di dia, angka na diambungkon sip-sip.”

Hona uhum Israel

4Tangihon ma, hamu angka na mandege-dege halak na pogos, jana na mangagohon halak na dangol di luat on. 5Didok hamu tu dirimunu sandiri, “Na lolot ma so sidung ari pesta. Sai giot gadisonta tibu angka gandumta, hape laing so marnasidung do pesta i. Andigan dope sidung Ari Sabat, anso tarbaen mangulahi marjagal? Ma por rohanta mangakal-akali, mangicu dohot parsuhatan, jana mambuat dohot timbangan. 6Gandum na sego pe targadis hita do arga. Tajalahi halak na pogos na so sanggup manggarar utangna haru pe nian hum saarga ni sapasang solop, jana tatobusi ia gabe hatobanta.”

7Disumpahon Tuhan do marhite hagogodang ni si Jakob, “Nada Hulupahon salolot ni lolotna sude na dikarejohon ni halahi! 8Nada he humutur ma tano on hara ni i, jana sude rayat marsiluluton? Nada he humuntal ma sude na i songon Batang aek Nil, dipartunggalbalikkon jana surut songon Batang aek Mesir?” 9Dapot do i hatihana baenonKu bonom mataniari jana manggolap tano on taran arian. Au Tuhan Debata madung mandok songon i. 10PaubaonKu ma angka ari pestamunu gabe siluluton, jana angka ende-endemunu gabe andung. BaenonKu ma hamu marcukur obuk dohot mamake abit goni tanda ni arsak. Gabe songon na tobang-tobang na manangisi parmate ni anakna sisada-sada ma hamu. Marujung ma ari i di bagasan arsak na lobi godang.

11Didok Tuhan Debata i ma, “Dapot do i hatihana paroonKu haleon potir tu luat on. Malean ma jolma, tapi nada malean di sipanganon. Manguas ma jolma tapi nada manguas di siinumon. Malean dohot manguas di tonangKu do halahi. 12Mado-ado ma halak sian Utara tu Selatan dohot sian Habincaran tu Hasundutan anso dapotsa nian tonangKu tapi nada dapot halahi be i. 13Pingsan ma angka doli-doli di hatiha i hara ni na manguas. 14Angka jolma na marsumpa mangasahon gana-ganaan ni Samaria na mandok, ‘Mangasahon goar ni debata ni bangso Dan’, sanga, ‘Mangasahon debata ni Berseba’ – tinggang noma i jana nada tarsunggul-tarsunggul be.”

Currently Selected:

AMOS 8: LAIAKB

Highlight

Copy

Compare