AMOS 7
7
PARNIDAAN SALAHO TU TONA NA SIAN Tuhan
Siapor
1On ma na dipatidahon ni Tuhan Debata tu au: Huida ma Ia manjadihon siapor na sun bahatna di hatiha simpul halak manyabi ruput di raja i, jana mamungka muse martumbur ruput na imbaru. 2Dompak dipapangani angka siapor i sude suan-suanan na tubu di tano i lopus abis, mangkuling ma au, “Tuhan Debata, lehen ma antong pangampunan! Songon dia ma he baenon ni si Jakob martahan? Nada he na menek do ia?”
3Gabe manolsoli ma Tuhan hara ni i. “Nada tulus tarjadi na niidami.”
4Huida muse ma sada nari parnidaan sian Tuhan Debata i. Huida ma Ia hatiha markobas laho manguhumi bangsoNia i dohot api. Abis ma laut na di toru ni tano#7:4 LAUT NA DITORU NI TANO: Anggo pandapot ni halak na jolo, di Palestina adong do laut na bidang di toru ni tano i, jana sian i do ro mual ni sude batang aek dohot mual na somal. didilat api i jana mamungka ma angka luat dipangan api. 5Hudok ma, “Ale Tuhan Debata, antak ma sugari api i! Songon dia ma he baenon ni si Jakob martahan? Nada he menek do ia?”
6Gabe manolsoli ma Tuhan hara ni i. “On pe nada tulus tarjadi,” ninna Tuhan Debata.
Tali sipat
7Dapotan parnidaan muse ma au sian Tuhan. Huida ma Ia jongjong di lambung ni sada tembok na dipajongjong mamake tali sipat. Di tanganNia adong tali sipat laho mangaligi sanga na tigor do tu ginjang parjongjong ni tembok i sanga nada. 8Disapai Ia ma tu au, “Aha do diida ho, Amos?”
Hualusi ma, “Tali sipat do, Tuhan.”
Dung i didok Tuhan ma, “Hupake do tali sipat on laho patuduhon na tudos do bangsongKu dohot tembok na so tigor. Nada pauba-ubaonKu be sangkapKu laho manguhum halahi. 9Sarsarkonon noma angka inganan na nipake ni pomparan ni si Ishak laho marsomba angka debata. Rumpakkonon ma angka inganan paribadatan ni halak Israel. AbiskononKu ma pomparan ni si Jerobeam.”
Si Amos dohot si Amasia
10Ditongos si Amasia malim na di Betel ma lapuran tu si Jerobeam raja ni Israel songon on, “Martahi do si Amos dohot rayat i laho mambaen paraloan tu raja i. Manjajang-jajang rayat do hatania gabe mambaen sego luat on. 11Harana songon on do didokkon si Amos: Mate noma Raja Jerobeam panganon ni podang, jana obanon ma halak Israel tu habuangan, dao sian tanona sandiri.”
12Dung i didok si Amasia ma tu si Amos, “Mulak ma ho panurirang tu Juda! Disi ma ho marjamita. Halahi ma mangalehen balanjomu! 13Ulang be pupu marjamita di Betel inganan na badia ni raja do kota on jana inganan paribadatan ni sandok bangso on.”
14Dialusi si Amos ma, “Nada hara ni jabatan umbaen na gabe panurirang au. Anggo satutuna parmahan dohot pamutik-mutik ni batu ni ara do au. 15Tapi dibuat Tuhan au sian karejongki jana disuru Ia au palaluhon tonaNia tu halak Israel. 16Hara ni i bege ma sanga aha na nidok ni Tuhan tu ho. Dibaen diorai ho do au marjamita mangalo bangso Israel, 17didok Tuhan do, gabe panggampang noma dadaborumi di angka dalan ni kota, jana angka dakdanakmu hona bunu di bagasan porang. Bagi-bagion noma tanomi tu halak na asing, jana ho sandiri mate di tano ni halak sileban noma na so mananda Tuhan. Angkon boanon ma halak Israel tu habuangan dao sian tanona sandiri.”
Currently Selected:
AMOS 7: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
