2 SAMUEL 8
8
Angka hamonangan ni si Daud di parporangan
(1 Juj. 18:1-17)
1Dung adong sanga sadia honok dialo Raja Daud ma mangulahi halak Pilistin. Ditaluhon ia ma halahi jana dirampas tanona i. 2Laing ditaluhon si Daud muse ma halak Moab. Disuru ia halahi modom di tano i lalu dibunu ia ma dua halak ganop sian tolu halak. Jadi dung i gabe pangoloi ni si Daud ma halak Moab jana manggarar pajak tusia.
3Dung i muse ditaluhon si Daud ma si Hadadeser anak ni si Rehob na mamarenta di Zoba, i ma sada harajaan di lambung ni Damaskus. Na topet do di ari i di pardalanan si Hadadeser laho pasuangkon kuasonia di luat na di soksok ni Batang aek Efrat. 4Ditaban si Daud do tentara ni si Hadadeser 1.700 halak na markudo, 20.000 halak pardalan pat. Ditadingkon si Daud ma kudo i tuk tu saratus kareta jana lobina i dipatengka ia patna i.
5Dung i ditongos halak Siria ma tentara sian Damaskus laho mangurupi Raja Hadadeser, tapi talu muse do i jana mate do sian halahi 22.000 halak. 6Dung i dipajongjong si Daud ma angka parbandaran ni tentarania di luat ni halahi i jana gabe angka pangoloinia ma halahi na manggarar pajak tu si Daud. Sai dilehen Tuhan do hamonangan tu si Daud sanga na di dia pe ia marporang.
7Dirampas si Daud ma sude parince sere na nipake ni parangan ni si Hadadeser jana dioban ia tu Jerusalem. 8Asing ni i dibuat si Daud muse dope tumbaga bahat sajo sian Betah dohot Berotai, kota na nirajaan ni si Hadadeser humani.
9Tarbege ma tu Raja Toi na sian Hamat na dung talu sude tentara ni si Hadadeser dibaen si Daud. 10Jadi disuru si Toi ma si Joram anaknia laho palaluhon tabe tu Raja Daud lalu pasahatkon hata horas-horas hara ni hamonangannia i, angke madung lolot do sai maralo si Toi dohot si Hadadeser. Dilehen si Joram ma di si Daud angka silua na sian sere, perak dohot tumbaga. 11Dihaulkon Raja Daud ma angka silua i dohot deba sian barang na dirampas sian si Hadadeser i baen sipargunahonon di bagasan ibadat. Laing songon i ma dibaen ia angka barang perak dohot sere na nirampasnia sian angka bangso na nitaluhonnia. 12I ma angka bangso Edom, Moab, Amon, Pilistin dohot Amalek, laing songon i dohot barang rampasan na nibuatnia sian si Hadadeser.
13Mur tu bonggalna dope tehe goar ni si Daud di na mulak ia dung dimatehon ia salapan bolas ribu halak Edom di Rura Parsiraan. 14Dipajongjong ia ma angka parbandaran ni tentarania di sude tano Edom jana gabe pangoloinia ma angka halak Edom i. Sai dilehen Tuhan do hamonangan di si Daud sanga na di dia pe ia marporang.
15Songon i ma si Daud mamarenta di sude Israel jana dijago ia do rayatnia i anso sai dipatupa na tigor dohot na denggan tu halahi. 16Angka on ma parpangkat na gincat na niangkat ni si Daud:
Si Joab anak ni si Zeruya; i ma gabe panglima ni tentara;
si Josafat anak ni si Ahilud; i ma bendahara ni harajaan;
17si Zadok anak ni si Ahitub dohot si Abyatar anak ni si Ahimelek, i ma na gabe malim;
si Seraya i ma jurutulis ni bagas godang;
18si Benaya anak ni si Joyada; i ma panglima pangawal ni raja;
dohot angka anak ni si Daud, i ma gabe malim di bagas godang.
Currently Selected:
2 SAMUEL 8: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
