2 SAMUEL 7

Tona ni si Natan tu si Daud

(1 Juj. 17:1-15)

1Sai dijagohon Tuhan do si Daud sian pangganggui ni musuna jadi gabe tarbaen ia do tongtong tinggal di bagas godangnia i. 2Jadi didok ia ma tu Panurirang Natan, “Ligi ma, anggo au maringanan di bagas godang na sian hayu sampinur Libanon do, hape Poti Parjanjian ni Debata disimpan hum di bagasan bandar sajo do!”

3Dialusi si Natan ma, “Dibaen raja i ma sanga na aha giot ni raja i, angke sai didongani Tuhan do antong raja i.”

4Tapi di borngin i didok Tuhan ma tu si Natan, 5“Kehe ma ho, jana palalu ma tonangKon tu naposongKu si Daud, ‘Biasi giot di pajongjong ho bagas di Au. 6Mamungka sian na paluahon bangso Israel Au sian Mesir lalu tu saonnari, na so unjung dope Au maringanan di bagasan sada bagas; tapi matua mimbarimbar do jana tinggal di sada bandar. 7Salolot na mimbarimbar i dohot bangso Israel, na so jungada dope Au marsapa tu angka pamimpin ni Israel na Hutodoi i, sanga hara ni aha umbaen na so dipauli di Au bagas sian hayu sampinur Libanon.’ ”

8“Jadi hara ni i, Natan, paboa ma tu si Daud naposongKi, Au Tuhan Na Markuaso, mandok tusia, ‘Na Hubuat do ho sian parkarejoanmu marmahan biri-biri di padang-padang i jana Hubaen ho gabe raja di ginjang ni bangsongKu Israel. 9Ma pola Hudongani ho sanga na tu dia pe ho kehe jana Hupangabis do sandok musumu di parporanganmu. Jana giot baenonKu ho tarbonggal situtu tudos tu angka pamimpin na gumodang di tano on. 10Boti muse, madung Huparade inganan di bangsongKu Israel jana Husuru halahi maringanan na hot disi, anso tarbaen halahi mangolu di bagasan sonang, nada adong na tarhapit. 11Mamungka sian haroro ni halahi na jolo tu tano on jana Huangkat angka pamimpin di halahi, na dung ro do angka halak na sai mangasahon gogo mamorangi halahi, tapi nada ro be na masa sisongon i. Hujanjihon ma tu ho sian sude musumu, jana lehenonKu do pomparan di ho. 12Tu joloan on, muda dapot ma ajalmu, jana ditanom ho di inganan ni ompumu, angkatonKu do sada sian anakmi na gabe raja. 13Ia do na giot pajongjong bagas di Au, jana pahotonKu harajaannia sapanjangna. 14Gabe Amangnia ma Au, jana gabe anakKu ma ia. Muda marsala ia, uhumonKu ma ia songon sada ama na manguhum anakna. 15Tapi nada mantak Au manghaholongi ia songon na dung Huantak manghaholongi si Saul. Madung Hubaen songon i maradopkon si Saul, anso ho gabe raja. 16Angkon tongtong do adong pomparanmu, jana baenonKu harajaanmu martahan salolot-lolotna. Na so ra marujung do harajaanmu?’ ”

17Dipaboa si Natan ma tu si Daud sude na nipatorang ni Debata i tusia.

Tangiang tarimakasi ni si Daud

(1 Juj. 17:16-17)

18Dung i masuk ma si Daud tu bagasan Bandar Parmianan Ni Tuhan. Juguk ma ia martangiang, “Ale Tuhan Na Gumincat, nada patut au dohot dongan sabagasku manjagit sude pasupasu na niduruskonMu. 19Lobi sian i dope tehe dipatupa Ho, ale Tuhan Na Gumincat; madung dipajojor Ho muse dope janji taringot tu pomparanku di hatiha na giot ro. Jana dipatidahon Ho do i tu au haru pe hum jolma sajo au ale Tuhan Na Gumincat! 20Aha dope na tardokkon au tu Ho? Madung diboto Ho sinasoada ni naposoMon. 21Mangasahon janjiMi jana marguru tu hagiotMu, madung dilehen Ho, jana dipatuduhon Ho tu naposoMon, sude pangalaho na godang i. 22Na godang situtu do Ho antong, ale Tuhan Debata. Nada adong tudosanMu, jana sian najolo do hami boto, hum sasada Ho do Debata. 23Jana nada adong sada bangso di tano on songon Israel. Hum sasada Israel do bangso na nipaluaMu sian parhatobanan anso baenonMu gabe bangsoMu sandiri. Sude pambaenanMu na godang i dohot hahomangan na nibaenMu tu halahi, na pararatkon hahuskuson ni goarMu do i tu sandok tano on. Madung dipaorot Ho angka bangso na asing dohot angka debata ni halahi di na kehe bangsoMi tu paraloan. 24Dibaen Ho do bangso Israel i gabe bangsoMu sandiri sapanjangna, jana Ho ma ale Tuhan na gabe Debata ni halahi.”

25“Jana saonnari ale Tuhan Debata, sai lomo ma rohaMu sapanjangna pahotkon janji na nidokMi salaho tu diringku sandiri dohot tu pomparanku, jana sai lomo ma rohaMu patuluskon sanga aha na nijanjihonMi. 26Mur tu huskusna ma goarMu, lopus gabe sai dokkonon ni halak ma sapanjangna, ‘Debata ni Israel do Tuhan Na Markuaso.’ Jadi baenonMu ma pomparanku marsundut-sundut gabe raja di bangso on. 27O Tuhan Na Markuaso! Puluk pe au pasahatkon tangiang on tu adopanmu, hara ni na dung dipatidahon Ho do sude pangalaho i tu au naposoMon, jana dipabotohon Ho tu au na niparmahanMu pomparanku lopus nada adong na mago.

28Ale Tuhan Na Gumincat, sasada Ho do Debata, dipatulus Ho do sude janjiMu jana dijanjihon Ho do pangalaho na songon on jegesna tu au. 29Antong hara ni i pangidoanku, sai lomo ma rohaMu mamasumasu pomparanku anso sai tongtong manjagit holong ni rohaMu. O Tuhan Na Gumincat, madung dijanjihon Ho sudena i, jadi pasupasuonMu ma torus pomparanku salolot-lolotna.”

Currently Selected:

2 SAMUEL 7: LAIAKB

Highlight

Copy

Compare