2 SAMUEL 23
23
Angka hata na parpudi sian si Daud
1Dipili jana dibaen Debata ni Israel do si Daud anak ni si Isai gabe raja dohot halak na godang. Laing dikarang ia do ende di halak Israel. On ma hata na parpudi didok si Daud.
2Mangkuling do Tondi Ni Tuhan markite-hite au;
tona dohot parentaNia sai di bibirku.
3Madung mangkuling Debata ni Israel;
didok pangondian ni Israel do tu au:
“Muda sahalak jolma mamarenta rayatna mardongan hatigoran
na mamimpin mardongan pangoloion tu Tuhan.
4Songon mataniari bincar ia
di andostorang di na mamungka langit marrara.
Songon sondang ni mataniari do ia dung abis udan,
mambaen duhut na mangarata marsilo-siloan.”
5Laing songon i ma pomparanku pasupasuon ni Debata,
janjiNia tu au nada muba,
hot tongtong jana sanggam janjiNia
taratur do i di sasudena.
Debata do na mangalehen au monang
jana na mambaen dijagit sude pangidoan.
6Tapi anggo na so mangoloi Tuhan
tu duri na nisampakkon do i nipasuman.
Nada tarjama tangan halahi,
7so adong halak na ra manondong i,
anggo so adong parkokas sian hayu sanga bosi.
Abis do halak sisongon i panganon ni api.
Angka tentara ni si Daud na tarbonggal
(1 Juj. 11:10-41)
8Angka on ma perwira ni si Daud na tarbonggal goarna. Na parjolo i ma si Isbaal na sian Hakhmoni, na mamimpin “Pasukan Sitolu” (Triwira). Jungada do di sada parporangan dialo ia salapan ratus halak jana dimatehon ia sude dohot tombaknia.
9Na paduahon ni Triwira i, ia ma si Eleasar anak ni si Dodo, na sian horong Ahohi. Udur do ia dohot si Daud di na mangadopi halak Pilistin na dung marlagut laho marporang. Jadi di na mundur tentara ni Israel i, 10anggo si Eleasar laing torus do ia mangalo mangabisi halak Pilistin i lopus loja sajo ia. Jogal tanganna i gabe nada tarpalua ia podangnia i. Dilehen Tuhan do hamonangan godang tu Israel anggo di na sadari i. Mangulahi ma ro tentara ni Israel na mundur nangkin tu inganan ni si Eleasar i mangalo, jana dibukai halahi ma angka baju porang sian bangke na disi.
11Na patoluhon sian Triwira i, i ma si Sama anak ni si Age na sian Harari. Jungada do dompak marlagut halak Pilistin di Lehi, di sada ladang na disuani sude dohot kacang na rara, maporus ma tentara ni Israel sian halak Pilistin. 12Hape anggo si Sama torus do ia mangalo, dimatehon jana ditaluhon ia halak Pilistin i, gabe laing dipartahankon ia ladang i. Songon i ma dibaen Tuhan mangalehen hamonangan na godang i.
13Di ari na asing muse mandapotkon hamamasa ni sabion, mijur ma perwira na tolu i – laing dohot muse do halahi anggota ni “Tridasawira” – tu liang Adulam. Di hatiha i, di bagasan partahanan gua i do si Daud. 14Tinggal di Rura Refaim do halak Pilistin jana deba tentara i sian halahi mangingani Betlehem. 15Lungun ma roha ni si Daud tu huta hatubuannia i gabe didok ia ma, “Sugari dilehen ma au nian minum sian sumur na di lambung ni pintu horbangan na di Betlehem i!” 16Disarsar perwira sitolu halak na tarbarita i ma partahanan ni halak Pilistin i, ditimba halahi ma aek sian sumur i, dung i dioban halahi ma i tu si Daud. Hape nada ra si Daud manginumsa; diduruskon ia ma aek i tu tano gabe haul tu Tuhan. 17Didok ia ma, “Nada tarinum au aek on Tuhan! Muda huinum aek i, sai songon na manginum mudar ni halak na manyabung hosana i do au huhilala!” Jadi saotik pe nada diinum si Daud aek i.
Angka i ma habaranion na nibaen ni tentara sitolu halak na tarbarita i.
18Si Abisai, anak ni si Joab anak ni si Zeruya i, i ma pamimpin ni “Tridasawira” na tarbarita i. Jungada do dimatehon ia tolu ratus halak dohot tombaknia. 19Hara ni i ma dibaen na tarbonggal ia. Tapi nada tarpatudos dope ia tu angka perwira na sian “Triwira” i.
20Sada nari perwira na asing na tarbarita, i ma si Benaya anak ni si Joyada, halak Kabseel. Na puluk situtu. Dua parporang sian Moab dibunu ia. Jungada do di sada ari na marsalju, masuk ma ia tu bagasan sada liang, lalu dimatehonia sada singa disi. 21Sanoli dibunu ia do sada halak Mesir na ginjang na godang boti marsinjata tombak. Hum tungkot do adong di si Benaya laho mangadopi bayo i. Dirampas ia ma tombak na di tangan ni halak Mesir i lalu i ma dipake ia mamunu bayo i. 22I ma habaranion na nibaen ni si Benaya, sahalak sian “Tridasawira” i. 23Anggo di halahi na sapasukan, si Benaya ma na gumogo, tapi nada tarpatudos dope ia dohot “Triwira” i. Diangkat si Daud ma ia gabe pangawal ni raja i sandiri.
24Angka on ma anggota ni “Tridasawira” i na deba nari:
Si Asael, anggi ni si Joab;
si Elhanan anak ni si Dido na sian Betlehem.
25Si Sama dohot si Elika, halak Harod.
26Si Heles, halak Palti;
si Ire anak ni si Ikes halak Tekoa.
27Si Abieser, halak Anatot;
si Mebunai, halak Husa.
28Si Zalmon, halak Ahohi;
si Maharai, halak Netofa.
29Si Heleb anak ni si Baana halak Netofa;
si Itai anak ni si Ribai Marga Benyamin halak Gibea.
30Si Benaya halak Piraton;
si Hidai na sian rura-rura ni Gaas.
31Si Abialbon, halak Araba;
si Asmawet, halak Bahurim.
32Si Eliahba, halak Saalbon;
angka anak ni si Jasen, si Jonatan.
33Si Sama, halak Harari;
si Ahiam, anak ni si Sarar, halak Harari.
34Si Elifelet anak ni si Ahasbai halak Maaka;
si Eliam anak ni si Ahitofel halak Gilo.
35Si Hesrai, halak Karmel;
si Paerai, halak Arbi.
36Si Jigal anak ni si Natan, na sian Zoba;
si Bani, halak Gad.
37Si Zelek, halak Amon;
si Naharai, halak Beerot, sioban sinjata ni si Joab.
38Si Ira dohot si Gareb, halak Jetri.
39Si Uria, halak Het;
tolu pulu pitu halak sude tentara na tarbarita i.
Currently Selected:
2 SAMUEL 23: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
