2 SAMUEL 22
22
Ende hamonangan ni si Daud
(Msm. 18)
1Dung dipalua Tuhan si Daud sian si Saul dohot sian sude musunia na asing i, diendehon si Daud ma ende on di Tuhan:
2 Tuhan i do panjagongku,
benteng na togu do di au.
3Tu Debata do au marsilaung
jana sonang do au marlindung.
Songon parince do Debata manutup au,
sonang ma au, dibaen Ia do mangondingi au.
Tuhan i do Sipalua di au
sian na mangasa gogo gabe malua au.
4Pio-pio au tu Tuhan
sian musungku au marhaluaan.
Puji jana hamogahon ma Tuhan i!
5Dihaliangi gogo ni hamatean au,
galumbang ni parmaraan mangalingkup au.
6Manaon jorgongna hamatean i tu au,
ngangang tanoman di jolongku.
7Di na tarsosak au hupiohon Tuhan,
marsurak au mangido tolongan.
Tangi do Ia sian Bagas Ni Debata
umbege na tangis au mangido urupanNa.
8Humuntal tano jana humutur,
ojahan ni langit pe humusor jana marputar
dibaen topet hatiha muruk Debata
marpiar-piar parmurukNa.
9Marbual timus sian lubang ni igungNa,
api na manyurbu na milas gara-gara
mamincar tu ruar sian pamanganNa,
ihut margurasa banggar na gara.
10Mabola langit i dibaenSa lalu mijur Ia,
marhite ombun di toru ni patNia.
11Kareta banua ginjang do tenggetonNia,
marhabong alogo di awang-awang habang Ia.
12Martutupkon hagolapan na dokdok Ia,
maruloskon ombun na golap.
13Sian sondang ni hilap di joloNia
ruar ma banggar na gara-gara.
14Mangaronggur ma Tuhan sian langit an,
patubegehon soraNa ma Debata Na Markuasoan.
15Dipalua Ia angka anak ni siorNia, musuNa pe masarsar,
marlojongi be di na ro hilap sumiksak.
16Dung i haidaan ma tandolan ni laut i
jana mungkap ma ojahan ni portibi,
di na mangogar Tuhan tu musuNa
jana manggora tu halahi dohot rimasNa.
17Dijata Tuhan au jana dijomput sian ginjang
lalu ditarikSa au sian aek na bagas.
18Sian musu na gogo au dipalua Ia
dohot sian na magigi mida au, harana magogotu do halahi sian au.
19Mangaroro halahi mangalo taran di hasusaanku,
hape dilehen Tuhan parondingan di au.
20Ditolong Ia au haruar sian mara
dibaen tu au naposoNa, holong ni rohaNia.
21Marupa au dibaen Tuhan, angke tigor na hubaen,
hara ni ate-ate na ias, pasupasu tu au dilehen.
22Huoloi do parenta ni Tuhanku,
jana na so unjung marbalik au sian Debatangku.
23Sude do uhumNia hudalankon
parentaNia pe nada adong na huparnayangkon.
24Diboto Ia do au na so mardosa
na mandao sian pangalaho na targora.
25Dapotan upa au sian Tuhan, angke tigor nipambaenan
nada au marsala, jana torang do i diSia.
26Laing burju do Ho, tu halak na tigor
tu halak na sanggam, ibo ni rohaMu pe laing sanggam ma.
27Tu halak na ias, laing ias do Ho,
hape anggo parjahat dialo Ho do.
28Ingkon do sai ditolong Tuhan halak na patoruk rohana,
tapi dipatoruk Ia do halak siginjang roha.
29O Tuhan, Ho do sinondangku
Ho do na paorot hagolapanku.
30Mardongankon Ho puluk do au mandege panggaori,
rap dohot Ho, hurumbakkon benteng ni musungki.
31Sanggam do pambaenan ni Debata,
haposan do sude janjiNa.
Songon panapik ni sinjata do Tuhan i
di halak na maporus tuSia sandiri.
32Harana, ise ma he Debata asing ni Tuhan?
Asing ni Debata, ise dope di hita parondingan?
33Debata do benteng na togu di au,
na mambaen sonang dalananku.
34Songon pat ni ursa dibaen Ia togu patku,
gabe sonang di partoran pardalananku.
35Diajar Ia au marporang,
anso malo au salang manangging sior na sian tumbaga.
36 Tuhan, malua do au muda Ho parondinganku.
gabe sangap do au hara ni pangurupiMu.
37Dijagohon Ho do anso laing togu pangalangkangku,
diparorot Ho gabe nada unjung tinggang au.
38Hukojar musungki jana hutaluhon halahi,
nada mulak au painte so humatehon sudena i.
39Hutombomkon halahi lopus nada lobassa jongjong be,
di jolo ni patku tinggang halahi gale sude.
40Dilehen Ho gogo di au marporang,
dipatunduk Ho musungku lopus au monang.
41Maporus sian au dibaen Ho musungku,
huabiskon sude na manghagigihon au.
42Marsurak halahi, hape soada na manolong.
Pio-pio tu Tuhan, hape laing manghohom Ia.
43Huropuk halahi lamot songon abu marhabangan,
hulonca-lonca halahi songon bustak di dalan-dalan.
44Dipalua Ho do au sian dongan sabangso na durako,
dibaen Ho do au gabe parkuaso ni angka bangso.
Bangso na so hutanda hian hatiha i,
saonnari gabe hatoban di au halahi.
45Tunduk jana mangunduk bangso na asing tu au,
unduk halahi muda dibege parentangku.
46Mago sude habaranion ni halahi,
jana humitir ruar be sian bentengna i.
47O Tuhan ni hangoluan! Nipuji ma Ho na mangampuni au!
Pasangap ma Debata na gumogo, sipaluangku!
48Ia do na mamolus hajahatan ni musungku,
jana na manaluhon angka bangso di jolongku.
49Dipalua Ho do au sian musungku dohot sian halak na jahat.
Dilehen Ho hamonangan di au maradopkon alongku.
50Hara ni i, hupuji do Tuhan di tonga-tonga ni angka bangso.
Huendehon ende dohot masmur di Na Markuaso.
51Mulahulak dilehen Debata
hamonangan na marlobian tu raja.
Manongtong do holong ni rohaNa tu raja na nipiliNia,
tu si Daud maradu pomparanna sapanjangna.
Currently Selected:
2 SAMUEL 22: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
