1 RAJA-RAJA 3
3
Tangiang ni si Salomo
(2 Juj. 1:3-12)
1Dibaen si Salomo ma raja Mesir gabe donganna, dibuat ia ma boru ni raja Mesir i gabe dongan saripenia. Diboan si Salomo ma boru i tu Kota Ni si Daud, tinggal disi ma ia lopus sidung dipauli bagas ni raja i bope Bagas Ni Debata dohot benteng humaliang Jerusalem. 2Angke nada adong dope Bagas Ni Tuhan na dung dipajongjong, laing di angka langgatan na marragam dope rayat i manghaulkon haulna. 3Holong do roha ni si Salomo di Tuhan jana diihutkon ia sude sipaingot ni amangnia. Tapi di piga-piga langgatan dope disambol jana dihaulkon ia angka haulnia.
4Di Gibeon do langgatan pamelean na umbonggal. Jotjot do si Salomo manghaulkon haul disi. Di na sadari kehe ma ia tusi, dihaulkon ia ma saribu haul di langgatan na disi. 5Borngin i dipataridahon Tuhan ma diriNa tusia di bagasan nipi jana manyapai, “Aha do dipangido rohamu lehenonKu tu ho?”
6Dialusi si Salomo ma, “Tuhan! Madung dipatidahon Ho basa na holong situtu do rohaMu di damang si Daud naposoMi. Denggan do ia, tigor, bope burju tu Ho. Torus do dipatidahon Ho holong ni roha godang disia. Tangkas do i tarida angke madung dilehen Ho disia sada anak na mamarenta saonnari manggontihon ia. 7Ale Tuhan Debatangku, madung diangkat Ho au gabe raja gonti ni damang, haru pe poso situtu dope au jana na so umboto sanga songon dia laho mamarenta. 8Maringanan di tonga-tonga ni bangso na dung dipili Ho gabe bangsoMu do au. Sada bangso na godang situtu na so taretong bahatna. 9Hara ni i ale Tuhan, lehen ma di au habisuhon na porlu di au laho mamarenta bangsoMon di bagasan hatigoran jana anso tangkas di au paasingkon dia na denggan, jana dia na jat. Muda nada songon i, songon dia ma tarbaen au mamarenta bangsoMu na godang on?”
10Job do roha ni Tuhan di pangidoan ni si Salomo i 11gabe didok ma tusia, “Dibaen habisuhon do dipangido ho laho mamarenta di bagasan hatigoran, nada umur na ginjang sanga hamoraonmu sanga pe hamamate ni angka musumu, 12gabe oloanKu ma pangidoanmi. BaenonKu ma ho gabe halak na umbisuk, jana na umbahat pangastuion sian sude halak na dung jungada mangolu sanga halak na giot mangolu dope di portibi on. 13Salang angka na so dipangido ho pe lehenonKu do di ho. Salolot mangolu ho mamora ma ho jana dipasangap halak lumobi sian raja na asing sanga na ise pe. 14Jana muda burju ho mangoloi Au songon amamu si Daud, jana dipatulus ho angka uhumKu lehenonKu ma di ho umur na ginjang.”
15Dung ngot, diboto si Salomo ma, hape Debata do na mangkatai dohot ia di bagasan nipi. Dung i kehe ma ia tu Jerusalem jongjong di jolo ni Poti Parjanjian ni Tuhan laho manghaulkon haul situtungon dohot haul haluaan. Dung salpu i dibaen ia ma pesta di sude pagawenia i.
Si Salomo manimbang sada parkaro na maol
16Di na sadari ro ma dua halak dadaboru siboru jalang tu adopan ni Raja Salomo. 17-18Didok sahalak sian anak boru i ma, “Raja i, na huparsangapi. Sabagas do au dohot anak boru on. Nada adong halak na asing na rap dohot hami. Di ari na salpu sorang ma anakku halaklahi. Dua ari dung i sorang muse ma anaknia halaklahi. 19Di sada borngin hatiha rap modom hami, so sian pamotoannia tarpodomi ia ma anaknia i gabe mate. 20Di tonga borngin i hatiha modom dope au, ngot ma ia, jana dibuat ia anakki sian lambungku. Dibaen ia anakki tu podomannia, anaknia na mate i dibaen ia tu podomanki. 21Dung ngot au manyogot i giot pataguk anakki, huida hape na dung mate do. Hupareso, hupatangkas, hape nada i anakki.”
22Tapi didokkon dadaboru na sadanari i ma, “Nada! Na mangolu on do anakku, anakmu do na mate i!”
Dialusi dadaboru na parjolo i ma, “Nada, na mate i do anakmu, na mangolu on anakku do i!”
Songon i ma martangkangi halahi di jolo ni raja i.
23Dung i didokkon Raja Salomo ma, “Hamu na dua rap mangoku, anakmunu do na mangolu i, anggo na mate i nada.” 24Dung didok raja i songon i, disuru raja i ma halak mambuat podang. 25Dung i didokkon raja i ma mangulahi, “Bola dua ma dakdanak i jana lehen ma tu halahi sambola be.”
26Umbege parenta i, anggo dadaboru na satutuna inang ni dakdanak i, ning ia ma, “Ulang, raja na huparsangapi, ulang bunu dakdanak i. Lehen ma songon i disia.” Didokkon ia pe songon i hara ni holong ni rohania do di dakdanak i. Tapi na sada nari mandokkon, “Padiar ma dibunu, anso ulang di au sanga di ho.”
27Gabe didokkon si Salomo ma, “Ulang bunu dakdanak i. Lehen ma tu anak boru na parjolo on – i do inangna.”
28Dung dibege halak Israel haputusan ni si Salomo taringot tu parkaro i, gabe homang ma halahi jana dipasangap halahi ma si Salomo. Tangkas ma tarida, na dung dilehen Debata disia habisuhon laho manimbang parkaro di bagasan hatigoran.
Currently Selected:
1 RAJA-RAJA 3: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
