1 RAJA-RAJA 2

Angka tona na parpudi sian si Daud tu si Salomo

1Dung dihilala si Daud donok noma ajalnia, dipio ia ma si Salomo, anaknia i, laho mangalehen angka tonania na parpudi tusia. Ninna si Daud ma, 2“Dapot ma hatihana marujung ngolungku. Angkon pos do rohamu jana barani. 3Patulus ma sanga aha na niparentahon ni Tuhan Debatamu tu ho. Oloi ma sude tona dohot angka parentaNia na tarsurat di buku ni si Musa, anso sai maruntung ho sanga tudia pe ho kehe dohot di sude sanga aha na nikarejohonmu. 4Muda dioloi ho Tuhan i, patulusonNia do janjiNia, i ma pomparanku gabe mamarenta di Israel, asal ma sude halahi sian sandok roha dohot ngolu ni halahi sai tongtong burju patulus angka parentaNia.”

5“Adong sada nari! Tontu diingot ho dope na nibaen ni si Joab tu au di na nibununia dua kapala ni tentara ni Israel, i ma si Abner anak ni si Ner dohot si Amasa anak ni si Jeter. Dibunu ia halahi di hatiha dame, mambaloskon pamunuon na nibaen ni halahi hatiha porang. Dibunu ia do halak na so marsala, gabe au do manaon na hancit hara ni pambaenan ni halahi. 6Antong amang! Diboto ho do karejomu, ulang paloas songon parmate na somal parmatenia.

7Tapi tu angka anak ni si Barsilai na sian Gilead i denggan baen tu halahi. Tolongi ma halahi markite-hite na mangalehen ngolu ni halahi, angke denggan do dibaen halahi tu au di na maporus au sian angkangmu si Absalom.”

8“Taringot tu si Simei anak ni si Gera na sian kota Behurim di Luat Benyamin, adong do tonangku tu ho. Di pardalananku tu Mahanaim, diburai si Simei do au dohot angka hata na jat. Tapi di na marsuo au dohot ia di Batang aek Jordan, husumpahon do tusia hara ni Tuhan na so pola bunuonku ia. 9Tapi on ma tonangku tu ho. Ulang padiar so hona uhum ia, Huboto na bisuk do ho, usahahon ma anso mate hona uhum ia.”

Hamamate ni si Daud

10Dung i marujung ma ngolu ni si Daud jana dikuburkon di Kota Ni si Daud. 11Opat pulu taon honokna ia gabe raja di Israel: Pitu taon ia maringanan di Hebron jana tolu pulu tolu taon di Jerusalem. 12Dung i si Salomo ma gabe raja gonti ni si Daud amangnia. Togu situtu do harajaan ni si Salomo.

Hamamate ni si Adonia

13Di na sadari kehe ma si Adonia manopotkon si Batseba. Disapai si Batseba ma si Adonia, “Denggan do maksudmu umbaen na ro ho?”

“Denggan,” ning si Adonia mangalusi. 14Diuduti ia muse, “Adong do sada na giot pangidoonku sian ho inang.” “Aha,” ning si Batseba manyapai.

15Dialusi si Adonia, “Diboto ho do inang, au do na patut gabe raja, songon i do pikiran ni sude halak Israel. Hape balik na do na tarjadi, anggingku do na gabe raja angke i do hagiot ni Tuhan. 16Adong do sada pangidoanku, pangidoanku anso dioloi ho i inang.”

17“Aha ma pangidoanmi?” ning si Batseba manyapai.

Dialusi si Adonia ma, “Pangidoanku anso kehe jolo ho inang mangido tu Raja Salomo, anso diisinkon ia marbagas au dohot si Abisag boru sian Sunem i. Porsaya do au nada tulahon ni si Salomo pangidoan ni inang i.”

18“Olo, denggan,” ning si Batseba mangalusi. “Mangkobari pe au dohot raja i hara ni ho.”

19Dung i kehe ma si Batseba giot mangkatai dohot raja i hara ni si Adonia. Jongjong ma raja i mangalo-alo inangnia lalu dipaunduk ia laho mamparsangapi, dung i juguk ma ia tu habangsania. Disuru ia ma na pasingkop karosi di siamunnia juguhan ni inangnia. 20Dung i mangkuling ma si Batseba, “Adong sada pangalaho na menek giot pangidoonku sian ho, huarop ulang tulak au.”

“Aha ma i inang?” ning si Salomo manyapai. “Nada pola hutulak.”

21Dialusi si Batseba ma, “Paloas ma si Adonia angkangmi mambuat si Abisag.”

22“Biasi ho inang mangido na songon i tu au?” ning si Salomo manyapai. “Dos do i muda dipangido ho inang habangsa on disia. Nada he angkangku do ia? Dung i Malim Abyatar dohot si Joab sabola sian ia do!” 23Dung songon i hara ni Tuhan i marsumpa ma si Salomo, “Sai dibunu Tuhan i ma au, muda so hubunu si Adonia hara ni pangidoannia i. 24Madung dipahot Tuhan i juguhanku di habangsa ni damang si Daud. Madung dipatulus Tuhan i janjiNia jana dilehen harajaan on di au dohot tu pomparanku. Husumpahon ma hara ni Tuhan na mangolu i, angkon laing sadari on mate si Adonia!”

25Dung i diparentahon Raja Salomo ma tu si Benaya, jadi kehe ma ia mamunu si Adonia.

Si Abyatar dipaantak dohot hamamate ni si Joab

26Dung i didokkon Raja Salomo ma tu Malim Abyatar, “Kehe ma ho mulak tu hutamu tu Anatot. Patut mate uhumon do ho nian, tapi anggo sadari on nada hubunu ho, angke di hatiha rap dope dohot damang, dohot do ho manaon parkancitannia. Jana ho muse do na pauli-uli Poti Parjanjian ni Tuhan i.” 27Dung i diantak si Salomo ma si Abyatar sian hamalimon. Marhite pambaen ni si Salomo i, sanga aha na nidok ni Tuhan di Silo taringot tu Malim Eli dohot pomparanna madung gabe tangkas.

28Dung dibege si Joab sude na masa i, mabiar situtu ma ia hara ni na manyabola i ia tu si Adonia, haru pe najolo nada ra ia manyabola tu si Absalom. Gabe marlojong ma ia tu Bandar Parmianan Ni Tuhan maniop angka tanduk ni langgatan i. 29Dipalalu halak ma barita ni i tu si Salomo: Gabe disuru ia ma si Benaya mamunu si Joab. 30Jadi kehe ma si Benaya tu Bandar Parmianan Ni Tuhan jana didokkon ia ma tu si Joab, “Didokkon raja i anso haruar ho sian i.” “Inda,” ning si Joab mangalusi. “Mate dison do au.”

Dipaboa si Benaya ma pangalaho i tu raja i.

31Umbege i didokkon raja i ma, “Kehe ma ho, baen ma songon na nidoknia i. Bunu ma ia lalu kuburkon, anso ulang be mangonai tu au dohot tu pomparanku pamunuon ni si Joab tu halak na so marsala. 32Tuhan i do na manguhum ia hara ni pamunuon na nibaennia so sian pamotoan ni damang. Si Abner kapala ni tentara ni Israel dohot si Amasa kapala ni tentara ni Juda, nada marsala na dua i. Dumenggan dope halahi ulang si Joab, hape dibunu ia halahi. 33Uhum hara ni hamatean ni kapala ni tentara na dua i, si Joab do manaon i dohot pomparanna ro di salolotna. Tapi sude pomparan ni damang na gabe raja, tongtong dipasupasu Tuhan anso maruntung halahi.”

34Dung i kehe ma si Benaya tu Bandar Parmianan Ni Tuhan lalu dibunu ia si Joab disi. Dikuburkon ma si Joab di bagasnia na di balian ni kota. 35Dung i diangkat raja i ma si Benaya gabe panglima ni pasukan na marsinjata manggonti si Joab, jana si Zadok pe diangkat ma gabe malim manggonti si Abyatar.

Hamamate ni si Simei

36Dung songon i dipio raja i ma si Simei, jana didokkon ma tusia, “Baen ma bagasmu di Jerusalem on. Tinggal disi ma ho ulang ho ruar sian kota on. 37Muda puluk dope ho haruar jana disalpui ho anak ni Batang aek Kidron, angkon bunuon ho, harana hasalaanmu do i.”

38“Denggan ale Rajanami,” ning si Simei mangalusi. “Oloanku do parenta ni raja i.” Dung i tinggal ma si Simei di Jerusalem, 39tolu taon lolotna. Dung i adong ma dua halak naposo ni si Simei gilo tu Gat, tu Raja Akhis anak ni si Maaka. Dung dibege si Simei songon i, 40dipayakkon ia ma palano tu halodenia, lalu kehe ia tu Raja Akhis di Gat laho manjalahi naposonia i. Dapot ia ma halahi lalu dioban ia mulak. 41Disi dibege si Salomo na nibaen ni si Simei i, 42disuru pio ia ma si Simei lalu didokkon ia, “Madung hubaen ho marjanji hara ni Tuhan bahaso na so tola tinggalkononmu Jerusalem. Jana madung hupaingot muse ho, muda ditinggalkon ho Jerusalem angkon mate uhumon ho. Nada he na dung marjanji do ho na angkon oloanmu parentangku? 43Hape biasi ditinggalkon ho janjimu jana dilanggar ho parentangku? 44Tangkas do diboto ho sude hajahatanmu tu damang. Hara ni i uhuman ni Tuhan ma ho 45tapi pasupasuonNa do au jana harajaan ni damang pahotonNa ro di salolot-lolotna.”

46Dung didok ia songon i, dilehen raja i ma parenta tu si Benaya, gabe kehe ma si Benaya mamunu si Simei. Dung songon i gok ma kuaso ni si Salomo di bagasan harajaanna i.

Currently Selected:

1 RAJA-RAJA 2: LAIAKB

Highlight

Copy

Compare