TEUBILEUENG 1
1
Ureuëng Israel jipeuna seunsus nyang phon
1 #
Teu. 26:1-51
Nibak tanggai sa buleuen dua nibak thon nyang keudua óh kalheueh bansa Israel jitinggai nanggroe Meusé, Tuhan laju geupeugah ubak Nabi Musa didalam Khimah Tuhan di padang pasi Sinai. Kheun gobnyan, 2“Gata dan Nabi Harun harôh kheueh gata peuna seunsus ateueh banmandum umat Israel, meunurot kawöm dan keuluwarga awaknyan maséng-maséng. Gata peuget kheueh dafeutar nan banmandum ureuëng agam 3nyang meu-umu dua ploh thon u ateueh nyang sanggob jeuet keu tantra. Awaknyan harôh kheueh teudafeutar meunurot pasokan jih maséng-maséng. 4Nibak tieb-tieb sukée, gata lakée kheueh sidroe ureuëng peumimpén kawöm mangat jitulông gata.” 5-16Nyoe kheueh nan-nan ureuëng nyang geupiléh nibak umat keu jitulông Nabi Musa dan Nabi Harun dan nyang jeuet keu peumimpén maséng-maséng sukée, na kheueh:
| Sukée | Peumimpén |
| Ruben | Elizur bin Syedeur |
| Simeon | Selumiel bin Zurisyadai |
| Yehuda | Nahason bin Aminadab |
| Isakhar | Netaneel bin Zuar |
| Zebulon | Eliab bin Helon |
| Efraim | Elisama bin Amihud |
| Manasye | Gamaliel bin Pedazur |
| Benyamin | Abidan bin Gideoni |
| Dan | Ahiezer bin Amisyadai |
| Asyer | Pagiel bin Okhran |
| Gad | Elyasaf bin Rehuel |
| Naftali | Ahira bin Enan |
17Deungon jitulông lé bandua blaih droe ureuëng nyan, Nabi Musa dan Nabi Harun 18geuyue banmandum awaknyan meusapat nibak tanggai sa buleuen dua, laju óh lheuehnyan silsilah awaknyan geususon meunurot kawöm-kawöm nyang na didalam tieb-tieb sukée awaknyan. Nan-nan tieb ureuëng agam nyang meu-umu dua plôh thon u ateueh jicetet ngon ji itong, 19lagée nyang geupeurintah lé Tuhan. Banmandum nyan geupeubuet lé Nabi Musa di padang pasi Sinai. 20-46Ureuëng agam nyang meu-umu dua ploh thon u ateueh nyang kaék jeuet keu tantra, teudafeutar nan awaknyan meunurot kawöm dan keuluwarga jih nyan, phon nibak Ruben, aneuëk tuha Nabi Yakub trok ubak Naftali. Jeumeulah awaknyan na kheueh:
| Sukée | Jeumeulah Ureuëng |
| Ruben | 46.500 |
| Simeon | 59.300 |
| Gad | 45.650 |
| Yehuda | 74.600 |
| Isakhar | 54.400 |
| Zebulon | 57.400 |
| Efraim | 40.500 |
| Manasye | 32.200 |
| Benyamin | 35.400 |
| Dan | 62.700 |
| Asyer | 41.500 |
| Naftali | 53.400 |
| Jeumeulah banmandum na kheueh: | 603.550 |
47Ureuëng-ureuëng Lewi hana rhoh teu itong meusajan deungon sukée-sukée laén, 48Sabab Tuhan ka geupeugah ubak Nabi Musa, 49“Bak watée gata tacetet nan-nan ureuëng nyang ék jeuet keu tantra, sukée Lewi nyan hana peu gata cetet. 50Gatayue mantong awaknyan jijaga Khimah Ulôn deungon banmandum peuleungkapan jih. Tugaih awaknyan na kheueh jigulam Khimah Ulôn deungon banmandum peuleungkapan jih meunan cit jiuruih nyan sigoe guih teuma. Awaknyan harôh kheueh jipeudong khimah droe jih ban seukeulileng Khimah Ulôn nyan. 51Teuma meunyoe gata taminah, ureuëng-ureuëng Lewinyan harôh kheueh jireuloh Khimah Ulôn, laju atranyan jipeudong lom teuma nibak teumpat teupeudong Khimah nyang barô. Seulaén awaknyan, soe mantong nyang jipeutoe ubak Khimah nyan ureuëngnyan harôh teuhuköm maté. 52Ureuëng-ureuëng Israel nyang laén nyan harôh kheueh jipeudong khimah jihnyan meukeulompok-keulompok, tieb-tieb ureuëng didalam keulompok jih nyan harôh kheueh jikeulileng lé bupanji jih maséng-maséng. 53Teuma ureuëng-ureuëng Lewi harôh kheueh jipeudong khimah jih nyan di seukeulileng Khimah Ulôn. Awaknyan harôh kheueh jijaga mangat hana ureuëng nyang jicuba-cuba peuto keunan, sampoe jeuet teupeusabab Ulôn beungéh dan Ulôn huköm umat Israel.” 54Teuma di ureuëng Israel nyan laju jipeubuet peue nyang ka geupeurintah lé Tuhan ubak Nabi Musa.
Currently Selected:
TEUBILEUENG 1: LAIACE
Highlight
Share
Compare
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
