NABI YEREMIA PEU INTAT HABA
PEU INTAT HABA
Nabi Yeremia udeb nibak bagian akhé abad keu tujoh dan bagian nyang keu phon abad keu nam Sigohlom Masehi. Treb lumpah na Yeremia geumeubuet sibagoe nabi, dan seudub nyan treb teuma gobnyan sabe geupeuingat umat Po teu Allah keuhai beuncana nyang teuma teuka ateueh awaknyan sabab awaknyan meudesya dan jiseumah beurala. Buet nyan jeuet keunyata bak masa Nabi Yeremia mantong udeb: Nebukadnezar raja Babel geureubot dan geupeuhanco Yerusalem meunan cit deungon Baét Tuhan nyang na disinan; raja Yehuda meusajan deungon rakyat gobnyan laju jiba u Babel. Meunan cit Nabi Yeremia geuramai bahwa ureuëng-ureuëng nyan teuma jigisa nibak teumpat nyang teuböih dan keuadaan bansa Israel puléh lagée sot nyang ka.
Kitab Yeremia jeuet teubagi lam meupadubboh bagian lagée nyang teupeugah dimiyueb nyoe:
(1) Peusan nibak Tuhan keu bansa Yehuda dan ureuëng-ureuëng mat kuasa disinan bak masa peumeurintahan Yosia, Yoyakim, Yoyakhin, dan Zedekia.
(2) Catetan-catetan nyang na lam kitab Barukh seukeutaréh Nabi Yeremia, jitamong cit keunan meubagoe nubuatan dan peuristiwa peunteng lam udeb Nabi Yeremia.
(3) Peusan nibak Tuhan keuhai meubagoe bansa aséng.
(4) Catetan peuleungkab keuhai kisah rhot jih Yerusalem dan teuböih u Babel.
Nabi Yeremia na kheueh sidroe ureuëng nyang ruman geuh halôh. Gobnyan lumpah geusayang keubansa geuh keudroe, dan meubacut pih hana galak geupeurhot huköman ateueh bansa geuh keudroe. Lam napadubboh bagian nibak asoe kitab geuhnyan gobnyan meututoe deungon peunoh peurasaan keuhai peundeuritaan gobnyan sabab gobnyan geutawök lé Po teu Allah mangat jeuet keu nabi. Haba Tuhan na kheueh lagée apui lam até gobnyan; geutem hán geutem gobnyan harôh geupeusampoe ubak bansa droe geuh.
Nyang paleng lagak lam kitab nyoe na kheueh tutoe haba Tuhan nyang teutunyok ubak saboh masa nyang teuma teuka. Bak masanyan teuma na saboh ikatan janji nyang barô deungon Po teu Allah. Umat Tuhan jitaát ubak janji nyan deungon hana gurée nyang peuingat awaknyan. Sabab janji nyan na teutuléh lam até awaknyan (31:31-34).
Asoe jih
Nabi Yeremia geumeuhoi 1:1-19
Nubuat-nubuat seumantong peumeurintahan Yosia, Yoyakim, Yoyakhin, dan Zedekia 2:1–25:38
Keujadian-keujadian lam udeb Nabi Yeremia 26:1–45:5
Nubuat-nubuat ateueh bansa-bansa 46:1–51:64
Yerusalem rhot 52:1-34
Currently Selected:
NABI YEREMIA PEU INTAT HABA: LAIACE
Highlight
Copy
Compare
Share
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.