Wólómà 7
7
Wɔ̃́ gɔ̃̀á yé à gbɛ̃̀ɛ̃̀ lɛ Lɔ́ɔ̀ɔ mɔ̀ɔ
1M lèe-gé vɔ̀, mɛ́ĩ́ m̀ ɓo e kéa, ḿm̀ ɓo mia lɛ́ kà lɔ́ɔ̀ɔ dɔɔ lɛ̀ɛ. Kàá yí dɔ kélɛ̀ lɔ́ɔ̀ɔ là yíkɛ̀ gáàa lɛ mia là yé nɔ́ ka tĩã́ kpóṹ là zèea ká? 2À gɔ̃̀á lɛ́ e kéa. Léé lɛ́ à gɔ̃ síì lɛɛ, lɛ à dɛ̃́ e kília kɛ̀lɛ̀ lɔ́ɔ̀ wì é tó à ká kíli à dɛ̃́ e kília é ga. Kɛɛ yé gɔ̃́ɔ aà gaa, kɛɛ lééa aà gó gbaa gɔ̃́ e kília kɛ̀lɛ̀ lɔ́ɔ̀ wì. 3À mɔ́ɔ̀ wɔ̃̀ mɔ̀ɔ, yé léé e kília aà kɛ gɔ̃ gbɛɛ píé yé à dɛ̃ lɛ tĩã́ ɓea káa, óò lo léé e kília síì sɔ̃̀ɔ̃ yɔɔ kɛ-lè. Kɛɛ yé à dɛ̃ aà gaa, kɛɛ aà la gbaa lɔ́ɔ̀ e kília kɛ̀lɛ̀. Ɛ́ɛ̃́ yé aà ló aà gɔ̃ gbɛɛ sía, kɛɛ sɔ̃̀ɔ̃ yɔɔ wáá ká kɛ á kɛ.
4M lèe-gé vɔ̀, zía lɛ́ laa ká ka káa. Ka bɛ̃̀ɛ̃, ka gaà lɛ Lɔ́ɔ̀ lɛ́ e kɛ ka kṹpìà tã́ã̀a mɔ̀, ɓii ka Kɛ́lɛ̀ì gbĩ-kpàla lɛ̀ dò ká. Dɛɛ káa, ka mi lɛ́ e wɛ̀lɛ̀ ga kɛ̀lɛ̀ɛ, là mia nì ká gbaa. Wɔ̃́ e kéa lɛ kíli kɛɛ kó à yí kɛ é kɛ à mɔ̀ Wálà lɛ̀ɛ. 5Lɛ̀ mia zì kɛ-kɔ̀ e kɛ ko líé sípìàa, Lɔ́ɔ̀ɔ a kɛ wɔ̃́ yɔɔ kɛ-lɔ̀ áà ko gbĩ-kpàla kɛ̀. Ɛ́ɛ̃́ o kɛ à kɛpìà, kɛɛ wɔ̃́ yɔɔ kɛɛ̀ yí é kɛ à mɔ̀ ga lɛ̀ɛ. 6Kɛɛ ko laà lɛ gbaa Lɔ́ɔ̀ɔ kɛ̀lɛ̀. Ƃii ko gaà lɛ pɛ lɛ́ e kɛ ko kṹpìà kó kɛ là lùò káa mɔ̀ gbaa. Kòó tó Wálà píé tòà-píé-kɔ̀ zii, lɛ́ e kɛ̀ Lɔ́ɔ̀ bɛ̃̀ɛ̃ɛ̃̀ɛ zɛ̀ɛ wìa ká gbaa. Kɛɛ kóò to gbaa à píé zi dɛɛ lɛ́ e là Gɛ̀ɛ̀ Púlú kpáá yí káa píé.
Lɔ́ɔ̀ɔ wà kɛ-wɔ̃̀ yɔɔ kɛɛ̀
7Kóò bɛ̀i à mɔ̀ kó gèe gbaa kpɛ? Kóò bɛ̀i à mɔ̀ kó gèe Lɔ́ɔ̀ɔ lɛ wɔ̃́ yɔɔ ká? Gbàaò. Kòó bɛ̀i à mɔ̀ kó gèe gbɛɛ ɓo kíli. È kɛ̀á lɛ̀ɛ́ gbaa kɛ Lɔ́ɔ̀ɔ káa, m̀ḿ gɔ̃̀ pɛ́ ò si kɛ-wɔ̃̀ yɔɔ dɔɔ̀. Ɛ́ɛ̃́ zeĩ́a, è kɛ̀á Lɔ́ɔ̀ɔ lɛ̀ɛ́ gbaa gèe, “Yékɛ̀ wɔ̃́ yɔɔ kɛ-lɔ̀ é i kɛɛ,” m̀ḿ gɔ̃̀ pɛ́ ò si wɔ̃́ yɔɔ kɛ-lɔ̀ɔ yí zàá dɔɔ̀. 8Kɛ-wɔ̃̀ yɔɔ e zi gɛ̃̀ lɔ́ɔ̀ɔ kolo là, kɛ é à kɛ wɔ̃́ yɔɔ kɛ-lɔ̀ doò do é m kɛ. É kã́ lɔ́ɔ̀ɔ mɔ̀ɔ, kɛ-wɔ̃̀ yɔɔ kɛɛ̀ lɛ pɛ bílí ká. 9Lɛ̀ m gã́ã̀ lɛ̀ɛ́ gbaa kɛá lɔ́ɔ̀ɔ káa, m kɛ ɓéèe à lúó ká. Kɛɛ lɛ̀ lɔ́ɔ̀ɔ e nua, kɛ-wɔ̃̀ yɔɔ kɛɛ̀ e vùò, 10ɛ̃́ɛ̃́ ma yee m ga gbaa. Lɔ́ɔ̀ yé e kɛ à mɔ̀ é nu kɛ̀ɓe káa, e nu ga ká ma ye m lɛ̀ɛ. 11Kɛ-wɔ̃̀ yɔɔ kɛɛ̀ e zi gɛ̃̀ lɔ́ɔ̀ɔ kolo là, áà m bèkɛ̀ ɓò. E m zɛ lɔ́ɔ̀ɔ ká.
12Kɛɛ Lɔ́ɔ̀ɔ dìè-tĩ́ lɛ wɔ̃́ púlú ká, ɛ̃́ɛ̃́ wɔ̃́ lɛ́ è à gèea, lɛ wɔ̃́ púlú ká, ɛ̃́ɛ̃́ lɛ kpeĩ, e bɛ̀i lɛ sɛ̀. 13Yé lɛ kília, pɛ́ lɛ sɛ̀ɛ lɛ́ e nu ga ká m mɔ̀ ɓɛ? Gbàaò. Ye wá gbɛɛ ɓo kíli. Kɛ-wɔ̃̀ yɔɔ kɛɛ̀ lɛ́ e wɔ̃́ sùua kɛɛ. E pɛ lɛ́ lɛ sɛ̀ɛ sí, e nuá ga ká m mɔ̀. A kɛ kíli kɛɛ zi kpó-kpó lɛ́ kɛ-wɔ̃̀ yɔɔ kɛɛ̀ lɛ à káa, á zɔ̃̀ɔ̃̀ mia lɛ̀ɛ. À mɔ́ɔ̀ wɔ̃̀ mɔ̀ɔ, kɛ-wɔ̃̀ yɔɔ kɛɛ̀ a zɔ̃̀ɔ̃̀ kélɛ̀ lɛ dóo yɔɔ kpó-kpó ɓo lɔ́ɔ̀ɔ kolo là.
Gèlè-gɔ̃-wɔ̃̀ lɛ́ e mi yía
14Kóò yí dɔ kélɛ̀ Wálà là Gɛ̀ɛ̀ Púlúa lɛ Lɔ́ɔ̀ɔ píé. Kɛɛ ma yee, m nɔ́ ɓɔ̀ɔ mi gbunu ká, ɛ̃́ɛ̃́ kɛ-wɔ̃̀ yɔɔ kɛɛ̀ aà m lɔ́ gbaa lùò ká. 15Wɔ̃́ m̀ à kɛ̀ɛ, m̀ḿ à yí dɔ. Ƃii wɔ̃́ lɛ́ m̀ nàà ḿ kɛɛ, m̀ḿ à kɛ. Kɛɛ tó wɔ̃́ lɛ́ à kɛ-lɔ̀ wá m mɔ̀ɔ, tó máà kɛ̀ à kɛ-mì ká. 16Yé maà wɔ̃́ lɛ́ m̀ḿ naa ḿ kɛɛ kɛɛ, lɛ́ɛ̀ à zɔ̃̀ɔ̃̀ kélɛ̀ m wéè lɛ Lɔ́ɔ̀ɔ kɛ̀ wánà zɛ̀ wɔ̃̀ mɔ̀. 17À mɔ́ɔ̀ wɔ̃̀ mɔ̀ɔ, ye wá m dìè kpó-kpó ká kɛ ḿ kɛ wɔ̃́ e kília kɛpìà. Kɛɛ kɛ-wɔ̃̀ yɔɔ kɛɛ̀ lɛ́ à yàlà kṹũ̀ lɛ m yía, lɛ́ à kɛ̀ɛ. 18Ḿm̀ à yí dɔ kélɛ̀ pɛ yiè nɔ́ɔ fé dò yàlà kṹũ̀ wá m yí. À yí lɛ́ e kélɛ̀, pɛ yiè gbɛɛ wá m zì wɔ̃́ kɛ-kɔ̀ yí. Wɔ̃́ yiè kɛ-lɔ̀ lɛ́ɛ̀ m kɛ̀, kɛɛ bɛ̀i wá m mɔ̀ ḿ à kɛ. 19Wɔ̃́ yiè lɛ́ m̀ nàà ḿ kɛɛ, m̀ḿ à kɛ. Kɛɛ wɔ̃́ yɔɔ lɛ́ m̀ḿ naa ḿ kɛɛ, lɛ́ m̀ à kɛ̀ɛ. 20Yé maà wɔ̃́ lɛ́ m̀ḿ naa ḿ à kɛɛ kɛɛ, kɛɛ ma wáá ká gbaa kɛ ḿ à kɛ. Kɛɛ kɛ-wɔ̃̀ yɔɔ kɛɛ̀ lɛ́ à yàlà kṹũ̀ lɛ m yía lɛ́ à kɛ̀ɛ.
21À mɔ́ɔ̀ wɔ̃̀ mɔ̀ɔ, ḿm̀ lɔ́ɔ̀ yé e kéa gɛ̃̀. Lɛ́ e kélɛ̀, yé maà naa ḿ wɔ̃́ yiè kɛɛ, kɛ-wɔ̃̀ yɔɔ kɛɛ̀ lɛ́ nɔ́ m̀ ɓɔ à làa. 22Géli kpó-kpó lɛ m zò píé Wálà là lɔ́ɔ̀ɔ mɔ́ɔ̀ wɔ̃̀ mɔ̀. 23Kɛɛ maà lɔ́ɔ̀ gbɛɛ gɛ̃̀, áà yɛɓo kɛ̀ m gbĩ-kpàla yí. Lɛ lɔ́ɔ̀ yé lɛ́ è gèlè gɔ̃ lɔ́ɔ̀ lɛ́ m̀ yɛ́lɛ́-táá-yí à zɔ̃̀ɔ̃̀ m lɛ̀ɛ káa ká. Lɛ́ɛ̀ m kɛ̀ lùò ká kɛ-wɔ̃̀ yɔɔ kɛɛ̀ zì lɔ́ɔ̀, lɛ́ è yɛɓo kɛ̀ m gbĩ-kpàla yía lɛ̀ɛ. 24É! Zi sùu kpɛɛ̀ lɛ́ m zò dàà lɛ à ká zízàá ké. Deĩ̀ lɛ́ è lo m laà m gbĩ-kpàla lɛ́ è lo m ká ga pà e ké ɓɛ kɛ̀lɛ̀ ɓɛ? 25Wálà zúo ko Dàa-mì Zízɛ̀ Kɛ́lɛ̀ì tɔ́ yí.
À mɔ́ɔ̀ wɔ̃̀ mɔ̀ɔ, zi lɛ́ lɛ à káa lɛ́ ɓɛ. Dɔ̀ m dìè là yí zàáa, ḿm̀ to Wálà là lɔ́ɔ̀ɔ píé m zì yɛ́lɛ́-táá ká. Kɛɛ m zì kɛ-kɔ̀ lɛ́ɛ̀ to kɛ-wɔ̃̀ yɔɔ kɛɛ̀ zì lɔ́ɔ̀ɔ píé.
Mann New Testament © Bible Society in Liberia, 1978.