Wólómà 6
6
Ko gaà lɛ kɛ-wɔ̃̀ yɔɔ mɔ̀, kɛɛ ko ɓe Kɛ́lɛ̀ì tɔ́ yí zàá
1Kóò bɛ̀i à mɔ̀ kó gèe gbaa kpɛ? Lɛ à mɔ̀ kó ló ko líé kɛ-wɔ̃̀ yɔɔ kɛɛ̀ ká, kɛ Wálà zì zò-kɛ̀-sɛ̀ɛ là é kpɔ́? 2Gbàaò, kòó bɛ̀i à mɔ̀ kó kɛ gbɛɛ ɓo kíli. Kɔaà ga kɛ-wɔ̃̀ yɔɔ kɛɛ̀ mɔ̀. Zi kpɛɛ̀ lɛ́ kò bɛ̀i à mɔ̀ kó kɛ tĩã́ à ká ɓéèe à yí? 3Mia lɛ́ waà kɔa bàtáì kɛ, lɛ́ aà kɛ gbaa lɛ́ kɔ̀à Kɛ́lɛ̀ì Zízɛ̀ nì kɔaà kɛ mi doó ká gbaa, kàá à yí dɔ kélɛ̀ lɛ̀ kɔa bàtáì kɛɛ̀ e kɛ à káa, kɔ̀à Kɛ́lɛ̀ì nì kɔa kɛ doó à zì gá a ɓoa yí? 4Lɛ̀ ko bàtáì kɛɛ̀ e kɛá gbaa, kò ye nì ko bĩ̀ĩ̀ e kɛá gbaa lɛ̀ doó mɔ̀, ɛ̃́ɛ̃́ kò à ye nì ko kɛ doó à zì gá a ɓoa yí gbaa. E kɛ kíli kɛɛ lɛ̀ zí lɛ́ ko Dàa zì yíkɛ̀ gáàa kpàlézɛ̀ɛ e Kɛ́lɛ̀ì wɛ̀lɛ̀ à ká ga kɛ̀lɛ̀ɛ, zí nɔ́ doóa káa, a kɛ kɛɛ kɔ́á kɛ̀ɓe dɛɛ sɔ̀lɔ̀ ɓo, kɔ́áà lòá kɔa líé.
5Ƃii yé kò ye nì kɔaà kɛ doó kɔ́áà gà lɛ̀ zí e ga à káa lɛ́ ɓea, zí nɔ́ doóa káa kò ye nì kóò lo kɛɛ̀ doó, kɔ́áà wɛ̀lɛ̀ ga kɛ̀lɛ̀ lɛ̀ zí lɛ́ e wɛ̀lɛ̀á ga kɛ̀lɛ̀ɛ lɛ́ ɓe. 6Kóò yí dɔ kélɛ̀ mí ko kɛ à ká bèĩzɛ̀ɛ, o wà Kɛ́lɛ̀ì o zɛ kɔ́lɔ́sì mɔ̀ e kíe ká. À kɛɛ̀ lɛ kíli, kɛɛ kɛ-wɔ̃̀ yɔɔ kɛ gbĩ-kpàlaa zì yíkɛ̀ gáàa à yí é sìè, ɛ̃́ɛ̃́ kɛɛ yékɛ̀ kó kɛ gbɛɛ ɓo gbaa kɛ-wɔ̃̀ yɔɔ là lùò ká. 7Ƃii mi lɛ́ à gaà lɛɛ, à laà lɛ gbaa kɛ-wɔ̃̀ yɔɔ kɛ̀lɛ̀. 8É kɛ̀á kò Kɛ́lɛ̀ì nì kɔaà gaa, kɔ́áà gɛ̃̀ wánà ká kélɛ̀ kò à ye nì kóò lo kɛɛ̀ ɓe nɔ́ kíli. 9Ƃii kóò à yí dɔ kélɛ̀ Kɛ́lɛ̀ì aà wɛ̀lɛ̀ ga kɛ̀lɛ̀, ɛ̃́ɛ̃́ lɛ̀ɛ́ ló gaà zeĩ́. Ga là yíkɛ̀ gágà gbɛɛ wá gbaa à là. 10Ga lɛ́ a ɓoa, a ɓo kɛ-wɔ̃̀ yɔɔ mɔ̀. A kɛ nɔ́ kíli doó. Ɛ́ɛ̃́ kɛ̀ɓe lɛ́ lɛ à kɛ̀lɛ̀ dɛɛ káa, lɛ kɛ̀ɓe lɛ́ e Wálà píéa ká. 11Zí nɔ́ doóa káa, kà ka dìè dɔ mia lɛ́ o gaà lɛ kɛ-wɔ̃̀ yɔɔ mɔ̀, ɛ̃́ɛ̃́ mia lɛ́ ka ɓe Wálà píé Kɛ́lɛ̀ì Zízɛ̀ tɔ́ yía ká.
12Yékɛ̀ ká tó kɛ-wɔ̃̀ yɔɔ kɛɛ̀ é yà ka gbĩ-kpàla lɛ́ è lo gaàa là, kɛ é ka kɛ káà wɔ̃́ lɛ́ ka zò à nàà à káa kɛ̀. 13Yékɛ̀ ká ka gbĩ-kpàla lɛ̀ nɔ́ɔ fé dò nɔ kɛ-wɔ̃̀ yɔɔ kɛɛ̀ lɛ̀ɛ, yékɛ̀ é kɛ wɔ̃́ yɔɔ kɛ̀á-pɛ̀ ká. Kɛɛ kà ka dìè nɔ Wálà lɛ̀ɛ, lɛ̀ mia lɛ́ waà gó o ká ga kɛ̀lɛ̀, lɛ́ waà kɛ̀ɓe sɔ̀lɔ̀ ɓoa, lɛ́ ɓe. Ɛ́ɛ̃́ kà ka gbĩ-kpàla lɛ̀ séĩ́ nɔ Wálà lɛ̀ɛ, kɛ é kɛ wɔ̃́ kpeĩ kɛ̀á-pɛ̀ ká. 14Kɛ-wɔ̃̀ yɔɔ kɛɛ̀ lɛ̀ɛ́ ló yàà ka là. Ƃii ka wá lɔ́ɔ̀ɔ wì. Kɛɛ ka Wálà zì zò-kɛ̀-sɛ̀ɛ wì zàá.
Kɛ̀-kpeĩ-kɔ̀ zì lùò
15Yé aà kɛ kília, lɛ mɔṹ kpɛ? Lɛ ko mɔ̀ kó kɛ-wɔ̃̀ yɔɔ kɛ, lɛ̀ lɛ́ ko wá lɔ́ɔ̀ɔ wì, lɛ́ ko Wálà zì zò-kɛ̀-sɛ̀ɛ wìa ká? Gbàaò. Ye wá ko mɔ̀ kó kɛ kíli gbɛɛ ɓo. 16Kàá yí dɔ kélɛ̀ yé kaà ka dìè nɔ mi dò lɛ̀ɛ kɛ ká kɛ là lùò ká, káà wéè kɛ̀ɛ, kɛɛ ka gbaa mí kà wéè kɛ̀ɛ là lùò ká? Káà bɛ̀i à mɔ̀ ká kɛ kɛ-wɔ̃̀ yɔɔ là lùò ká. Tó áà nù ga ká ka mɔ̀. Ɛ́ɛ̃́ káà bɛ̀i à mɔ̀ ká Wálà wéè kɛ. Tó áà ka kɛ̀ kpeĩ e lɛ̀ɛ. 17Kɛɛ Wálà zúo nyɔ́ɔ̀ɔ. Ƃii ka kɛ kɛ-wɔ̃̀ yɔɔ là lùò ká. Kɛɛ ka zò e wéé à mɔ̀ ka wɔ̃́ wánà zɛ̀ nì lɛ́ o kɛ pɛ lɛ́ wa zɔ̃̀ɔ̃̀ ka lɛ̀ɛ bàa kṹ ka zɔ̃̀ɔ̃̀ ká. 18Ka laà lɛ gbaa kɛ-wɔ̃̀ yɔɔ kɛ̀lɛ̀, ɛ̃́ɛ̃́ ka gbaa lùò ká kɛ̀-kpeĩ-kɔ̀ wì zàá. 19Wéé m̀ ɓoa, ḿm̀ ɓo mi-wè yí, ɓii ka kɛ̀ mi gbunu ká, ɛ̃́ɛ̃́ ka yí lɛ́ɛ̀ gaa mɔ́ɔ̀ wɔ̃̀ mɔ̀. Ka gbĩ-kpàla lɛ̀ séĩ́ nɔɔ̀ e kɛ à ká wɔ̃́ lilì kṹã̀a zɛ̀ wà wɔ̃́ yɔɔ o lɛ̀ɛ, kɛ ká kɛ wà lùò ká wɔ̃́ yɔɔ̀ yɔɔ̀ kɛɛ̀ wɛ̃́ĩ̀. Zí nɔ́ doóa káa, lɛ ka mɔ̀ ká ka gbĩ-kpàla lɛ̀ séĩ́ nɔ à ká, kɛ ká kɛ kɛ̀-kpeĩ-kɔ̀ là lùò ká wɔ̃́ púlú kɛɛ̀ wɛ̃́ĩ̀.
20Lɛ̀ ka kɛ kɛ-wɔ̃̀ yɔɔ là lùò káa, ka laà e kɛá kɛ̀-kpeĩ-kɔ̀ kɛ̀lɛ̀. 21Mɛɛ kpó-kpó lɛ́ ka gɛ̃̀ kɛ-wɔ̃̀ lɛ́ è ka kɛ̀ yɛ́lɛ̀ ká gbaa, kɛɛ̀ kolo là? Kɛ-wɔ̃̀ nì lɛ́ o kília, o líé-nyɛpìà lɛ́ nɔ́ e ga ká. 22Kɛɛ ka laà lɛ gbaa kɛ-wɔ̃̀ yɔɔ kɛ̀lɛ̀, ɛ̃́ɛ̃́ ka gbaa Wálà là lùò vɔ̀ ká. Wɔ̃́ kà gɛ̃̀ à kolo làa, lɛ́ e tɔ́ ka kɛ̀ à doó là mia nì ká, lɛ́ à líé-nyɛpìà lɛ kɛ̀ɓe wɔ́lɔ́-wɔ́lɔ́ káa ká. 23Ƃii mi-fɔ́nɔ́ lɛ́ kɛ-wɔ̃̀ yɔɔ kɛɛ̀ è à nɔɔ, lɛ́ e ga káa. Kɛɛ pɛ́ Wálà à nɔ mia lɛ̀ɛ ɓɔ̀ɔ, lɛ kɛ̀ɓe wɔ́lɔ́-wɔ́lɔ́ ká ko Dàa-mì Kɛ́lɛ̀ì Zízɛ̀ kɔ̀ yí zàá.
Mann New Testament © Bible Society in Liberia, 1978.