2 Tɛsàlónìà 3
3
Kà sɛ̀nɛ ɓo ko mɔ́ɔ̀ wɔ̃̀ mɔ̀
1Ko lèe-gé vɔ̀, m tèáà-là lɛ́ e kélɛ̀, kà sɛ̀nɛ ɓo ko mɔ́ɔ̀ wɔ̃̀ mɔ̀ kɛ ko Dàa-mì là wééa é wɛ̃̀ĩ tíè-tíèe, ɛ̃́ɛ̃́ kɛ à ɓɔ́-kpɔ́ é kɛ à mɔ̀ lɛ̀ zí e kɛá ka fĩ̀ã̀a lɛ́ ɓe. 2Ɛ́ɛ̃́ zeĩ́, kà sɛ̀nɛ ɓo kɛɛ Wálà é ko la mia sɔ̃̀ɔ̃ yɔɔ zɛ̀, e bɛ̀i kɛ-pɛ̀ yɔɔ kɛ-mìà kɛ̀lɛ̀, ɓii zò-dɔ̀à-mɔ̀ wá mia séĩ́ yía mɔ́ɔ̀ wɔ̃̀ mɔ̀.
3Kɛɛ ko Dàa-mì lɛ zò-dɔ̀à-mɔ̀ zɛ̀. Lɛ́ɛ̀ lo ka mɛ́ kɛɛ̀ gágà, ɛ̃́ɛ̃́ lɛ́ɛ̀ lo ka laà Kɛ-pɛ̀ Yɔɔ Kɛ-mìa kɛ̀lɛ̀. 4Ɛ́ɛ̃́ ko Dàa-mì lɛ́ɛ̀ à kɛ̀ tó kɔ́áà ko zò dɔ̀ ka mɔ̀. Ko zò lɛ à mɔ̀ wánà ká kélɛ̀ ka wɔ̃́ lɛ́ kò à gèe ka lɛ̀ɛ kɛpìà, ɛ̃́ɛ̃́ káà lo lóò líé à kɛɛ̀ ká.
5Ko Dàa-mì è kɛ ka zò píé áà líé sì à ká Wálà zì lɔ̀-kpɔ̀ ka mɔ̀, ɛ̃́ɛ̃́ zò-kũ̀-tã́ã̀ lɛ́ è go Kɛ́lɛ̀ì kɛ̀lɛ̀ɛ yí.
Lɛ mi mɔ̀ í yɛɓo kɛ
6Ko lèe-gé vɔ̀, kóò wɔ̃́ e kéa gèe ka lɛ̀ɛ ko Dàa-mì Zízɛ̀ Kɛ́lɛ̀ì tɔ́ yí. Ye lɛ́ e kélɛ̀, kà ka yí ɓo ka lèe-gé vɔ̀ yé ò tùò yɛɓo kɛɛ̀ lɛ̀ɛ, lɛ́ òó tó wɔ̃́ kɛ-zì lɛ́ kɔa nɔ o lɛ̀ɛ píéa mɔ̀. 7Ka dìè káà à yí dɔ sɛ̀ kélɛ̀ lɛ ka mɔ̀ ká wɔ̃́ kɛ lɛ̀ zí ko kɛ à kɛpìà káa lɛ́ ɓe. Kòó gbaa kɛ túópìà yɛɓo lɛ̀ɛ lɛ̀ lɛ́ ko kɛ ka píéa ká. 8Kòó gbaa kɛ pɛ ɓèlèpìà mia kɛ̀lɛ̀ ɓɔ̀ɔ. Kɛɛ ko yɛɓo kɛ ko mɛ́ áà kpɔ̀nɔ̀. Ko yɛɓo kɛ bĩ́ã́ ɛ̃́ɛ̃́ nyɛ́nɛ́ĩ́ yékɛ̀ kó kɛ vũ gbííni ká ka dò nɔ́ɔ fé là. 9Ye wá kélɛ̀ gbũ̀-ko-mɔ̀ wɔ̃̀ lɛ̀ɛ́ gbaa kɛ ka wĩĩ́. Kɛɛ kɔa kɛ kíli kɛɛ é kɛ wɔ̃́ gɔ̃̀á ká ka lɛ̀ɛ kɛ ká kɛ. 10Lɛ̀ lɛ́ bɛ̃̀ɛ̃ ko kɛ ka píéa, kɔa gèe ka lɛ̀ɛ kélɛ̀, mi lɛ́ làá naa é yɛɓo kɛɛ, ye wá à mɔ̀ é pɛ ɓèlè.
11Kóò à gèe kíli ɓii kɔa ma kélɛ̀ mia lɛ́ ò tùò yɛɓo kɛɛ̀ lɛ̀ɛ lɛ́ òó naa ó yɛɓo kɛ gbɛɛ ɓo, tó wáà o lé dà o ɓɛ́ĩ̀ gbɛɛ wà wɔ̃́ yía kɛ̀ ka bà yi mɔ́ɔ̀ wɔ̃̀ mɔ̀. 12Ko Dàa-mì Zízɛ̀ Kɛ́lɛ̀ì tɔ́ yía, kóò à gèe lìè-wè dɔɔ̀ ká mia sùua lɛ̀ɛ kélɛ̀ lɛ o mɔ̀ ó kɛ ɓe zò-kũ̀-gé ká, wáà yɛɓo kɛ̀ o dìè zì kɛ̀ɓe mɔ́ɔ̀ wɔ̃̀ mɔ̀.
13M lèe-gé vɔ̀, yékɛ̀ ka yí é ga wɔ̃́ yiè kɛɛ̀ mɔ̀. 14Yé mi nɔ́ɔ fé aà gɔ̃́ wéè wɔ̃́ lɛ́ kɔa bɛ̃̀ɛ̃ kíí e kéa yía mɔ̀ɔ, kà à gɛ̀lɛ̀ kpɔ́ ka kɔ̀ mɔ̀. Kà ka yí ɓo à mɔ̀ kɛɛ à yɛ́lɛ̀ é à kɛ. 15Kɛɛ yékɛ̀ ká à gɛ̃̀ ka dàa-gbe ká. Kɛɛ kà lìè-wè dɔ à lɛ̀ɛ, lɛ̀ zí káá dɔɔ̀á ka lèe-gé lɛ̀ɛ lɛ́ ɓe.
Wéé líé-nyɛ-mɔ̀ zɛ̀
16Ko Dàa-mì dìè lɛ́ è zò-yà-gé nɔ mia lɛ̀ɛ, é zò-yà-gé nɔ ka lɛ̀ɛ lúó séĩ́ ká, ɛ̃́ɛ̃́ zi séĩ́ ká. Ko Dàa-mì è kɛ ka séĩ́ ka píé.
17Wèè-ka-bà wè yé e kéa, ma Pɔ́ɔ̀, m dìè-tĩ́ lɛ́ ma bɛ̃̀ɛ̃ m dìè kɔ̀ káa. Zí e kéa lɛ́ m̀ kii séĩ́ bɛ̃̀ɛ̃ɛ̃̀ léĩ́ to à káa. Zí m̀ pɛ bɛ̃̀ɛ̃ à káa, ye lɛ́ ɓɛ.
18Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ɛ é kɛ ka séĩ́ ka píé.
Mann New Testament © Bible Society in Liberia, 1978.