2 Tɛsàlónìà 2
2
Mi Kɛ-pɛ̀ Yɔɔ Zɛ̀
1Wɔ̃́ lɛ́ à gbɛ̃̀ɛ̃̀ lɛ ko Dàa-mì Zízɛ̀ Kɛ́lɛ̀ì nu-wɔ̃̀, ɛ̃́ɛ̃́ ko pà e kíe mɔ̀ kɛɛ kò ye nì kó kɛ lɛ̀ doó mɔ̀ɔ mɔ̀ɔ, m lèe-gé vɔ̀, ḿm̀ kpé kã ka lɛ̀ɛ, 2yékɛ̀ wɔ̃́ yí é nìɛ̀ ka ká nɔ́ zá le, ɛ̃́ɛ̃́ yékɛ̀ ka zò é yà yèĩ̀-là yé kaà ma kélɛ̀ ko Dàa-mì zì Lúóa aà ɓɔɔ ká. Lúó dò káa, mi dò a gèe lèĩ kélɛ̀ Gɛ̀ɛ̀ Púlú lɛ́ e à gèea, ɛ̃́ɛ̃́ mi dò a gèe lèĩ kíli lɛ̀ lɛ́ e kɛ mɛ́ĩ́ ɓopìàa ká. E bɛ̀i, mi dò a gèe kélɛ̀ ko lɛ́ ko wɔ̃́ e kília bɛ̃̀ɛ̃ kii yí lèĩa. 3Yékɛ̀ ká tó mi nɔ́ɔ fé é ka bèkɛ̀ ɓo zi nɔ́ɔ fé dò ká. Ƃii Lúó e kília lɛ̀ɛ́ ló ɓɔɔ̀ nɛ́, yé gèlè-gɔ̃̀-Wálà-ká líé-nyɛ-mɔ̀ zɛ̀ɛ lɛ̀ɛ́ kɛ nɛ́ɛ ká, ɛ̃́ɛ̃́ yé Mi Kɛ-pɛ̀ Yɔɔ Zɛ̀ lɛ́ lɛ à mɔ̀ à yí é sìèa, lɛ̀ɛ́ ɓɔ nɛ́ kɛ é e dìè zɔ̃̀ɔ̃̀ɔ ká. 4Mí e kília lɛ́ɛ̀ lo gèlè gɔ̃ɔ̀ pɛ séĩ́ lɛ́ mia ò gbìnì à lɛ̀ɛ, ɛ̃́ɛ̃́ pɛ séĩ́ lɛ́ mia ò si Wálàa o ká. Lɛ́ɛ̀ lo e dìè kɛɛ̀ o séĩ́ o là, ɛ̃́ɛ̃́ tó e ló bɛ̃̀ɛ̃ sálà-ɓò-Wálà-lɛ̀ɛ-kà wì, tó e yà yi áà e dìè sì Wálà.
5Ka zò lɛ́ɛ̀ vùò lɛ̀ lɛ́ m kɛ ka píé yi máà wɔ̃́ e kéa séĩ́ gèè ka lɛ̀ɛ ká? 6Kɛɛ pɛ dò lɛ́ è wɔ̃́ nì e kília tèa nɛ́ kɛɛ̀ mɔ̀ dɛɛ káa. Káà pɛ́ e à káa dɔ. Lɛ kíli kɛɛ Mi Kɛ-pɛ̀ Yɔɔ Zɛ̀ e kília é e dìè zɔ̃̀ɔ̃̀ mia lɛ̀ɛ e dìè zɔ̃̀ɔ̃̀ mia lɛ̀ɛ lùò kpó-kpó ká. 7Wɔ̃́ yɔɔ kɛɛ̀ lɛ lópìà e líé dɛɛ ká. Kɛɛ à bĩ̀ĩĩ̀ lɛ tĩã́. Kɛɛ wɔ̃́ è lo kɛɛ̀ɛ, lɛ̀ɛ́ ló kɛɛ̀ nɛ́ yé mi lɛ́ è à tèa kɛɛ̀ mɔ̀ɔ lɛ̀ɛ́ gó nɛ́ zuúa ká. 8Yé aà kɛ kília, Mi Kɛ-pɛ̀ Yɔɔ Zɛ̀ e kília lɛ́ɛ̀ lo e dìè zɔ̃̀ɔ̃̀ mia lɛ̀ɛ gbaa. Yé aà kɛ kília, ko Dàa-mì Zízɛ̀ lɛ́ɛ̀ lo à zɛɛ̀ e wúú lɛ́ è go à léa ká. Ɛ́ɛ̃́ à zì nù-mia-là-kɔ̀ kpànazɛ̀ ɓɛ, lɛ́ɛ̀ lo à yí sìè à ká yé aà nua ká. 9Mi Kɛ-pɛ̀ Yɔɔ Zɛ̀ɛ lɛ́ɛ̀ lo nuù yíkɛ̀ gáàa lɛ́ è go Sétɔ̃̀ kɛ̀lɛ̀ɛ ká. Lɛ́ɛ̀ lo wɔ̃́ kpàlézɛ̀ doò do, ɛ̃́ɛ̃́ wɔ̃́ gɔ̃̀á wà lé-pa-wɔ̃̀ nɛ̀ zɛ̀ kɛɛ̀. 10Ɛ́ɛ̃́ lɛ́ɛ̀ lo mia bèkɛ̀-ɓo-wɔ̃̀ doò do ɛ̃́ɛ̃́ yɔɔ̀ yɔɔ̀ kɛɛ̀ mia lɛ́ o yí è lo sìèa ká. O yí lɛ́ɛ̀ lo sìè, ɓii òó gbaa naa kɛ ó o kɔ̀ yà ɛ̃́ɛ̃́ kɛ ó naa wánà wɔ̃̀ ká, kɛ ó la-ɓo sɔ̀lɔ̀ ɓo. 11Wɔ̃́ e kéa mɔ́ɔ̀ wɔ̃̀ mɔ̀ɔ, Wálà lɛ́ɛ̀ à kɛ̀ tó wɔ̃́ lɛ́ ye wá wánà zɛ̀ɛ zì yíkɛ̀ gáàa áà yɛɓo kɛ̀ o yí, kɛ ó wɔ̃́ lɛ́ ye wá wánà zɛ̀ɛ gɛ̃̀ wánà ká. 12Wɔ̃́ e kéa lɛ́ɛ̀ à kɛ̀ tó mɛ̀ĩ́-sà áà kàà mia séĩ́ lɛ́ òó wánà-wɔ̃̀ɔ gɛ̃̀ nɛ́ wánà ká, kɛɛ waà o dɔ̀lɔ̀ kṹ kɛ-wɔ̃̀ yɔɔ kɛɛ̀ mɔ̀ géli káa wĩĩ́.
Wálà aà ka sí kɛ ká la-ɓo sɔ̀lɔ̀ ɓo
13Kɛɛ ko lèe-gé vɔ̀, lɛ à mɔ̀ kɔ́á Wálà zúo ɓo lúó séĩ́ ká míá ka ké, lɛ́ ka lɔ̀ lɛ ko Dàa-mì mɔ̀ɔ mɔ́ɔ̀ wɔ̃̀ mɔ̀. Ƃii Wálà e ka sí kɛ ká kɛ mia bèĩzɛ̀ lɛ́ ka laà lɛɛ ká, yíkɛ̀ gáàa lɛ́ Gɛ̀ɛ̀ Púlú è ka kɛ̀á Wálà dìè là mia nì káa kolo là, ɛ̃́ɛ̃́ ka zì zò dɔ̀ wánà-wɔ̃̀ɔ mɔ̀ɔ kolo là. 14Wálà e ka súo kɛ wɔ̃́ nì e kéa mɔ́ɔ̀ wɔ̃̀ mɔ̀ wɔ̃́ làṹ yiè lɛ́ kɔa gèe ka lɛ̀ɛ kolo là zàá. E ka súo kɛ kɛ ká nu kɛɛ kà ko Dàa-mì Zízɛ̀ Kɛ́lɛ̀ì nì ká dɔ à zì lɛ̀-fɔ̀nɔ-kɔ̀ɔ yí. 15À mɔ́ɔ̀ wɔ̃̀ mɔ̀ɔ, ko lèe-gé vɔ̀, kà dɔ ka dɔ̀lɔ̀ mɔ̀ kpɛ̃ĩ le, ɛ̃́ɛ̃́ kà ka kɔ̀ kùnù wánà-wɔ̃̀ nì lɛ́ kɔa zɔ̃̀ɔ̃̀ ka lɛ̀ɛ lɛ̀ lɛ́ ko kɛ wɔ̃́ gèepìàa ká, ɛ̃́ɛ̃́ lɛ́ kɔa zɔ̃̀ɔ̃̀ ka lɛ̀ɛ kii lɛ́ kɔa bɛ̃̀ɛ̃ ka píéa yía mɔ̀.
16Ko Dàa-mì Zízɛ̀ Kɛ́lɛ̀ì dìè, ɛ̃́ɛ̃́ ko Dàa Wálà, lɛ́ ko lɔ̀ kpɔ́ɔ̀ lɛ à mɔ̀, lɛ́ e tòá kíli fã̀ã́-wàà wà zò-kɛ̀-pɛ-mɔ̀ yiè nɔ kɔa lɛ̀ɛ zò-kɛ̀-sɛ̀ kolo là zàáa, 17ò à kɛ fã̀ã́-wàà é kɛ ka zò píé, ɛ̃́ɛ̃́ ó à kɛ ka mɛ́ é kɛ gágà, kɛɛ ká wɔ̃́ séĩ́ lɛ́ lɛ sɛ̀ɛ gèe káà à kɛ̀.
Mann New Testament © Bible Society in Liberia, 1978.