2 Sámìɔ̀ 23
23
Dèɓé wò líétónù
1Zɛ́sè gbɵ Dèɓé ɓɛ è kǝ̀ mɛ é Aaɓi yà kǝ̀ kpàozǝ̀ɛ̀ ká. Mɛ é Zékɔ̀a Aaɓi yà sɥ kíŋ ká, é kǝ̀ zɥ́ tã́ bɛ̃ɛ̃̀mɛ̀ ká Ézrɛ̀ lǝ̀ɛ̀, à wò líétonù wó nɛ̀.
2Yàkǝɛ Yàwɛ zùù ɓɛɛ è wɔ̃́bìɛ̀ n gɥ́,
àɓà nààbɔwò è n lie.
3Ézrɛ̀a Aaɓi yà wé.
Ézrɛ̀a gùǝ̀ yà pɵ̀ n lǝ̀,
“Kíŋ é ɓɔ̀ukǝ̀ zakpen dɔsɥ̀ ká,
é ɓɔ̀ukǝ̀ Aaɓi wò kǝsɥ̀ káɛ,
4è kɛ̃̀ɛ̃̀ lɛ̀àlíé ŋlà ɓɥ́ɥ̀ é lakpo gbɛ kâ xlɵ̀ɵ̀ɛ̀ lɵ́,
ŋla é gbũlà gbɔ̀ɔ plɥ̀n dɔ̀u ɓà kǝ layi yà bãɛ ká.”
5Zɛ̃ã ɓɛ é Aaɓi è lo lúákpɔá n dùnnù ɓà,
ɓií yà e wòdɔ n lǝ̀ tòapɵ́ká.
Wòɓɵ̀ wò é yaá ló kãɛ̃ mɥ̀,
wòɓɵ̀ wò à tà yaá ló bɔɔ̀ɛ̀ mɥ́.
N zòtàɥ wɔ̃̀ plɛ́ín é ɓǝ,
pǝ̂ lo kǝ ma kɔ̀ziesɥ̀ káɛ é ɓǝ,
é Aaɓi lo gbɛ̀ìa plan gbɔ̀gbɔ̀lɵ.
6Kǝǝ mɛnù é Aaɓi yaâ wo gɔ̀ɛ̀, wo tɛ̀i kɛ̃̀ɛ̃̀ gɛ̃́ĩ́ wô zonlàɛ̀ lɵ́.
Mɛgbɛ yáá yà gɛ̃́ĩ́ ɓà e kɔ̀fèè ká.
7Yàɓà kǝ mɛ nyɛ̀ɛ̀ yuɔkǝ̀a pǝ̀nù wó pìɛ̀ káɛ, dà yuɔpíé,
wò lò gɥɵ fɛ́fɛ́lɵ.
Dèɓéa krúázǝ̀ tɔ́àɓàzǝ̀ wó ɓɛ
(1 Krɔ́nékò 11.10-41)
8Dèɓéa krúázǝ̀ tɔ́ɓɔùzǝ̀ yààka ɓɛ wo tɔ́nù é nɛ̀. À bìɛ̀zǝ̀ é tɔɔ Hɔ́kúmɔ̀ gbɵ Zósé Bààsébɛ̀ é kǝ̀ mɛ yààka ɓɛ waa líésɥ́mɛ̀ káɛ. È kózǝ̀ mɛ kǝ̃̀ǝ̃ srɛ́àka ká dɥ́ ká, é wo sáálɵɛ wo zǝ grù ɓɛ píé.
9Mɛ yààka ɓɛ waa mɛ pèètɛzǝ̀ é tɔɔ Dódò gbɵ Ɛlìézà é go Éhɔ̀ wòpɵ sɛ̀ gɥ́ɛ. È kǝ̀ grùgɔ̃ yì do káɛ, wãã̀ Dèɓé wò véèdɔ̀ Félésã́ã̀mɛ̀nù wó pà wo kóà grùpíéɛ ɓà. Ézrɛ̀mɛ̀nù wò dùà, 10kǝǝ Ɛlìézà è tò e dɔ̀lɛ̀ ɓà é kózǝ Félésã́ã̀mɛ̀nù píé é toápɵ́ à kɔ̀ è klákũ é yaá mɔ̀à nyɛ̀ɛ̀ e kɔ̀ ɓo làà é kǝ̀à kwɛɛ ɓà. Yàwɛ ɓɛɛ à kɔ̀zie kpàozǝ̀ ká yi ɓɛ ká. Lɛ̀ grù yà nyiɛɛ, Ézrɛ̀mɛ̀nù wò yìɛ̀ wo zɥ́ wó lo lɛ̀ Ɛlìézà è kǝ̀àɛ̀ ɓà wó gɵ̀ɵ̀kpǝ̀nù kplòò.
11À mɛ yààkazǝ̀ é wo kã̀ã̀la káɛ é tɔɔ Háràmi Ágèè gbɵ Sámà. Félésã́ã̀mɛ̀nù ɓɛ wò pà wo kóà Líhà pɵ̀ sɔ́ ze lɛ̀ilɛ̀ do ɓa. Lɛ̀kɔ̀ɔɛ Ézrɛ̀mɛ̀nù ɓɛ wò dùà Félésã́ã̀mɛ̀nù lǝ̀, 12kǝǝ Sámà è tò e dɔ̀lɛ̀ɓà ze lɛ̀ilɵ mɥ́ é à tàkpàà, é Félésã́ã̀mɛ̀nù ɓɛ zǝ. Yàwɛ ɓɛɛ à kɔ̀zie kpàozǝ̀ ká yi ɓɛ ká.
13Kǝ yà tó téé kǝ tapǝ̀ kã́yì nyɛ̀ɛ̀ wòɛ̀, krúá gbégbè gɔ́ɔ̀ yààka ɓɛ waa mɛ yààka wòlò Dèɓé píé Àdúlàn Gùǝ̀dù gɥ́, lɛ̀ Félésã́ã̀ krúázǝ̀ wó yàgbáɥ́ Wréfìn Goopíéɛ ká. 14Dèɓé è kǝ̀ e bĩ̀lɛ̀ɓà, lɛ̀ Félésã́ã̀ krúánù wó kǝ̀ Bɛ́fléhɛ́ǹɛ̀ ká. 15Lɛ̀kɔ̀ɔɛ Dèɓé yà pɵ, “Dɵ yi sɥ́ yia yigrù gɥ́ yeé pɵɵ Bɛ́fléhɛ́ǹ lɛ̀ dèà glàlí sɔ́ dè é n gbaá wɛ̀!” 16Lɛ̀kɔ̀ɔɛ krúá gbégbe yààka ɓɛ wó bɔ Félésã́ã̀mɛ̀nù son wó lo wó yi ɓɛ tɔ é wó nuá Dèɓé lɛ̀. Kǝǝ yaâ mɥ, kǝ yà wròsɛa sra ká Yàwɛ lǝ̀. 17Ê pɵ, “Yàwɛ, n ká ló yí nɛ̀ mɥ! È lò kǝ nɛ̀ɛ̀ gɔ̃ɔ̃̀nù wóo dè nii dɔ pǝkwɛ nɛ̀ wo fɛí mɥsɥ̀ lɵ́.” Àmɔ́ɔ̀wɔ̃̀gɥ́ɛ yaá wéà nyɛ̀ɛ̀ yí ɓɛ mɥ.
Wɔ̃́ zògbéèzǝ̀ nù é krúázǝ̀ yààka gbégbe ɓɛ wô kǝ̀ɛ̀ é ɓǝ.
18Zóà legrú Ábísàì, Zɛ̀rúà gbɵ, é kǝ̀ krúá gbégbe gɔ́ɔ̀ yààka ɓɛ waa líésɥ́mɛ̀ ká. È kózǝ̀ yaa dɥ́ ká é mɛ kǝ̃̀ǝ̃ yààka zǝ, é tɔ́ɓɔle ye à mɔ́ɔ̀wɔ̃̀ɓà è kã́ kruá yààka ɓɛ ɓàɛ̀ ká. 19Mɛnù wò Ábísàì tɔ́ɓɔ̀ dèèdè krúázǝ̀ gɔ́ɔ̀ yààka ɓɛ son. Ye é kǝ̀ waa líésɥ́mɛ̀ ká, kǝǝ à kǝ wɔ̃̀ yaá mɔ̀ krúá gbégbe yààka ɓɛ ká.
20Zèhóádà go Kázìɛ̀ gbɵ Bɛ̀náyà, è kǝ̀ tɔ́ɓɔ krúá do ká pɵ́. È zògbéè wɔ̃̀ plǝǝ̀zǝ̀ kǝ̀, é dàa Móà krúá gbégbè pèètɛ zǝ ê ɓoɛ ɓàà. Yi do káɛ è lò ganìa grù gɥ́ nɛ́nɛ́ kpo wrò yì ká é ganìa do zǝ. 21Zɥ́ɛ è Ízèmi và gbâgbàò é dɥ́ kǝ̀à gɔ̀ɛ̀ zǝ̀. Bɛ̀náyà è kózǝ̀ à píé xlɥ́krú ká, é dɥ́ é kǝ̀à kwɛɛ kũ à gɔ̀ é Ízèmi ɓɛ zǝ dɥ́ ɓɛ ká. 22Pǝnù wó nɛ̀ é Zèhóádà gbɵ Bɛ̀náyàà kǝ̀, é tɔ́ɓɔle ye, è kã́ krúá gbégbe yààkaɛ ɓàɛ̀ ká. 23Mɛnù wà tɔ́ɓɔ̀ krúá gɔ́ɔ̀ yààka ɓɛ son, kǝǝ yaá mɔ̀ krúá gbégbe yààka ɓɛ ká. Dèɓé yà kǝ̀ zòkǝ̀à píé mɛ̀nù gɔ̀lààmɛ̀ ká.
24Krúá gbéè gɔ́ɔ̀ yààka ɓɛ waa mɛ gbú wó tɔɔ:
Àzáhɛ̀, Zóà legrú,
Dódò gó Bɛ́fléhɛ́ǹ gbɵ Ɛ̀lèhánà,
25Sámà gó Hérɔ̀ pɵɵ,
Élíkà gó Hérɔ̀ pɵɵ,
26Hɛ́lɛ́zì gó Pélɛ̀ pɵɵ,
Íkɛ́sì gó Tèkóà gbɵ Írà,
27Ábìézǝ̀ gó Ànàtɔ̀ pɵɵ,
Mɛ̀búnàì gó Húsà pɵɵ,
28Záámɔ̀ gó Éhɔ̀ pɵɵ,
Màháràì gó Nétófà pɵɵ,
29Báánà gó Nétófà gbɵ Hélɛ̀,
Wríbàì é go Gébìɛ̀ pɵɵ Bɛ́nzémɛ̀n sɛ̀ gɥ́ɛ à gbɵ Ítàì,
30Bɛ̀náyà gó Píráfɔ̀n pɵɵ,
Hídàì é go Gáà Goopíé lɛ̀nù ɓàɛ̀,
31Ábì-Ábòn gó Ábà pɵɵ,
Ázímávɛ̀ gó Bàhúrìn pɵɵ,
32-33Ilìábà gó Sá-àbɔn pɵɵ,
Zésàn gbɵnù,
Sámà gó Hárà gbɵ Zɔ̀nátã̀,
Sáárà gó Hárà gbɵ Àháyàn,
34Àhábàì go Máákà gbɵ Ɛlífɛ́lɛ̀,
Àhítófɛ̀ gó Gílò gbɵ Ílìàn,
35Hɛ́zràì go Kámɛ̀ pɵɵ,
Pááràì gó Ábì pɵɵ
36Nétàn gó Zóbà gbɵ Ígà,
Bánì gó Gáà pɵɵ,
37Zílɛ̀ gó Ámɔ̀n sɛ̀gɥ́,
Nèháràì gó Bíírɔ̀ pɵɵ, Zóàa grùkǝ̀a pǝ̀nù bũmɛ̀,
38Írà wãã̀ Gérɛ̀ wó go Zátɛ̀ pɵɵɛ,
39Wãã̀ Yùráyà é kǝ̀ Hétàmi káɛ.
Mɛ gɔ́ɔ̀ yààka ga lɔ́ɔ́yià wó ɓǝ.
