2 Sámìɔ̀ 22
22
Dèɓéa kɔ̀zie tã̀
(Tã́ Kwi 18)
1Lɛ̀ Yàwɛ yà Dèɓé gɔ̀la Sɔ́ɔ̀ gɔ̀, ĩ́ĩ́ à dǝgbɵnù wótoɛ gɔ̀ɛ̀, Dèɓé è tã́ nɛ̀ ɓò Yàwɛ píé.
2Yàwɛ ɓɛ é tɔɔ ma gùǝ̀
wãã̀ ma sã́ã́ gbéè.
3Ma Aaɓi é tɔɔ n bĩ̀lɛ̀,
má kǝ à píéɛ n gɔ̀lasɥ̀mɥ̀.
È n bĩ̀lɛ̀ɓò nɛ̀zɛ̃ã lɛ lɵ́ mɛ tàkpààlà à káɛ lɵ́,
é n tàkòzǝ é n gɔ̀la.
Ye é tɔɔ n lamɛ̀,
yàkǝɛ è n bĩ̀lɛ̀ɓo é n gɔ̀la wɔ̃́gbéè gɔ̀.
4A Yàwɛ lɔ̀ɔ̀kǝ̀,
é n gɔ̀la n dǝgbɵnù gɔ̀.
Gó Yàwɛ tɔ́ è ɓɔ!
5Ga è nù n là nɛ̀ɛ̀ yóógɔ̃ dɔsɥ̀ lɵ́,
é gɥ́sìèle yí è pa n là.
6Ga gblɥ́n è nìɛ̀ n zɥ̀,
é bũlà è yaa sɔ́ lì n gɔ̀.
7Ma wɔ̃́gbéè gɥ́ɛ a Yàwɛ ɓɛɛ lɔ̀ɔ̀kǝ̀.
A ma Aaɓi lɔ̀ɔ̀kǝ̀ gbũ̀ɓàle mɔ́ɔ̀wɔ̃̀ ɓà.
È n wò mà yaa kɔ́ ɓɛ gɥ́,
éye tóto n gbɵbɔ wò gɔ̀ nyɛ̀ɛ̀ gbũ n ɓà.
8Lɛ̀kɔ̀ɔɛ kpɔ̃́ànlúlɛ̀ è zùù, é gakǝ̀ dèèdè.
Nakwi gɛ̃̀gbã̀lɛ̀ è zã̀ã̀zã,
é zùù ɓií Yàwɛ è dà nààgɥ́.
9Síégbĩ́ɛ̃́ è go à nyulí gɥ́ dúdúlɵ̀,
é síé nɛ é pǝ mǝ́nlàɛ̀ wãã̀ sɛ̃ síènù wó pǝ gɥ́ɵ́làɛ̀ wó gò à lígɥ́ zùzùlɵ.
10È nakwi ɓɛ blɥ̀ǝ̀ é nu sɛa,
kǝ lakpo tii yà gɛ̃̀ xlɵ̀ɵ̀.
11È yà kɛlɛ́nù tàà, é xlɵ̀ nakwií,
é tà búú ɓɛ gbãnù là.
12È bĩ́tii dɔ́ e de là.
Lakpo gbɥ́ɥ́gbɥ̀ wó kǝ̀ paɥ̀ yí káɛ wó nìɛ̀ à zɥ̀.
13Sɛ̃ síènù nɛ è gbɛ̀ì la nyábɔù gɥ́ à líé.
14Lɛ̀kɔ̀ɔɛ Yàwɛ è wè nɛ̀ɛ̀ gbãdɔ wò lɵ́ naalú lɛ̀ ɓà,
Mɛ É Nań Gbɛ̃ɛ̃ ɓɛɛ è gblà é wo ká.
15Yàwɛ è yaa srṹṹnù zùò é à dǝgbɵnù wó pɛ̃̀,
à ɓà la nyábɔù gɥ́ɛ é wo bɔ wó lo blàa.
16Sɛalɛ̀ é yóó xlɵ̀ɵ̀ɛ̀ è zɔ̃̀ plãlà,
é lɛ́ è go kpónlà gɛ̃̀gbã̀lɛ̀ là.
Lɛ̀ Yàwɛ ɓɛ é wɔ̃́gbéè bìɛ̀ e dǝgbɵnù ká,
é ŋlà wo ɓa yaa nàzòà gɥ́ɛ ká.
17Yàwɛ ɓɛ yè gò nan é nu sɛa é n sɥ̀lúú,
é n ɓo yígrù gbɛ̃̀ɛ̃̀ nù ɓɛ ɓàà.
18È n ɓò n dǝgbɵnù gɥ́gbéèzǝ̀ kwɛɛ
é n ɓo mɛ̀nù n lɔ̀nyiɛ wo ɓàɛ̀ kwɛɛ
n kɔ̀ gbɛ yaá mɔ̀ wo ɓà.
19Yiá kǝà wɔ̃́gbéè gɥ́ɛ, wò nù n gɔ̀,
kǝ Yàwɛ ɓɛ yè n tàkòzǝ̀.
20Yè gbũ̀ n ɓà é n ɓo lɛ̀ gblɥ́nzǝ̀ ɓà.
Yè n là ɓií à zòɔ grúlì n mɔ́ɔ̀wɔ̃̀gɥ́.
21Yàwɛ è wɔ̃́ zǝ nù n lǝ nɛzɛ̃ã n kǝ wɔ̃̀ lɵ́ ká kpenlɵɛ lɵ́.
É lúàkpɔ n ɓà ɓií n kɔ̀ yaâ wɔ̃́yaa gɥ́.
22Wɛakũɛ à to Yàwɛ zòkṹwɔ̃̀ kǝɥ̀ píé kplàɓo,
n ká gó Aaɓi píé ã́ã̀ kɛ̃ayààwɔ̃̀ kǝ gbɛɛɓo dó.
23Ƃií à tɛ̃ã̀ sáálɵɛ wò n nyaàká,
àmɔ́ɔ̀wɔ̃̀ gɥ́ɛ n ká à ɓà tɔn dà n kɔ̀tàà dó.
24Yàwɛ yà gɥ́dɔ̀ nɛ̀ɛ̀ gèè yaâ n ɓà,
nɛ̀ɛ̀ má n dè kṹsɛa kɵ́kǝ̀ á nù wɔ̃́yaa kǝ.
25Lɛ̀ é pɵ́ɛ, yà wɔ̃́zǝnù n lǝ nɛ̀zɛ̃ã n kǝ wɔ̃̀ lɵ́ ká kpenlɵɛ lɵ́,
ɓií yà gɥ́dɔ̀ nɛ̀ɛ̀ n kɔ̀ yaâ wɔ̃́yaa gɥ́.
26Óó Yàwɛ, ɥɥ zòdɔ̀ mɛnù wóo zòdɔ ɥ ɓàɛ̀ ɓà,
ɥɥ dè zɔ̃̀ nɛ̀ɛ̀ ɥ kpenlɵ mɛ é kpenlɵɛ lǝ̀.
27Ч púú mɛnù wo zòɔ lɵ́ púúɛ wo lǝ̀,
kǝǝ ɥɥ wɥǝ kpo dɔ̀ mɛ é sɔn lɵ́ yàɛ ɓà.
28Mɛnù wó dèsɥ̀téé mɛ̀ káɛ ɥ wo là,
kǝǝ mɛnù wó dèsɥ̀và mɛ̀ káɛ ɥ nù wo ká sɛa.
29Yàwɛ, ɓi ɥ́ tɔɔ ma lɛ̀púúlɛ̀,
ma Aaɓi, ɥ lò lɛ̀po lɛtrɵ̀ n là nɛ̀ gɥ́.
30Ƃi ɥ́ gɥ́gbéèlɛ̀ nu n lǝ̀ ã́ã̀ kózǝ n dǝgbɵnù ká
ɥ́ píígbéèlɛ̀ nu kǝ ã́ã̀ bɔ waa sã́ã́nù là.
31Aaɓi é nɛ̀ à kǝwɔ̃̀ è kpenlɵ,
zɛ̃ã mlǝ̀ǝ̀zǝ̀ à wònù wô ká zòdɔ̀àzǝ̀ pɵ́e!
Ye é ɓɛ è kɛ̃̀ɛ̃̀ lɛ lɵ́
mɛ sáálɵ wô mɛɛ̀là nyɛ̀ɛ̀ wo tàkpààɛ̀ lǝ̀.
32Yàwɛ ɓɛ à sróó é tɔɔ Aaɓi.
Aaɓi sróó é tɔɔ yia gùǝ̀.
33Aaɓi é nɛ̀ é tɔɔ ma sã́ã́ gbéè.
Ye é n gɛ̃̀ ye lɛ̀ pǝ̀kǝ̀ é kǝ̀ sǝ̀.
34Ye é n gɛ̃̀ kǝ̀ nɛ̀ɛ̀ sòòlà wɥ̀nù gɛ̃̀ lɵ́
ê kǝ̀ á tà tɔ̃̀píélɛ̀nù ɓà pǝ́ǝ́pǝ̀ ká.
35Ye é n dã̀ã̀ grùkǝsɥ̀ mɔ́ɔ̀wɔ̃̀ã̀,
àmɔ́ɔ̀wɔ̃̀ gɥ́ɛ, à pìɛsào kòò n kɔ̀ ká.
36Óó Yàwɛ, ɓá n gbà lɛ é làsɥ̀ káɛ ká,
ɓa gbũ̀ɓàle yà n kǝ mɛ và dèèdè ká.
37Ƃá n dɔ̀lɛ̀ kǝ gbɛà tɛ́nɛ́ tɛ̀nɛ̀,
lɛ̀ é pɵ́ɛ n gɛ̃̀ ká ló drɔɔ̀.
38Má n dǝgbɵnù kǝ̀ blàaɛ á wo gɥ́sìè.
Maa yiɛ n zɥ́, é toàpɵ́ á wo gɥ́síé fɛfɛlɵ̀.
39Má wo zǝpǝáɛ wáá wruùlú gbɔ.
Wo gɵ̀ɵ̀kpǝ̀nù wròsɛa n líé.
40Ƃií wɛakũɛ, ɓá n tàkṹ gɥ́gbéèlɛ̀ ká kǝ ã́ã̀ kózǝ grùà.
Mɛnù wó wrùù n gɔɛ, wà ló n gɛ̃̀ xlɵ̀ɵ̀.
41Baazɥ́ɛ ɓâ kǝ̀ n dǝgbɵnù wà duà n lǝ̀,
mɛ n lɔ̀nyiɛ wo ɓàɛ, má wo gɥ́sìè.
42Wò gbũ̀ɓàle mɛ̀ɛ̀, kǝǝ mɛgbɛ ká wo gɔ̀la.
Wò gbɵbɔ Yàwɛ dèpíé, kǝǝ yaa è tóto wó wo gɔ̀ gbɛɛɓo.
43A yèèyè wo là wó kǝ̀ nɛ̀ɛ̀ muù lɵ́ wɛ́á,
á tààta wo là nɛ̀ɛ̀ mɛ è tà bɵɥ̀ gɥ́ kpìnpíéɛ lɵ́.
44Ч n là dɔ̀ n gɔ̀ nyǝ́n mɛ̀nù gɔ̀,
ɥ́ ma ɓɔ̀u gɛ̃̀ĩgbã̀ sɛ́gɔ̀nù ɓɛ làluo.
Mɛnù n ká wo dɔ líéɛ wà kǝ yuɔkǝ̀ n ɓà mɛnù ká.
45Sɛ́gbɛ gɥ́mɛ̀nù lò nu n píé zùùsɥ̀ ká,
é wà n tàà mà nǝ̀ǝɛ, wò n ɓlɛ̀kpɔ, wó n wò kǝ̀.
46Wo zòɔ yà dàzrɥɵ,
é wo bũ lɵ́ zùùlà wo ɓà waà gòa wo bĩ̀lɛ̀nù ɓà.
47Yàwɛ è ɓéì, yè é ma guǝ káɛ, lúàkpɔ́sɥ̀ mɥ̀à ɓà.
Gó Aaɓi é ma làsɥ̀ ká, é mà guǝ káɛ, à tɔ è ló luo.
48Mɛ é n gbɔ̀ɓoɛ, yè tɔɔ Aaɓi,
ye ê kǝ n dǝgbɵnù wó lo n xlɵ̀ɵ̀.
49Yàkǝɛ è n gɔ̀ là n dǝgbɵzǝ̀ wó ma grúnù káɛ wo gɔ̀.
Óó Yàwɛ, ɓi ɥ́ kɔ̀ziesɥ̀ nu n lǝ̀ n dǝgbɵnù là,
ɥ́ n bĩ̀lɛ̀ɓo pǝgbéè kǝ gɔ̃̀ɔ̃̀nù gɔ̀.
50Lɛ̀ é pɵ́ɛ a ɥ tɔ́ɓɔ̀ sɛ́gɔ̀nù ɓɛ soń,
á tã́ ɓo ɥ tɔ́ píé ɥ tɔ́ɓɔsɥ̀ ká.
51Aaɓi è kɔ̀zíé sɥ̀ và nù mà àɓà kíŋ káɛ n lǝ̀,
yà tòapɵ́ lɔkǝà zɔ̃̀ mɛ é nyɔ̃́wro yi tuo,
yí mɥ̀ ma Dèɓé, nyià ma nɔ́ɔ̀nù káɛ yi lǝ̀ tòapɵ́ká.
