Wóɖómà 6

À mɛ́ ɓó nàmàǔn gbo, kɛɛ à cĩ́ ɖé Kɛ́ɖɛ́ì mú

1Ɔ jèɛɛ, xwɛ̌ à mɛ ɖáá? À mɛ nì nàmàǔn nyuɛń tee, ɓɛ́ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ ké dyí vòɛ̌n ziì? 2Hée, ɔ se ɓéɖé ɓɛ́ ɔ ké ná nì. À hwòɖǒ-dyùà ɖǎ ma mɛ́ ɓó nàmàǔn nyu jè. Kà ɔ nìà náa, nìí, xwɛ̌ à ɓɛ́ìn nàmàǔn mú cĩ́ɛ ɖeɛ́? 3À séín ɓě ɖǎà níɔ kpá, ké ɔ nyuɛ ké à kè Kɛ́ɖɛ́ì Jízɛ̀ ɖǎà nyɔ dyúáɖò jǔɛɛ, ɓěà seɛ dyí dyuò kà ti ɓɛ́ à kpá ma níɔ kɛɛ, à kè Kɛ́ɖɛ́ì peɖeìn ɔ mɛ́-mɛ́ɔ̀ múɛɛ̀? 4Ɖɛa jè, ti ɓɛ́ à kpá ma níɔ kɛɛ, à kèɔ̀ kè mɛ́ ma, ké wa zà ma à kèɔ̀ kè dyóɖóún. Ɖɛa kpá ma ná, ɓɛ́ kà Gèɖèpɔ́ɔ̀ dĩ́ín-dĩ̀ìnɔ̀ zà ma Kɛ́ɖɛ́ì gĩɔ kɛɛ, kà dyúáɖòɔ̀ kǎà à mɔ̀ùn ké fɛ̀ɛ̀ ɖìè mú cĩ́ ɖekè.

5Mɛ́-mɛ́ ɓɛ́ à nyuà kɛ ɔ kè Kɛ́ɖɛ́ì nììn mɛ́-mɛ́ ɓɛ́ ɔ nyu ma kà kɛɛ hwɔìn ní. Ké ɔ nyuɛ ké à kèɔ̀ kè mɔ̀ǎ nyɔ dyúáɖò. Ɔ dyi ná nìǐn, nìí, à kèɔ̀ kè mu nyɔ dyúáɖò jǔùn ɓɛ́ à ké gĩɔ wóɖó kà ɔ nyu ma kà gĩɔ wóɖóɛ ɖekèɛ. 6À dyuò kà ɔ kè nyɔ ɓɛ́ à jǔ ma kà kĩ́ín nyɛɛ mɛ́ ma ɓó kɔ́ɖɔ́sìɔ̀ kɔ̃, ɓɛ́ nàmàǔn-hwòɖò ɓɛ́ ɔ nì ma kà à múɛɛ ké ma mú gbɔɔ̀, ɓɛ́ à ké se nàmàǔn gǐì jǔ ɖeɛ, 7sepóɛɖé nyɔ mɔ̀ nyɔ ɓɛ́ ɔ ɖǎ ma kà mɛ́ɛ, ɔ ɖǎ nàmàǔn xwaún buɛ̀. 8Kɛɛ ɔ jǔ ké à kè Kɛ́ɖɛ́ì ɖǎ mɛ́ín, nìí, à poɛ jǎà kà ɓɛ́ à kèɔ̀ kè mu cĩ́ìn ɖekèɛ, 9sepóɛɖé à dyuòɛ̀ dyí kà ɓɛ́ Gèɖèpɔ́ɔ̀ zà ma Kɛ́ɖɛ́ì gĩɔ, ké ɔ se mɛ́ɛ mu ɖeɛ. Gĩɔ se ɔ kpé kɔ̃ún kɔ̃̀ ɖe. 10Mɛ́-mɛ́ ɓɛ́ ɔ nyu ma kà kɛɛ, ɔ mɛ́ ma ɓó nàmàǔn gbo gàná cá, ké cĩ́-cĩ́ ɓɛ́ ɔ cĩ́à kàǔn wɛ̃ɛ, ɔ cĩ́ ɓó Gèɖèpɔ́ɔ̀ gbo. 11Kà dyúáɖòɔ̀ kǎà ɓě mɔ̀ùn mɛ nyu ɓě mìɔùn kà nyɔ ɖǎɔ̌ kà mɛ́ɛ ɓó nàmàǔn gbo, ké ɓě mɛ nyu ɓě mìɔùn kà nyɔ nìà cĩ́ɛń ɓó Gèɖèpɔ́ɔ̀ gbo ɖé Kɛ́ɖɛ́ì Jízɛ̀ mú kɛ.

12Ɔ jèɛɛ, ɓěǐn ɖá ɓɛ́ ɓě ké wɔ̃́, ɓɛ́ nàmàǔn ké ɓěɛ̀ kpóɖó-dyùà ɓɛ́ ɔ muà mɛ́ìn nyɛɛ wuɖuí kɔ̃̀, ɓɛ́ ɔ kéɛ nyu ɓɛ́ ɓě ké ɓěɛ̀ hwòɖǒ-dyùà mɔ́ɔ́-ɖɛ̀ ɓěɔ̀ nyu. 13Ɓěǐn ɖá ɓɛ́ ɓě ké ɓěɛ̀ kpóɖó-dyùàɔ̀ wáká ɓěɔ̀ nàmàǔn nyí ɖe, ɓɛ́ ɔ ní kɔ̃̀ ɖà ɔ ɖɛ gbà mú-nyùìn-ɖɛ̀ mú nyu. Kɛɛ ɓě mɛ nyí ɓě mìɔùn Gèɖèpɔ́ɔ̀ kà nyɔ ɓě ɓɛ́ wa ɖǎà mɛ́, ké wa ɖǎ gĩɔ wóɖóɛɛ nìà kɛ. Ké ɓě mɛ nyí ɓěɛ̀ kpóɖó-dyùàɔ̀ wáká ɓěɔ̀ Gèɖèpɔ́ɔ̀, ɓɛ́ ɔ ké wa dyí-sɛ́ɖɛ́ìn-ɖɛ̀ mú-nyùìn-ɖɛ̀ mú nyu. 14Sepóɛɖé nàmàǔn se ɓě kpé kɔ̃ún kɔ̃̀ɔ̌ mu. Ɓě se gma xwíɖíi nì ɖe, kɛɛ ɓě nìǎ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ xwíɖíi.

Dyí-sɛ́ɖɛ́ìn-sɛ́ɖɛ́ìn gǐì ɓě

15Ɖɛ́ kɔ ɓó dyíɛ́? À se gma xwíɖíi nì, ké à nìǎ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ xwíɖíi jèɛɛ, à mɛ nyu nàmàǔnǹ? Hée, ɔ se ná nì. 16Ɓě seɛ dyí dyuò kà ɔ jǔ ké ɓě dyi ɓě mìɔùn nyɔ ɖò nyí, ɓɛ́ ɓě ké ɔ gǐì jǔ, ɓɛ́ ɓě ké ɔ wuɖu nyuín, nìí, ɓě mɔ̀ǎ nyɔ kɔ̃̀ wuɖu ɓɛ́ ɓě nyuà kɛɛ gǐìɛɛ̀? Ɓě dyi nàmàǔn gǐì jǔ ní, ɔ dyà mɛ́-mɛ́. Kɛɛ ɓě dyi Gèɖèpɔ́ɔ̀ wuɖu nyu ní, ɖɛa dyà dyí-sɛ́ɖɛ́ìn-sɛ́ɖɛ́ìn. 17Ɓě mɔ̀ ma nàmàǔn gǐì kĩ́ín. Kɛɛ à po Gèɖèpɔ́ɔ̀ zùo, sepóɛɖé ɓěɛ̀ hwòɖǒ wɔ̃́, ké ɓě kpɔ̃ tɛ̀mɛ̀ìn-ɖɛ̀ ɓě ɓɛ́ wa zàìn ma ɓě xwáɖáún wɛ̃ɛ dyi. 18Ké ɓě ɖǎ nàmàǔn xwaún pó, ké ɓě mɔ̀ǎ dyí-sɛ́ɖɛ́ìn-sɛ́ɖɛ́ìn gǐì. 19Ḿ nì ɓě gbo wùɖùɛ̌n nyɔǔn-dyù-kà, sepóɛɖé ɓě mɔ̀ nyɔǔn-dyù, ké ɓě hwɛ̀ kpéí. Kĩ́ín-kĩ́ín nyɛɛ, ɓě tò ma ɓěɛ̀ kpóɖó-dyùàɔ̀ wáká ɓěɔ̀, ɓɛ́ wa ké nàmàǔn kpeɖe gbà kũ̀à nyu, ɓɛ́ wa ké gma wáɖá, ɓɛ́ gma-wáɖá-wáɖáɔ̀ ké kɔ̃ kpá. Ɓó kàǔn wɛ̃ɛ, ɓě mɛ tò ɓěɛ̀ kpóɖó-dyùàɔ̀ wáká ɓěɔ̀, ɓɛ́ wa ké dyí-sɛ́ɖɛ́ìn-ɖɛ̀ nyu, ɓɛ́ kɛɛ ɖò ké se ɓěɛ̀ cĩ́-cĩ́ɔ̀ mú nì.

20Ti ɓɛ́ ɓě mɔ̀ ma nàmàǔn gǐìɛɛ, ɓě pó ma ɖé dyí-sɛ́ɖɛ́ìn-sɛ́ɖɛ́ìn xwaún. 21Kɛɛ ɖɛ ɓě kɔ̃̀ jè dɛ̃ nyuà ɓě kàǔn wɛ̃ɛ, ɖɛ́ ɓě dyé ma wa kɔ̃ún wɛ̃́? Ɖɛ ɓěa sèìn-naín mɔ̀ mɛ́-mɛ́. 22Kɛɛ ɓě ɖǎ nàmàǔn xwaún pó, ké ɓě mɔ̀ǎ Gèɖèpɔ́ɔ̀ gǐì. Ké ɖɛ ɓě dyéɛ kɔ̃ún kàǔn wɛ̃ɛ mɔ̀ cĩ́-cĩ́ se kɛɛ ɖò ɓéɖéɛ, ké ɖé ɔ mánáín nyɛɛ, ɔ mɔ̀ sè-ná-sèɛ̀ fɛ̀ɛ̀. 23Sepóɛɖé ɖɛ ɓɛ́ nàmàǔn pɛ́ɛ̀ nyɔ kɛɛ mɔ̀ mɛ́-mɛ́, kɛɛ ɖɛ ɓɛ́ Gèɖèpɔ́ɔ̀ nyí nyɔ ɓó pídyiɛɛ, ɔ mɔ̀ sè-ná-sèɛ̀ fɛ̀ɛ̀ ɖé Kɛ́ɖɛ́ì Jízɛ̀ mɔ̀à à Bounɓoɔ̀ kɛɛ mú.

Currently Selected:

Wóɖómà 6: ƁB02

Highlight

Copy