Popular Bible Verses from Wóɖómà 6

Share

Sepóɛɖé ɖɛ ɓɛ́ nàmàǔn pɛ́ɛ̀ nyɔ kɛɛ mɔ̀ mɛ́-mɛ́, kɛɛ ɖɛ ɓɛ́ Gèɖèpɔ́ɔ̀ nyí nyɔ ɓó pídyiɛɛ, ɔ mɔ̀ sè-ná-sèɛ̀ fɛ̀ɛ̀ ɖé Kɛ́ɖɛ́ì Jízɛ̀ mɔ̀à à Bounɓoɔ̀ kɛɛ mú.

Sepóɛɖé nàmàǔn se ɓě kpé kɔ̃ún kɔ̃̀ɔ̌ mu. Ɓě se gma xwíɖíi nì ɖe, kɛɛ ɓě nìǎ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ xwíɖíi.

Ɖɛa jè, ti ɓɛ́ à kpá ma níɔ kɛɛ, à kèɔ̀ kè mɛ́ ma, ké wa zà ma à kèɔ̀ kè dyóɖóún. Ɖɛa kpá ma ná, ɓɛ́ kà Gèɖèpɔ́ɔ̀ dĩ́ín-dĩ̀ìnɔ̀ zà ma Kɛ́ɖɛ́ì gĩɔ kɛɛ, kà dyúáɖòɔ̀ kǎà à mɔ̀ùn ké fɛ̀ɛ̀ ɖìè mú cĩ́ ɖekè.

Ɓěǐn ɖá ɓɛ́ ɓě ké ɓěɛ̀ kpóɖó-dyùàɔ̀ wáká ɓěɔ̀ nàmàǔn nyí ɖe, ɓɛ́ ɔ ní kɔ̃̀ ɖà ɔ ɖɛ gbà mú-nyùìn-ɖɛ̀ mú nyu. Kɛɛ ɓě mɛ nyí ɓě mìɔùn Gèɖèpɔ́ɔ̀ kà nyɔ ɓě ɓɛ́ wa ɖǎà mɛ́, ké wa ɖǎ gĩɔ wóɖóɛɛ nìà kɛ. Ké ɓě mɛ nyí ɓěɛ̀ kpóɖó-dyùàɔ̀ wáká ɓěɔ̀ Gèɖèpɔ́ɔ̀, ɓɛ́ ɔ ké wa dyí-sɛ́ɖɛ́ìn-ɖɛ̀ mú-nyùìn-ɖɛ̀ mú nyu.

À dyuò kà ɔ kè nyɔ ɓɛ́ à jǔ ma kà kĩ́ín nyɛɛ mɛ́ ma ɓó kɔ́ɖɔ́sìɔ̀ kɔ̃, ɓɛ́ nàmàǔn-hwòɖò ɓɛ́ ɔ nì ma kà à múɛɛ ké ma mú gbɔɔ̀, ɓɛ́ à ké se nàmàǔn gǐì jǔ ɖeɛ

Kà dyúáɖòɔ̀ kǎà ɓě mɔ̀ùn mɛ nyu ɓě mìɔùn kà nyɔ ɖǎɔ̌ kà mɛ́ɛ ɓó nàmàǔn gbo, ké ɓě mɛ nyu ɓě mìɔùn kà nyɔ nìà cĩ́ɛń ɓó Gèɖèpɔ́ɔ̀ gbo ɖé Kɛ́ɖɛ́ì Jízɛ̀ mú kɛ.

Ɔ jèɛɛ, xwɛ̌ à mɛ ɖáá? À mɛ nì nàmàǔn nyuɛń tee, ɓɛ́ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ ké dyí vòɛ̌n ziì? Hée, ɔ se ɓéɖé ɓɛ́ ɔ ké ná nì. À hwòɖǒ-dyùà ɖǎ ma mɛ́ ɓó nàmàǔn nyu jè. Kà ɔ nìà náa, nìí, xwɛ̌ à ɓɛ́ìn nàmàǔn mú cĩ́ɛ ɖeɛ́?

Ɓě seɛ dyí dyuò kà ɔ jǔ ké ɓě dyi ɓě mìɔùn nyɔ ɖò nyí, ɓɛ́ ɓě ké ɔ gǐì jǔ, ɓɛ́ ɓě ké ɔ wuɖu nyuín, nìí, ɓě mɔ̀ǎ nyɔ kɔ̃̀ wuɖu ɓɛ́ ɓě nyuà kɛɛ gǐìɛɛ̀? Ɓě dyi nàmàǔn gǐì jǔ ní, ɔ dyà mɛ́-mɛ́. Kɛɛ ɓě dyi Gèɖèpɔ́ɔ̀ wuɖu nyu ní, ɖɛa dyà dyí-sɛ́ɖɛ́ìn-sɛ́ɖɛ́ìn.

Ɓě mɔ̀ ma nàmàǔn gǐì kĩ́ín. Kɛɛ à po Gèɖèpɔ́ɔ̀ zùo, sepóɛɖé ɓěɛ̀ hwòɖǒ wɔ̃́, ké ɓě kpɔ̃ tɛ̀mɛ̀ìn-ɖɛ̀ ɓě ɓɛ́ wa zàìn ma ɓě xwáɖáún wɛ̃ɛ dyi. Ké ɓě ɖǎ nàmàǔn xwaún pó, ké ɓě mɔ̀ǎ dyí-sɛ́ɖɛ́ìn-sɛ́ɖɛ́ìn gǐì.