Wóɖómà 7

Wa poìn gmaɔ̀ nyɔ́nɔ́-dyi-kpɔ̃-kpɔ̃ dyí

1Ní ɖíí ɓě, ḿ nì ɓě dyuòà gmaɔ̀ dyíɛɛ gbo wùɖùɛ̌n. Ɓě seɛ dyí dyuò kà ɔ jǔ ké nyɔ ɖò dyi cĩ́ɛń nì ke ní, kà gmaɔ̀ kɔ̃̀ ɔ kpé kɔ̃ún wɛ̃ɛ̀? 2Ɔ hwɔìn-ɖɛ̀ mɔ̀, màa ɓéɖéà dyú-ɓǎ kɛɛ, ɔ nì gma xwíɖíi ɖé ɔ dyú-ɓǎɔ̀ xwaún kà ɓɛ́ dyú-ɓǎɔ̀ nì cĩ́ɛń keɛ. Kɛɛ ɔ jǔ ké ɔ dyú-ɓǎɔ̀ dyi mɛ́ín, nìí, ɔ ɖǎ gma ɓá ɔ dyú-ɓǎɔ̀ dyíɛɛ xwaún buɛ̀. 3Ɔ jèɛɛ, ɔ dyú-ɓǎɔ̀ dyi cĩ́ɛń nì ke, ké ɔ kè gàa kà kò ɖò dyi mú niìn ní, nìí, wa mu ɔ gmaɖe-po-nyɔ̀ ɖáìn. Kɛɛ ɔ dyú-ɓǎɔ̀ dyi mɛ́ín, nìí, ɔ ɖǎ gmaɔ̀ xwaún buɛ̀. Ɔ jǔ ké ɔ kè gàa kà kò ɖò dyi mú niìn ní, nìí, ɔ se gmaɖe-po-nyɔ̀.

4Ní ɖíí ɓě, ɓá gmaɔ̀ dyíɛɛ, kà dyúáɖòɔ̀ kǎà ɓě mɔ̀ùn ɖǎ mɛ́, sepóɛɖé ɓě mɔ̀ Kɛ́ɖɛ́ìɛ̀ kpóɖó-dyùàɔ̀ ɖò. Ɔ nì ná, ɓɛ́ ɓě kéá nyɔ kà kò ɖò nììn nyɔ jǔ, ɓɛ́ ɓě kéá Gèɖèpɔ́ɔ̀ nììn kpeɖe nyu. Nyɔ kɔ̃̀ nyɔ ɓě kéà jǔɛɛ, ɔ mɔ̀ nyɔ ɓɛ́ Gèɖèpɔ́ɔ̀ zà ma kà gĩɔ kɛ. 5Ti ɓɛ́ à mìɔùn nììn mɔ́ɔ́-ɖɛ̀ kɔ̃̀ ma à wuɖuí keɛɛ, gmaɔ̀ nyuɛ ké à ɖɛ gbà ɓěɔ̀ tó nyu à nììn. Ké ɖɛ ɓě nìà kɛ nyùìn ma à kpóɖó-dyùàɔ̀ wáká ɓěɔ̀ kũ̀à mú, ké à nyu ma ɔ kpeɖe. Ké kpeɖe ɓě à nyuà kɛɛ dyà ma mɛ́-mɛ́. 6Kɛɛ à ɖǎ gmaɔ̀ xwaún buɛ̀ kàǔn, sepóɛɖé ɔ nì kà à ɖǎ mɛ́ ɓó ɖɛ kpɔ̃ ma kà à dyi kóɖó-kóɖó kɛɛ gboɛ. Ké à ɓiè Gèɖèpɔ́ɔ̀ ɖé hwìè ɖìè ɓɛ́ ɔ mɔ̀à Zùùɔ̀ nììn hwìèɔ̀ kɛɛ mú. Ké à se Gèɖèpɔ́ɔ̀ ɓiè ɖé hwìè sùà ɓɛ́ ɔ mɔ̀à gma ɓɛ́ ɔ céèà kɛɛ xwíɖíi nì-nìɛɛ mú.

Gmaɔ̀ kè nàmàǔn

7Nìí, xwɛ̌ ɓěà mɛ ɖáá? Ɓěà mɛ ɖá gmaɔ̀ mɔ̀ nàmàǔnǹ? Hée, ɔ se ná nì. Kɛɛ ɔ seɔ́ má gmaɔ̀ jèǐn, nìí, ḿ seɔ́ nàmàǔn dyí dyuòɛ̌ mu. Gmaɔ̀ seɔ́ máa cɛ̃, ɓɛ́ ɔ kéɔ́ níiń, “Ɓě ɖò ní ɖá ɓɛ́ ɓě mǔè ɖòɛ̀ kɔ̃̀ɔ̀-ɖɛ̀ɛ̀ kɔ̃̀-tò ké ɓě nyuo” ní, nìí, ḿ seɔ́ ɖɛ mɔ̀ ɖɛ gbà kɛɛ tó dyí dyuòɛ̌ mu. 8Nàmàǔn dyé ma ti dyììn ɖé gmaɔ̀ mú, ké ɔ dyà ma ɖɛ gbà kã̀ìn-kã̀ìn tó ɖé ḿ mú. Dɛ̀ ɓɛ́ gma ɖò se nìɛɛ, nàmàǔn mɔ̀ ɖɛ mɛ́-mɛ́ ɖé. 9Ḿ nì ma cĩ́ɛń kĩ́ín, ké ḿ se ma gma ɖò ɓéɖé. Kɛɛ ti ɓɛ́ gmaɔ̀ dyi ma kɛɛ, nàmàǔn sɔ̀ ma dyí, ké ɔ mɔ̀ǎ ma ɖɛ cĩ́-cĩ́. Púɛɛ, mɔ́ún mɛ́ ma cá. 10Gma jɛ́ɛ́ ɓɛ́ ɔ kéɔ́ fɛ̀ɛ̀ dyà kɛɛ dyà ma ní mɛ́-mɛ́. 11Sepóɛɖé nàmàǔn dyé ma ti dyììn ɖé gmaɔ̀ mú, ké ɔ cá ma ḿ, ké ɔ ɖáɓáìn ma ḿ gmaɔ̀ dyí.

12Ɖɛa kɔ̃̀ jè gmaɔ̀ mìɔùn hwɛ̀ mú, ké ɖɛ ɓɛ́ ɔ cɛ̃ɛ hwɛ̀ mú, ké ɔ sɛ́ɖɛ́ìn dyí, ké ɔ nɔ̀mɔ̀ dyíin. 13Ké ɖɛ nɔ̀mɔ̀à dyíin nyɛɛ, ɔ mɔ̀ nyɔ dyà ma kà ḿ níǐn mɛ́-mɛ́ɔ̀ kɛ̀e? Hée, ɔ se ná nì. Ɖɛ ɖáɓá ma kà ḿ wɛ̃ɛ mɔ̀ ma nàmàǔn. Ké ɖé ɖɛa múɛɛ, nàmàǔn tɛ̀mɛ̀ìn ɖɛ ɔ jǔ jɛ́ɛ́ kɛɛ nyɔǔn dyí. Ɔ ɖú ɖɛ nɔ̀mɔ̀ dyíin dyí, ɓɛ́ ɔ kéɛ nyu ɓɛ́ ḿ ké mɛ́. Ɔ jèɛɛ, dyììn ɖé gmaɔ̀ múɛɛ, nàmàǔn zi ma dyíin nyìnìɛ̌n mìɔ.

Vɔ̃-vɔ̃ nì ɖé nyɔǔn-dyù múɛ

14À dyuòɛ̀ dyí kà ɓɛ́ Zùùɔ̀ mɔ̀ nyɔ tò gmaɔ̀ kɛ. Kɛɛ ḿ mɔ̀ nyɔǔn-dyù fóɖóún pū. Ké nàmàǔn ɖǎ ma ḿ dɔ̃, ɓɛ́ ḿ ké ɔ gǐì jǔ. 15Ḿ se ɖɛ ɓě ɓɛ́ ḿ mìɔùn nyuɛɛ múin wɔ̃́ɔ ɓɛ́ìn, sepóɛɖé ḿ se ɖɛ ɓɛ́ ḿ mɔ́ ḿ kéɔ́ nyuɛɛ nyu, kɛɛ ɖɛ jɛ́ɛ́ ɓɛ́ ḿ nyɛ́ múɛɛ, ɖé ḿ nyu. 16Ɔ jǔ ké ḿ dyi ɖɛ ḿ se mɔ́ ɓɛ́ ḿ ké nyuɛɛ nyuín, nìí, ɔ xwíníín mɔ̀, ḿ wɔ̃́ìn gbo kà ɓɛ́ gmaɔ̀ nɔ̀mɔ̀ dyíin nyɛ. 17Ɔ jèɛɛ, nyɔ nìà ɖɛa nyuɛń nyɛɛ, ɔ se mɔ̄ ɖe, kɛɛ ɔ mɔ̀ nàmàǔn ɓɛ́ ɔ cĩ́à ɖé ḿ múɛ. 18Sepóɛɖé ḿ dyuòɛ̀ dyí kà ɖɛ nɔ̀mɔ̀ dyíin ɖò se ɖé ḿ mú cĩ́ɛ. Ɔ mɔ̀ ɖé ḿ mìɔùn nììn mɔ́ɔ́-ɖɛ̀ mú. Ɖɛ nɔ̀mɔ̀ dyíin nyɛɛ nyu-tò nyu ḿ ní, kɛɛ ḿ seɛ nyuɛ ɓɛ́ìn. 19Sepóɛɖé ḿ se nɔ̀mɔ̀ dyíin ɓɛ́ ḿ mɔ́ ɓɛ́ ḿ kéɔ́ kà nyuɛɛ nyu, kɛɛ ɖɛ mɔ̀ ɖɛ gbà, ɓɛ́ ḿ se mɔ́ ɓɛ́ ḿ kéɔ́ kà nyuɛɛ, ɖéɛ̀ ní nyu. 20Kɛɛ ɔ jǔ ké ḿ dyi ɖɛ ḿ se mɔ́ ḿ kéɔ́ nyuɛɛ nyuín, nìí, nyɔ nìà nyuɛń nyɛɛ se ḿ ɖe, kɛɛ ɔ mɔ̀ nàmàǔn ɓɛ́ ɔ cĩ́à ɖé ḿ múɛ.

21Ɔ jèɛɛ, ḿ dyé gma nìà kɛ. Ɔ mɔ̀, ɔ jǔ ké ḿ dyi ɖɛ nɔ̀mɔ̀ dyíin nyuɛ mɔ́ ní, nìí, ɖɛ gbà xwɛ̃́ìn ḿ bũ̌in. 22Sepóɛɖé ɖé ní hwòɖǒ-dyùàɔ̀ dyéɖéí vɛ̃in cáa, ní hwòɖǒ dèìn ɖé Gèɖèpɔ́ɔ̀ gmaɔ̀ múin, 23kɛɛ ḿ dyé gma kà kò ɖò ɖé ní kpóɖó-dyùàɔ̀ wáká ɓěɔ̀ mú, ké ɔ kè gma ɓɛ́ ní hwìɖǐi-poìn-hwòɖò-dyùàɔ̀ mɔ́à kɛɛ, wa nì gbo vɔ̃ǐn. Ké ɔ nyuɛ ké ḿ mɔ̀ kpɔɖɔ-ɖeín-nì-nyɔ̀ ɖé gma ɓɛ́ ɔ nìà ɖé ní kpóɖó-dyùàɔ̀ wáká ɓěɔ̀ múɛɛ xwaún. Ɔ mɔ̀ nàmàǔn nììn gma. 24Kē! Ḿ se kà múà ɖò ɓéɖé fɔɔ! Nyɛ́ mɔ̀ nyɔ mu ḿ kpóɖó-dyùà ɓɛ́ ɔ nìà ní mɛ́-mɛ́ dyàǔn wɛ̃ɛ xwaún buɛ̀ìn nyɛ́? 25Gèɖèpɔ́ɔ̀ mɔ̀ nyɔ muɛ náa nyuùn dyììn ɖé Jízɛ̀ Kɛ́ɖɛ́ì mɔ̀à à Bounɓoɔ̀ kɛɛ mú. À po Gèɖèpɔ́ɔ̀ zùo. Ké kà ɔ nyu nìɛ̀ kɛɛ, ɔ kɛà kɛ̀. Gèɖèpɔ́ɔ̀ gmaɔ̀ kɔ̃̀ ní hwìɖǐi-poìn-hwòɖò-dyùàɔ̀ wuɖuí, kɛɛ nàmàǔn nììn gmaɔ̀ kɔ̃̀ ḿ mìɔùn nììn mɔ́ɔ́-ɖɛ̀ wuɖuí.

Currently Selected:

Wóɖómà 7: ƁB02

Highlight

Copy