Wóɖómà 14

Mɔ̀ǔn ɖá m̀ ké m̀ ɖíí ɖò zaa kpɔ̃̀ìn

1Nyɔ ɖò séè dyi ku ɖé ɔ hwìɖǐǐ-taɓa-taɓa mú ke ní, nìí, ɓě mɛ kpɔ̃ ɔ jè dyi, kɛɛ ɔ se ɖɛ ɓɛ́ ɓě kèɔ̀ kè ké ɔ nììn fɔ̀nɔ̀-hwòɖǒ dòǐn zà kɛ. 2Nyɔ ɖò ɓɛ́ìn hwìɖǐǐ-taɓa-taɓa ɓéɖéɛ, ɓɛ́ ɔ ké ɖii-ɖɛ̀ kã̀ìn séín ɖi, ɓɛ́ nyɔ tɔ̀ɔ̀ séèà dyi ku keɛɛ mɔ̀ùn ké sɛ́nɛ́ ɓéɖé. 3Nyɔ mɔ̀ nyɔ ɓɛ́ ɔ ɖià ɖɛ séín nyɛɛ, ɔ ní ɖá ɓɛ́ ɔ ké nyɔ seà ɖɛ séín ɖiɛɛ zùǔn zàìn. Ké nyɔ mɔ̀ nyɔ ɓɛ́ ɔ seà ɖɛ séín ɖiɛɛ ní ɖá ɓɛ́ ɔ ké nyɔ mɔ̀ nyɔ ɖià ɖɛ séín nyɛɛ zaa dúún wáɖá, sepóɛɖé Gèɖèpɔ́ɔ̀ ɖǎ ɔ jè dyi kpɔ̃. 4Nyɛ́ m̀ jǔ, ɓɛ́ m̀ ké nyɔ ɖò nììn gbo-nì-nyɔ̀ zaa dúún wáɖáá? Ɔ dyi dyi nyànà mɔɔ ɔ dyi ɓuɖuín, ɔ mɔ̀ ɔ mìɔùn nììn Wuɖuí-kɔ̃̀-nyɔ̀ɔ̀ kpé. Ké ɔ mu dyi nyànàùn, sepóɛɖé ɔ Wuɖuí-kɔ̃̀-nyɔ̀ɔ̀ ɓéɖé kpé, ɓɛ́ ɔ ké ɔ dyi nyànàìn.

5Nyɔ ɖò mɔ̀ùn poìn hwìɖǐi kà wé ɖò kpa ɖɛ, ké ɔ zi wé tɔ̀ɔ̀ ɓěɔ̀ mɔ̀ùn dyíɛ. Ké nyɔ ɖò mɔ̀ùn poìn hwìɖǐi kà ɓɛ́ wé séín mɔ̀ wé dyúáɖò pūɛ. Nyɔ séín mɛ dyuò ɖɛ kɔ̃̀ jè wa ɓéɖéà hwìɖǐǐ-taɓa-taɓaa dyí ɖé wa mìɔùn nììn fɔ̀nɔ̀-hwòɖǒ mú. 6Nyɔ mɔ̀ nyɔ ɓɛ́ ɔ kpɔ̃à wé ɖò dyiɛɛ, Bounɓoɔ̀ jè nì ɔ hwòɖǒ bũ̌, ké ɔ nyuà náa kɛ̀. Nyɔ mɔ̀ nyɔ ɓɛ́ ɔ ɖià ɖɛ séín nyɛɛ, Bounɓoɔ̀ jè nì ɔ hwòɖǒ bũ̌, ké ɔ nyuà náa kɛ̀, sepóɛɖé ɔ po Gèɖèpɔ́ɔ̀ zùo. Ké nyɔ mɔ̀ nyɔ seà ɔ ɖiɛɛ, Bounɓoɔ̀ jè nì ɔ hwòɖǒ bũ̌, ké ɔ nyuà náa kɛ̀, sepóɛɖé ɔ mɔ̀ùn po Gèɖèpɔ́ɔ̀ zùo ɖekè. 7À ɖò se cĩ́ ɓó à ɖòùn bìì, ké à ɖò se mɛ́ ɓó à ɖòùn bìì. 8Ɔ jǔ ké à dyi cĩ́ín, à cĩ́ ɓó Bounɓoɔ̀ bìì. Ɔ jǔ ké à dyi mɛ́ín, à mɛ́ ɓó Bounɓoɔ̀ bìì. Ɔ jèɛɛ, kɛbì à mɛ cĩ́ mɔɔ à mɛ mɛ́ɛ, Bounɓoɔ̀ kɔ̃̀ à. 9Sepóɛɖé ɓó ɖɛa jè Kɛ́ɖɛ́ì mɛ́ ma, ké ɔ wóɖó ma gĩɔ, ɓɛ́ ɔ ké nyɔ ɓě ɖǎ mɛ́ɛ kè nyɔ ɓě nì cĩ́ɛń nyɛɛ Bounɓo jǔ.

10Gàa wè, ɖɛ́ kɔ̃̀ jè m̀ wáɖáà m̀ ɖíí-gààɔ̀ zaa dúún wɛ̃́? Ɖɛ́ kɔ̃̀ jè m̀ zàìn kà m̀ ɖíí-gààɔ̀ zùǔn wɛ̃́? Sepóɛɖé à séín mu ɓó Gèɖèpɔ́ɔ̀ zaa-wɔ̃-pòìn-naínɔ̀ dyi nyànàùn. 11Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá,

“Bounɓoɔ̀ ɖá, ‘Ḿ gboò ḿ mìɔùn dyí

kà kɔ́-dù séín mu hwuɖu taɓaùn ɓó ḿ dyúa,

ɓɛ́ nyɔ séín ké mɔ̄ mɔ̀à Gèɖèpɔ́ɔ̀ kɛɛ ɓàìn nyɛ.’ ”

12Ɔ jèɛɛ, à séín mu à mìɔùn jè kɔ̃in zaìn ɓó Gèɖèpɔ́ɔ̀ dyúa.

Mɔ̀ǔn ɖá ɓɛ́ m̀ kéɛ nyu ɓɛ́ nì ɖííɔ̀ ké ɓuɖu

13Ɔ jèɛɛ, ɓěà ní ɖá ɓɛ́ ɓěà ké zaa dúún wáɖáìn wàɖàìn ɖe, kɛɛ ɖɛ ɓěà mɛ po gbɔɛɛ kɛ̀. Ɔ mɔ̀, ɓɛ́ ɓěà ké se ɖɛ ké nyu ɓɛ́ ɓěà ɖíí-gààɔ̀ ké gbǒ, mɔɔ ɓɛ́ ɓěà ké ɖɛ ké nyu ɓɛ́ ɔ ké ɓuɖuɛɛ ɔ hwìèɔ̀ dyí po. 14Kà ɓɛ́ ḿ nìà ɖé Bounɓo Jízɛ̀ múɛɛ, ḿ dyuòɛ̀ ké ḿ dèɛ̀ hwòɖǒ kɔ̃ kà ɖɛ ɖò se nì ɓɛ́ ɔ ké se dyíin nɔ̀mɔ̀ ɓó ɖi jè cáa, kɛɛ ɔ se dyíin nɔ̀mɔ̀ ɓó nyɔ mɔ̀ nyɔ ɖá ɔ seà dyíin nɔ̀mɔ̀ ɓó ɖi jèɛɛ ɖòùn bìì. 15Ɔ jǔ ké nì ɖíí-gààɔ̀ hwòɖǒ dyi ɖé ɖei kpá ɓó ɖɛ ɓɛ́ m̀ ɖiɛɛ jè ní, nìí, ɖɛ m̀ nyuà kɛɛ xwíníín mɔ̀ ɖɛ̀ɓɛ̀ǐn-ɖɛ̀ɓɛ̀ǐn se m̀ wuɖuí kɔ̃̀ ɖe. Mɔ̀ǔn ɖá ɓɛ́ ɖɛ m̀ ɖiɛɛ ké nyu ɓɛ́ nyɔ kɔ̃̀ jè Kɛ́ɖɛ́ì mɛ́à kɛɛ ké mú gbɔɔ̀. 16Ɔ jèɛɛ, ɓěǐn nyuɛ ké nyɔ ɖò ní cɛ̃ ɖɛ gbà ɖɛ mɔ̀ ɖɛ nɔ̀mɔ̀ dyíin ɓó ɓě gboɛɛ kɔ̃ún. 17Sepóɛɖé Gèɖèpɔ́ɔ̀ kã́á-ɓòɖòɔ̀ se ɖɛ-ɖi-ɖi kè ná-ná, kɛɛ ɔ mɔ̀ dyí-sɛ́ɖɛ́ìn-ɖɛ̀ nyu-nyu kè gìɖìǐ ɔ kè múà ɖé Zùù Hwɛ̀ǐn-hwɛ̀ǐnɔ̀ mú. 18Nyɔ mɔ̀ nyɔ ɓɛ́ ɔ nyu kà Kɛ́ɖɛ́ì bìì kũ̀à kɛɛ, ɔ dè Gèɖèpɔ́ɔ̀ hwòɖǒ dyi, ké nyɔǔn muɛ cɛ̃ìn, ɓɛ́ wa ké níiń, “Ɔ nɔ̀mɔ̀ dyíin.”

19Ɖɛa jè ɓěà mɛ sí ɖɛ ɓě dyà gìɖìǐ kè ɖɛ ɓě nyu ké à kuìn kùìn dyiɛɛ kíɖíí. 20Mɔ̀ǔn ɖá ɓɛ́ m̀ ké Gèɖèpɔ́ɔ̀ kũ̀àɔ̀ mú gbɔɔ̀ ɓó ɖii-ɖɛ̀ jè. Ɖɛ séín nɔ̀mɔ̀ dyíin ɓó ɖi jè jǎà, kɛɛ ɔ mɔ̀ ɖɛ gbà ɓɛ́ nyɔ ɖò nììn ɖɛ-ɖi-ɖi kéɛ nyu ɓɛ́ nyɔ tɔ̀ɔ̀ ɖò mɔ̀ùn ké ɓuɖu. 21Ɔ nɔ̀mɔ̀ dyíin ɓɛ́ m̀ ké se suaɖɛ̀ ɖi, mɔɔ ɓɛ́ m̀ ké se wã́ìn ɖò ná, mɔɔ ɓɛ́ m̀ ké se ɖɛ kà kò ɖò ɓɛ́ìn nyuɛ ɓɛ́ m̀ ɖííɔ̀ ké ɓuɖuɛɛ ɖò nyu. 22M̀ dyi hwìɖǐǐ-taɓa-taɓa ɓéɖé ɓó ɖɛ ɖò jèǐn, nìí, ɔ mɛ nì ɓó m̀ kè Gèɖèpɔ́ɔ̀ pṹa. Nyɔ mɔ̀ nyɔ ɓɛ́ ɖɛ ɔ ɖáìn ɖɛ nɔ̀mɔ̀ dyíin nyɛɛ seà ɔ mìɔùn zaa dúún wáɖáa, ɔ ɓéɖé múà. 23Kɛɛ nyɔ mɔ̀ nyɔ ɓɛ́ ɔ dyià ɖɛ ɖò ɖiín, ɔ ɓéɖéà kɛɛ ɖé ɔ hwòɖǒ bũ̌ɛɛ, zaa wáɖá ɔ dúún, sepóɛɖé ɔ hwìɖǐǐ-taɓa-taɓaɔ̀ seɛ nyu ɓɛ́ ɔ kéɛ náa nyu. Ké ɖɛ séín ɓɛ́ ɔ se hwìɖǐǐ-taɓa-taɓa mú sɔ̀ìn nyɛɛ, ɔ mɔ̀ nàmàǔn.

Currently Selected:

Wóɖómà 14: ƁB02

Highlight

Copy