Wóɖómà 13

Gɔ̌mànà kpéín dyé jè

1Nyɔ séín mɛ nyu waà gɔ̌mànà ɓěɔ̀ wuɖu, sepóɛɖé gɔ̌mànà-kpèɔ̀ nyɔ ké se Gèɖèpɔ́ɔ̀ gbo sɔ̀ìn nyɛɛ ɖò se nì. Gɔ̌mànà ɓě nìà kàǔn wɛ̃ɛ, Gèɖèpɔ́ɔ̀ mɔ̀ nyɔ ɖǎ wa páún po. 2Ɔ jèɛɛ, nyɔ mɔ̀ nyɔ vɔ̃ gɔ̌mànàɔ̀ gboɛɛ, ɔ vɔ̃ ɖɛ ɓɛ́ Gèɖèpɔ́ɔ̀ ɖǎ gãa gbo. Ké nyɔ mɔ̀ nyɔ mu ɔ gbo vɔ̃ùn wɛ̃ɛ, ɔ mu zaa-dúún-wáɖá-wáɖá ɔ mìɔùn kɔ̃ dyàùn. 3Sepóɛɖé à wuɖuí-kɔ̃̀-nyɔ̀ ɓěɔ̀ ní po nyɔ ɓě ɓɛ́ wa nyu nɔ̀mɔ̀ dyíin nyɛɛ fã̀àǔn. Wa po nyɔ ɓě ɓɛ́ wa nyu ɖɛ gbà kɛɛ fã̀àǔn. Mɔ̀ùn se mɔ́ ɓɛ́ m̀ ké ɖɛ kɔ̃̀ jè m̀ kéà gɔ̌mànàɔ̀ fɛ̃̀ìn nyɛɛ ɖò ɓéɖéè? Ɔ dyi ná nìǐn, nìí, m̀ mɛ nyu ɖɛ mɔ̀ ɖɛ nɔ̀mɔ̀ dyíin nyɛ, ké ɔ mu m̀ ɓàìn. 4Sepóɛɖé ɔ mɔ̀ Gèɖèpɔ́ɔ̀ bɛ̃̌ǐn ɓó nì nɔ̀mɔ̀ dyíin jè. Kɛɛ ɔ jǔ ké m̀ dyi ɖɛ gbà nyuín, nìí, m̀ mɛ fɛ̃̀ìn, sepóɛɖé ɔ se gàsíàɔ̀ ɓéɖé pídyi. Ɔ mɔ̀ Gèɖèpɔ́ɔ̀ bɛ̃̌ǐn ɓó kpa zà jè, ɓɛ́ ɔ ké Gèɖèpɔ́ɔ̀ dyoɖo ɓó ɖɛ-gbà-nyu-nyɔ̀ ɓěɔ̀ kɔ̃ dyà. 5Ɔ jèɛɛ, ɓě mɛ nyu waà wuɖu. Ɔ se ɖɛ ɓɛ́ Gèɖèpɔ́ɔ̀ dyoɖo ké se ɓě kɔ̃ dyi ɖòùn pūɛɛ, kɛɛ ɓɛ́ ɓě ké hwòɖǒ wáɖáá ɓéɖé ɖekè.

6Ɖɛ nìà kɛ kɔ̃̀ jè ɓě pɛ́ɛ̀à gɔ̌mànà-wìɖì kɛ̀. Sepóɛɖé gɔ̌mànà ɓěɔ̀ nì Gèɖèpɔ́ɔ̀ bìì kũ̀à nyuɛń, ké wa po wa mìɔùn kpéí ɖé ɖɛ ɓěa nyu-nyu mú. 7Ɓě mɛ pɛ́ɛ̀ wa séín ɖɛ ɓɛ́ wa ɓéɖé wa ké dyéɛ. Ɔ mɔ̀ gɔ̌mànà-wìɖì kè tácì-wìɖì. Ɓě mɛ dyé nyɔ ɓě ɓéɖé ɓě ké kpéín dyéɛɛ kpéín, ké ɓě mɛ dè nyɔǔn séín ɓɛ́ ɓě ɓéɖé ɓɛ́ ɓě ké dya dèɛɛ dya.

Kà à kè à mǔè ɖòɛ̀ pṹa ké nìɛ̀ nyuɛ

8Nyɔ ɖò ní ɖá ɓɛ́ ɔ ké ɓě kpaún ɓéɖé. Ɓě mɛ ɖɛɓɛìn ɖɛ̀ɓɛ̀ìn mú. Ɔ mɔ̀ kpa dyúáɖò wa mɛ ɓéɖé ɓě mú. Sepóɛɖé nyɔ mɔ̀ nyɔ ɓɛ́ ɔ ɖɛ̀ɓɛ̀ ɔ mǔè ɖò múɛɛ, ɔ ɖǎ ɖɛ séín ɓɛ́ gmaɔ̀ cɛ̃ɛ nyu. 9Gmaɔ̀ ɖá, “Ɓě ɖò ní ɖá ɓɛ́ ɓě ké gbàɖàùn po. Ɓě ɖò ní ɖá ɓɛ́ ɓě ké kú ɖáɓá. Ɓě ɖò ní ɖá ɓɛ́ ɓě ké dyíɖí. Ɓě ɖò ní ɖá ɓɛ́ ɓě mǔè ɖòɛ̀ kɔ̃̀ɔ̀-ɖɛ̀ɛ̀ kɔ̃̀-tò ké ɓě nyu.” Gma ɓě nìà kɛɛ, ɔ kè gmaɔ̀ nyɔ séín ɓě mu ɓó nììn ɖeɛɛ sṹ wuɖu ɓě nìà kɛ mú. Ɔ mɔ̀, “M̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ.” 10Ɔ jǔ ké m̀ dyi m̀ mǔè ɖò mú ɖɛ̀ɓɛ̀ǐn, nìí, m̀ se ɔ ɖɛ gbà ɖò bũ̌ nyuɛ ɓɛ́ìn. Ɔ jèɛɛ, ɖɛ̀ɓɛ̀ǐn-ɖɛ̀ɓɛ̀ǐn nyu ɖɛ séín ɓɛ́ gmaɔ̀ cɛ̃ɛ.

11Ɓě mɛ nyu ɖɛ nìà kɛ. Ɓě dyuò kà tiɔ̀ nyu nìɛ̀ kàǔn wɛ̃. Ɔ mɔ̀ǎ ti ɓɛ́ ɓě kéá nyíɔún wóɖó, sepóɛɖé à pó-tìɔ̀ ɖǎ à bũ̌in xwɛ̃́ìn kàǔn, ké ɔ zi ti kĩ́ín ɓɛ́ à taɓa ma Gèɖèpɔ́ɔ̀ hwìɖǐǐɛɛ dyí. 12Hwuɖuɔ̀ ɖǎ ɓoún tɔ̀mɔ̀, ké zɔ̃ nìǎ dyi xwɛ̃́ǐn. Ɔ jèɛɛ, ɓěà mɛ táà ɓěà tíe-kpòǔn-nyùù-ɖɛ̀ ɓěɔ̀ dyi, ɓɛ́ ɓěà ké ɓěà toún-vɔ̃̀ìn-ɖɛ̀ ɓě ɓɛ́ à ɓéɖéà ɖé ceɔ̀ múɛɛ dyí ɖú. 13Ɓěà mɛ gmɔ̀ ɓěà mìɔùn dyí nɔ̀mɔ̀ dyíin kà nyɔ ɓě gmɔ̀à wa mìɔùn dyí ɖé ce dyíɛ. Ɓěà ní ɖá ɓɛ́ ɓěà ké hwɔ pa, ɓɛ́ ɓěà ké nɔmɔɔ ná. Ɓěà ní po gmaɖe, ké ɓěà ní zi jií. Ɓěà ní ɖá ɓɛ́ ɓěà ké ɖɛín zà, ké ɓěà ní ɖá ɓɛ́ ɓěà ké hwɛ̀nɛ̌ nyu. 14Kɛɛ ɓě mɛ ɖú Bounɓo Jízɛ̀ Kɛ́ɖɛ́ì dyí, ké ɓěǐn ɖá ɓɛ́ ɓě ké ɓě mìɔùn jè hwìɖǐi poìn, ɓɛ́ ɓě ké ɓěɛ̀ mɔ́ɔ́-ɖɛ̀ nyu.

Currently Selected:

Wóɖómà 13: ƁB02

Highlight

Copy