Wɛ́ɖɛ́ 26
26
Dyí-sɛ́ɖɛ́ìn-nyɔ̀ɔ̀ ɓaà-wùɖù
Dèɓéɛ̀ wɛ́ɖɛ́
1Bounɓo, po ní zaaɔ̀ wɔ̃,
sepóɛɖé ḿ se ɖɛ gbà ɖò nyu,
ké ḿ taɓa m̀ hwìɖǐǐ kóɖó-kóɖó.
2Gmɔìn ḿ múin, ɓɛ́ m̀ ké ḿ mú dɔ̃̌o, Bounɓo.
Gmɔìn ní hwòɖǒ-dyùàɔ̀ kè ní fɔ̀nɔ̀-hwòɖǒɔ̀ múin.
3Nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jè nì ḿ hwìɖǐi kánáá pū,
ké ḿ nyu nì wuɖuɔ̀ kánáá pū.
4Ḿ kè nyɔ-wuɖu-fóɖóún-mú-cáìn-nyɔ̀ ɓěɔ̀ ní poìn sɔ̃ ní gbo,
mɔɔ ké ḿ kè miɔ-sɔ̃́-ɓéɖé-nyɔ̀ ɓěɔ̀ ní dè dɔ́ɔ́.
5Ḿ nyɛ́ɛ mú ɓɛ́ ḿ kè ɖɛ-gbà-nyu-nyɔ̀ ɓě ké dà dyúáɖò dyí poìn.
Ḿ seɛ mú ɖɛ̀ɓɛ̀ ɓɛ́ ḿ kè hwòɖǒ-kɔ̃in-nyìnììn-nyɔ̀ ɓě ké dà dyúáɖò dyi kò.
6Bounɓo, ḿ dèɖè ní xwaɔ̀, ɓɛ́ ɔ kéɛ nyɔǔn dyí tɛ̀mɛ̀ìn kà ḿ se ɖɛ gbà ɖò nyuɛ,
ké ḿ dɛ́ɖɛ́ nì sáa-kɔ̃-zàìn-gbààɔ̀ ɖei,
7ɓɛ́ ḿ ké nì ɓàìn-bɔ̃̀ɔ̀ jè zio mú pòìn,
ɓɛ́ ḿ ké dĩ́ín-dĩ̀ìn-ɖɛ̀ séín ɓě ɓɛ́ m̀ ɖǎ nyuɛɛ jè cɛ̃.
8Bounɓo, ḿ ɖɛ̀ɓɛ̀ gbǒ kɔ̃̀ mú ɓɛ́ m̀ cĩ́à kɛɛ mú.
Ɔ mɔ̀ pá kɔ̃̀ mú ɓɛ́ nì dĩ́ín-dĩ̀ìnɔ̀ nìà kɛ.
9Mɔ̀ǔn ɖá ɓɛ́ m̀ ké ḿ kè nàmàǔn-nyɔ̀ ɓěɔ̀ xwíníín pã́ìn,
ɓɛ́ m̀ ké à wúò kà nyɔ wúò kà sĩ̀ɔ̌ kɛ.
Mɔ̀ǔn ɖá ɓɛ́ m̀ ké ḿ kè nyɔ ɓě nyuà dyɔɔ̀ cà-cà ɓó nyɔmɔɔ dyi wáɖáìn jèɛɛ xwíníín pã́ìn
ɓɛ́ m̀ ké à ɖáɓá.
10Wa mɔ̀ nyɔ ɓě ɓɛ́ ɖɛ gbà ɓě ɓɛ́ wa sɔ́ dyíɛɛ dyíà xwa,
ɓɛ́ nyɔ-gbo-pa-wìɖì dyíà waà ɖiaùn-xwàɔ̀ múɛ.
11Kɛɛ ɔ dyi mɔ́ún jè jǔǐn, ḿ se ɖɛ gbà ɖò nyu.
Bounɓo, dyé ḿ wìǐn, ɓɛ́ m̀ ké ḿ póìn.
12Pá kɔ̃̀ mú ɓɛ́ ḿ nyànàà dyiɛɛ mɔ̀ pá kɔ̃̀ mú ɓɛ́ nàdǐ ɖò se ḿ bìì nì kɛ.
Ní mu m̀ ɓàìn ɖé vòò-nyɔ̀ ɓěɔ̀ hwìɛ̀.
Currently Selected:
Wɛ́ɖɛ́ 26: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
