Wɛ́ɖɛ́ 27
27
Bounɓoɔ̀ ɓàìn-ɓàà-wùɖù
Dèɓéɛ̀ wɛ́ɖɛ́
1Bounɓoɔ̀ mɔ̀ ní ce kè ní póìn-nyɔ̀.
Ḿ se nyɔ ɖò dyi fɛ̃̀ǐn mu.
Bounɓoɔ̀ gmɔ̀ ḿ dyí sɔ̀ìn ɖé nàdǐ séín mú.
Ḿ se fã̀à ɖò peɖeɛ́ mu.
2Ní mú-nyɛ́-nyɔ̀ ɓě mɔ̀à hwòɖǒ-kɔ̃in-nyìnììn-nyɔ̀ ɓěɔ̀ kɛɛ
dyi ḿ to kɔ̃ dyà, ɓɛ́ wa ké ḿ ɖáɓá ní,
wa gbǒ, ké wa ɓuɖu.
3Kɛbì ní mú-nyɛ́-nyɔ̀ ɓěɔ̀ sójà kúɖúú mɛ gbǎìn ḿ wɔ̃ɛɛ,
ní hwòɖǒ-dyùàɔ̀ se fã̀à ɖò peɖeɛ́ mu.
Kɛbì wa mɛ po ḿ to kɔ̃ɛɛ,
ḿ dèɛ̀ hwòɖǒ kɔ̃ kà Gèɖèpɔ́ɔ̀ mu ḿ póìn nyɛ.
4Ɖɛ dyúáɖò ḿ zɔ̀ìn Bounɓoɔ̀,
ké ɖɛ dyúáɖòɔ̀ ɖòùn mɔ̀ ɖɛ ní mɔ́ ɖé ɔ gbo.
Ɖɛɔ̀ mɔ̀, ɓɛ́ ḿ ké ɖé Bounɓoɔ̀ gbǒɔ̀ mú cĩ́ ɖé ní fɛ̀ɛ̀-wè séín mú,
ɓɛ́ ḿ ké ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ jè hwòɖǒ gboi nàìn tee,
nìí ɓɛ́ ḿ ké kà ɔ ké ḿ nàìn nyuɛɛ ɔ zɔ̀ìn.
5Sepóɛɖé fũ̀à-fṹá-tì dyi dyiín, ɔ mu ḿ vǐèìn ɖé ɔ cĩ́-naínɔ̀.
Ɔ mu ḿ dyí gmɔ̀ùn ɖé ɔ gbǒɔ̀ mú.
Ɔ mu ḿ dyi dèìn ɖé sɔ́ɔ́-kpò vɛ̀nɛ̀ ɖò ɖeín dɛ̀ ɓɛ́ ní fɛ̀ɛ̀ɔ̀ ɓɛ́ìn póɛ kɛ.
6Kǎà ní mu ní mú-nyɛ́-nyɔ̀ ɓě ɓɛ́ wa gbǎìn kà ḿ wɔ̃ɛɛ toún ɖuɛ nyuùn.
Ní mu sáa zàùn, ké ní mu múà-kùɖǔ-kuɖu nyuùn ɖé ɔ gbǒɔ̀ mú.
Ní mu ɓeɖeìn, ké ní mu Bounɓoɔ̀ ɓàìn.
7Bounɓo, ḿ dyi m̀ ɖá ní, wɔ̃́ ní wuɖuɔ̀.
Dyé ḿ wìǐn, ɓɛ́ m̀ ké ní ɓaà-wùɖùɔ̀ gɔ̃̌ jǔ.
8Ḿ cɛ̃ɛ ma ɖéɛ ní hwòɖǒ bũ̌ kà ní mu ɓó m̀ dyúa dyiìn nyɛ.
Bounɓo, mɔ̄ kɛà kɛ̀.
9Óó Gèɖèpɔ́ɔ̀, mɔ̀ mɔ̀à ní póìn-nyɔ̀ɛɛ, mɔ̀ǔn ɖá ɓɛ́ m̀ ké ḿ dyúa xwáɖáún pòìn.
Mɔ̀ǔn ɖá ɓɛ́ m̀ ké mɔ̄ mɔ̀à nì gbo-nì-nyɔ̀ɔ̀ kɛɛ dyoɖoún kpáìn, ɓɛ́ m̀ ké ḿ ɓɔ́.
Mɔ̀ǔn ɖá ɓɛ́ m̀ ké ḿ ɓɔ́, mɔɔ ɓɛ́ m̀ ké ḿ dyi táà.
Sepóɛɖé mɔ̀ mɔ̀ ma ḿ gbo-kpá-nyɔ̀ kĩ́ín.
10Kɛbì ḿ ɖe kè ḿ ɓǎ mɛ táà ḿ dyiɛɛ,
Bounɓoɔ̀ mu ḿ dyí ɖúùn.
11Bounɓo, tɛ̀mɛ̀ìn ḿ ɖɛ nì mɔ́ ɓɛ́ ḿ ké nyuɛ.
Kpàìn ḿ hwìè ɓɛ́ nàdǐ ɖò se xwíníín nìɛɛ xwíníín,
sepóɛɖé ní mú-nyɛ́-nyɔ̀ ɓěɔ̀ zi dyí vòɛ̌n mìɔ.
12Mɔ̀ǔn ɖá ɓɛ́ m̀ ké wɔ̃́ ɓɛ́ ḿ ké ní mú-nyɛ́-nyɔ̀ ɓěɔ̀ xwaún dyi kpá,
sepóɛɖé wa tɔ́mɔ́ìn ḿ se wĩin, ké wa nì ḿ fã̀àǔn poɛń.
13Ḿ dèɛ̀ hwòɖǒ kɔ̃ kóɖó-kóɖó kà ní mu toɖo kɔ̃ dyi gã̀ùn,
ɓɛ́ ḿ ké Bounɓoɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ dyé nɔ̄ nyɔ ɓě nì cĩ́ɛń nyɛɛ hwìɛ̀ kɛ.
14Dè Bounɓoɔ̀ hwòɖǒ kɔ̃.
M̀ mɛ ku dyi, ɓɛ́ m̀ ké hwòɖǒ ku.
Dè Bounɓoɔ̀ hwòɖǒ kɔ̃.
Currently Selected:
Wɛ́ɖɛ́ 27: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
