Wɛ́ɖɛ́ 22
22
Gǎ-dyé-kpě-po-wùɖù kè ɓàìn-wɛ̀ɖɛ̀
Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n wɛ́ɖɛ́-wùɖù mɔ̀à “Gànà-kṹún-dèɖè” kɛɛ mú.
1Ní Gèɖèpɔ́ɔ̀, ní Gèɖèpɔ́ɔ̀, ɖɛ́ kɔ̃̀ jè m̀ hwɛ̀à ḿ gboɛ́?
Ɖɛ́ kɔ̃̀ jè m̀ seà ḿ bũ̌in xwɛ̃́ìn, ɓɛ́ m̀ kéà ḿ gbo kpáá,
mɔɔ ké mɔ̀ǔn wɔ̃́à ní kpò-wùɖùɔ̀ kɛ́?
2Óó ní Gèɖèpɔ́ɔ̀, ḿ pòìn m̀ kpéi ɓó dyóɖóaún,
kɛɛ mɔ̀ǔn jǔ ḿ gɔ̃̌.
Ḿ pòìn m̀ kpéi ɓó máaún,
ké mɔ́ún dyé fɔ̀-fɔ̀ ɖò.
3Kɛɛ dyéɛ, mɔ̀ mɔ̀ kã́áɔ̀. Mɔ̀ mɔ̀ Mú-hwɛ̀-nyɔ̀ɔ̀.
Mɔ̀ mɔ̀ nyɔ Éézùɖùɛ̀-nyɔ̀ ɓěɔ̀ nyí ɓàìn-ɓàìn.
4À ɓǎ ɓěɔ̀ dè ma m̀ hwòɖǒ kɔ̃.
Wa taɓa ma m̀ hwìɖǐǐ, ké m̀ póìn ma wa.
5Wa pòìn ma m̀ kpéi, ké m̀ póìn ma wa.
Wa taɓa ma m̀ hwìɖǐǐ, ké m̀ se ma wa dɛ̃ dyéɖéín sè.
6Kɛɛ nyɔǔn ɓě ɖá sɔ̀mɔ̀ɔ̌ kpa ɖɛ ké ɔ zi ḿ dyí.
Ḿ mɔ̀ dyɔ́-cù ɓó nyɔǔn ɓě gbo, ké wa zàìn ḿ zùǔn.
7Nyɔ séín ɓě ɓɛ́ wa dyé ḿ wɛ̃ɛ, wa ɓaɖa ḿ dyɔ́.
Wa tò ḿ miɔ kíɖíí, ké wa nì ḿ dú dya pòɛ̌n,
8ké wa ɖá, “Kà ɓɛ́ ɔ taɓaà Bounɓoɔ̀ hwìɖǐǐɛɛ,
Bounɓoɔ̀ mɛ póìn ɔ.
Kà ɓɛ́ ɔ ɖá Bounɓoɔ̀ hwòɖǒ dèàìn ɔ múin nyɛɛ,
Bounɓoɔ̀ mɛ kpáá ɔ gbo ɓɛ́ à kéɛ dyée.”
9Kɛɛ mɔ̀ mɔ̀ nyɔ zà ma ḿ ɖé ḿ ɖe xwíníín,
ké m̀ gmɔ̀ ma ḿ dyí ti ɓɛ́ ḿ ké ma ɓó ḿ ɖe kɛ́ kɔ̃ nìɛ.
10Ti ɓɛ́ ḿ wóɖó ma ɖé ḿ ɖe xwíníín nyɛ̀nɛ̀ɛ̀ kɛɛ, ḿ kpá ma ɖé m̀ xwaún.
Sɔ̀ìn ɓó ti ɓɛ́ ḿ ɖe ɖǎǒ ḿ wóɖóìn nyɛɛ, mɔ̀ mɔ̀ ní Gèɖèpɔ́ɔ̀.
11Ɓɔ̌ɔ̀, mɔ̀ǔn ɖá ɓɛ́ m̀ ké ḿ bũ̌in tɔmɔìno,
sepóɛɖé fũ̀à-fṹá-tì ɖǎ dyi xwɛ̃́ìn,
ké nyɔ ké ḿ gbo kpáa ɖò se nì.
12Ní mú-nyɛ́-nyɔ̀ kúɖúú ɓě nì kà dyoɖo-ɓìɖǐ nìà kɛɛ gbǎìn ḿ wɔ̃.
Wa nì kà dyoɖo-ɓìɖǐ sɔ̀à ɖé Básàùn-ɓòɖòɔ̀ kɔ̃ɛɛ nìà kɛ.
13Wa fɔ̀nɔ̀ wa wɔ̃ ɓěɔ̀ kà ganìǎ dyà dyoɖo poɛɛ nìà kɛ,
ké wa mɔ́ ḿ kpɔ̃ɔ dyi.
14Ní kpéɔ̀ sɔ̀ ḿ mú kà nyɔ púè kà ní dyiɛ,
ké ní dyí-deìn-naín séín ɓěɔ̀ ɖǎ xwaún sɔìn.
Hwòɖǒ ɖò se ḿ xwíníín nì ɖe.
Ɔ nì kà cáná ma-ma ɖeà ɓó da dyíɛ.
15Kpé ɖò se ḿ mú nì ɖe,
ké ní miɔɔ̀ nɛ́ìn ní wɔ̃-xwìà dyi.
Ké m̀ pɛ̃́ìn ḿ dyi ɖé gĩɔ púu-púuɔ̀ mú.
16Ní mú-nyɛ́-nyɔ̀ kúɖúú ɓěɔ̀ nì kà kpɔ̃ɔ-gbè ɓě nìà kɛ.
Wa gbǎìn ḿ wɔ̃.
Wa ɖǎ ní ɓo ɓěɔ̀ kè ní xwa ɓěɔ̀ fíè.
17Ḿ ɓɛ́ìn ní kpá séín ɓěɔ̀ zɛɖɛɛ.
Ní mú-nyɛ́-nyɔ̀ ɓěɔ̀ síìn ḿ dyéɖé, ké wa nì ḿ dyai gmɔǐn.
18Kà wa nyu ma ní mú-po-ɖɔ̀ɔ̀ geɛ̀n nyɛɛ mɔ̀,
wa nyu ma gbo-ɖàɓàìn-ɖɛ̀ ɓóɛ jè.
19Kɛɛ Bounɓo, mɔ̀ mɔ̀à ní kpé-tò-nyɔ̀ɛɛ, mɔ̀ǔn ɖá ɓɛ́ m̀ ké ḿ bũ̌in tɔmɔìn.
Dyi wàɖà, ɓɛ́ m̀ ké ḿ gbo kpá.
20Póìn ḿ sɔ̀ìn ɖé gàsíàɔ̀ wĩín.
Póìn ní fɛ̀ɛ̀ kpa ɖɛɔ̀ sɔ̀ìn ɖé gbe ɓěɛ̀ wɔ̃ún.
21Póìn ḿ sɔ̀ìn ɖé ní mú-nyɛ́-nyɔ̀ ɓě ɓɛ́ wa ɓéɖéà gana kà ganìǎ nìà kɛɛ xwaún.
Wa nì kà dyoɖo-ɓìɖǐ nìà kɛ.
Póìn ḿ sɔ̀ìn ɖé waà gmɛ̌ ɓěɔ̀ pṹa.
22Ní mu ɖɛ ɓě ɓɛ́ m̀ ɖǎà nyuɛɛ jè zio mú pòìn ɖé ní nyɔ ɓěɔ̀ gbo.
Ní mu m̀ ɓàìn ɖé vòò-nyɔ̀ ɓěɔ̀ hwìɛ̀.
23Ɓě mɔ̀ nyɔ séín ɓɛ́ ɓě dyéà Bounɓoɔ̀ kpéín nyɛɛ, ɓě ɓàìn ɔ.
Ɓě mɔ̀à Jékɔ̀ɛ̀ xwíníín-dyù séín ɓěɛɛ, ɓě dè Bounɓoɔ̀ dya.
Ɓě mɔ̀à Éézùɖùɛ̀-nyɔ̀ séín ɓěɛɛ, ɓě ɓiè Bounɓoɔ̀.
24Sepóɛɖé ɔ se gǎ-dyé-nyɔ̀ ɓěɔ̀ ɓɔ́,
mɔɔ ké ɔ se wa gǎ-dyé-kpě-po-wùɖùɔ̀ ɖùǔn dyi zàìn.
Ɔ ní pòìn wa dyúa xwáɖáún,
kɛɛ wa dyi ɔ ɖá ɓɛ́ ɔ ké wa gbo kpá ní, nìí, ɔ jǔ wa ɖá-wùɖùɔ̀ gɔ̃̌.
25Ní mu m̀ ɓàìn ɖé vòò-nyɔ̀ ɓěɔ̀ hwìɛ̀ ɓó ɖɛ ɓě m̀ ɖǎà nyuɛɛ jè.
Ní mu sáa-zà-zà kɔ̃̀ wuɖu ɓɛ́ ḿ ɖǎà ɖiɛɛ nyuùn ɓó nyɔ ɓě ɓɛ́ wa dyéà m̀ kpéín nyɛɛ dyéɖé waí.
26Gǎ-dyé-nyɔ̀ ɓěɔ̀ mu ɖɛ ɖiìn, ɓɛ́ wa hwòɖǒ ké dyi dè.
Nyɔ ɓě ɓɛ́ wa dyi Bounɓoɔ̀ gboɛɛ mu ɔ ɓàìn.
Gèɖèpɔ́ɔ̀ mɛ nyuɛ ɓɛ́ nɔ̀mɔ̀ dyíin ké wa dyúa nì ɖé waà fɛ̀ɛ̀-wè séín xwíníín.
27Bounɓoɔ̀ ɓàìn jè mu xwéɖé-dù séín nì ɓóɖó-kpàà dà séín nyɛɛ hwìɖǐi dyiìn,
ké wa séín mu ɓó ɔ dyúa dú hwuɖu taɓaùn.
28Sepóɛɖé Bounɓoɔ̀ mɔ̀ kã́á,
ké ɔ kɔ̃̀ ɓóɖó-dù séín ɓěɔ̀ wuɖuí.
29Nyɔ séín ɓě ɓɛ́ wa ɓúáìn wa mìɔùn dyíɛɛ mu ɓó ɔ dyúa dú hwuɖu taɓaùn.
Nyɔ séín ɓě ɓɛ́ wa seà toɖo-kpàà kɔ̃ sèɛ̌ muɛɛ mu ɓó ɔ dyúa dú hwuɖu taɓaùn.
30Waà xwíníín-dyù ɓě mu ɓó wa ɖeín dyí kɔùn wɛ̃ɛ mu Bounɓoɔ̀ ɓièìn.
Nyɔǔn-dyù ɓě mu Bounɓoɔ̀ jè xwéɖé-dù ɓě mu ɓó wa ɖeín dyí kɔùn wɛ̃ɛ gbo cɛ̃ìn.
31Wa mu dyí-sɛ́ɖɛ́ìn-ɖɛ̀ ɓě ɔ ɖǎ nyuɛɛ jè zio mú pòìn ɖé dyú ɓě séè wóɖó keɛɛ gbo, ɓɛ́ wa ké níiń,
“Bounɓoɔ̀ ɖǎ ɔ nyɔ ɓěɔ̀ póìn.”
Currently Selected:
Wɛ́ɖɛ́ 22: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
