Wɛ́ɖɛ́ 19
19
Gèɖèpɔ́ɔ̀ dĩ́ín-dĩ̀ìn nì ɖé ɖɛ ɓě ɓɛ́ ɔ mɛ kɛɛ mú
Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.
1Dyɔɔ̀ tɛ̀mɛ̀ìn Gèɖèpɔ́ɔ̀ dĩ́ín-dĩ̀ìnɔ̀ nyɔǔn-dyù dyí.
Ké ɔ zaìn Gèɖèpɔ́ɔ̀ sɔ̃ɔ̀ mɛɛ-ɖɛ̀ ɓěɔ̀ jè kɔ̃in.
2À dyé Gèɖèpɔ́ɔ̀ dĩ́ín-dĩ̀ìnɔ̀ wé ɖò-ɖò séín kè máaún-hwùɖù ɖò-ɖò séín mú.
3Wé ɓěɔ̀ kè máaún-hwùɖù ɓěɔ̀ ní po wuɖu ɓɛ́ nyɔǔn-dyù poɛɛ ɖò,
mɔɔ ké wa ní zà wuɖu ɖò wĩín,
hwɛ̀ ḿ po níiń, nyɔ ké waà jĩ̌ ɖò wɔ̃́ɛ.
4Kɛɛ ɔ hwɔìn pū kà wa nìɔ̌ kà wùɖùɛ̌n nyɛ.
Waà wuɖuɔ̀ ɓeìn ɓóɖó-kpàà dà séín dyi.
Nyɔǔn-dyù ɓɛ́ìn wuɖuɔ̀ wɔ̃́ɔ ɖé ɓóɖó-kpàà sèìn-naín.
Gèɖèpɔ́ɔ̀ nyuɛ ɓɛ́ ɖé dyɔɔ̀ dyí ké dyóɖóɔ̀ ɓíɖí jǔ.
5Dyóɖóɔ̀ dyi xwáɖáún wóɖó gànà-kṹún ní, ɔ hwɔìn kà gàa ɓɛ́ ɔ kpɔ̃ nyɔ́nɔ́ dyi ɖie ké múà dyíìn ɔ múin nyɛɛ nìà kɛ.
Ɔ hwɔìn kà kpɛɖɛ-kpa-nyɔ̀ ɖò kɔ̃̀ hwòɖǒ mɔ́à kpɛɖɛ kpaa dyiɛɛ nìà kɛ.
6Dyóɖóɔ̀ wóɖó xwáɖáún ɖé dyɔɔ̀ máná ɖò gbo,
ké ɔ cɛ̃ dyɔɔ̀ kpó, ké ɔ kpá dyi ɖéɛ máná tɔ̀ɔ̀ gbo.
Ɖɛ ɖò se nì ɓɛ́ ɔ kéɛ zùzùɔ̀ dyí vǐè.
Bounɓoɔ̀ gmaɔ̀
7Gma ɓě ɓɛ́ Bounɓoɔ̀ dè nyɔǔn dyíɛɛ se kɛɛ ɖò ɓéɖé.
Wa mɔ̀ nyɔ-kpéí-po-ɖɛ̀.
Ɖɛ ɓě ɓɛ́ Bounɓoɔ̀ cɛ̃ nyɔ gbo ɓɛ́ nyɔ ké nyuɛɛ, wa mɔ̀ ɖɛ ɓě ɓɛ́ nyɔ ɓɛ́ìn hwòɖǒ kɔ̃ dèɛ̀ kɛ.
Wa nyuɛ ké nyɔ ɓě ɓɛ́ wa se hwòɖǒ fɔ̀nɔ̀ɛɛ fɔ̀nɔ̀ hwòɖǒ.
8Gma ɓě ɓɛ́ Bounɓoɔ̀ dè nyɔǔn dyíɛɛ sɛ́ɖɛ́ìn dyí.
Nyɔ ɓě kpɔ̃ wa dyiɛɛ, múà dyíìn wa múin.
Ɖɛ ɓě ɓɛ́ Bounɓoɔ̀ cɛ̃ nyɔ gbo ɓɛ́ nyɔ ké nyuɛɛ mɔ̀ ɖɛ sɛ́ɖɛ́ìn dyí,
ké wa mɔ̀ nyɔ-hwòɖǒ-fɔ̀nɔ̀ìn-ɖɛ̀.
9Bounɓoɔ̀ dya-dè-dèɔ̀ nɔ̀mɔ̀ dyíin,
ké kǎà ɔ mu nììn kánáá pū.
Bounɓoɔ̀ dyi zaa wɔ̃ po ní, ɔ poɛ wɔ̃ dyí-sɛ́ɖɛ́ìn-kà kè jǎà-kà kánáá pū.
10Bounɓoɔ̀ gma ɓěɔ̀ kè ɔ ɖɛ-wɔ̃-po-poɔ̀ kpa ɖɛ mìɔ ké wa zi góò hwɛ̀ zɛ̀nɛ̌ǐn dyí.
Wa ɖéè ké wa zi ɖo-nì ɓɛ́ ɔ sɔ̀ ɖo-kpã̀ múɛɛ dyí.
11Bounɓo, nì gma ɓěɔ̀ mɔ̀à nì gbo-nì-nyɔ̀ɔ̀ náún-po-nyɔ̀ kɛ̀.
Kpáná vɛ̀nɛ̀ nì ɖé wa dyi-kpɔ̃-kpɔ̃ mú.
12Nyɔ ɖò se ɔ mìɔùn nììn ɖɛ-xwa-bĩ-bĩ dyí dyuòɛ̀ ɓɛ́ìn.
Bounɓo, zĩ̀ìn ḿ kɔ̃in ɓó ɖɛ gbà ɓě ɓɛ́ ḿ ɖǎ nyu kɔ̃̀ jè ḿ se dyuòɛɛ jè.
13Bounɓo, gmɔ̀ ḿ dyí, mɔ́ún kɔ̃̀ ɖà gmɔ̀ǐn-gmɔ̀-nàmàǔn ɓě nyu ɖekè.
Mɔ̀ǔn wɔ̃́ nàmàǔn nì ná ɓěa ní kɔ̃̀ ḿ wuɖuí.
M̀ dyiɛ náa nyuín, ní mu mú hwɛ̀ìn,
ké ḿ se hwòɖǒ-kɔ̃in-nyìnììn-ɖɛ̀ nyuɛ́ mu.
14Bounɓo, mɔ̀ mɔ̀à ní dyí-gmɔ̀ìn-sɔ̀ɔ̌-kpò kè ní póìn-nyɔ̀ɛɛ,
wuɖu ɓě ɓɛ́ ḿ zà wĩín nyɛ kè ɖɛ ɓě ɓɛ́ ḿ poìn hwìɖǐiɛɛ mɛ mɔ̀ ɖɛ ɓě ɓɛ́ wa dè m̀ hwìɖǐiɛ.
Currently Selected:
Wɛ́ɖɛ́ 19: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
