Wɛ́ɖɛ́ 18
18
Dèɓéɛ̀ zùo-po-wɛ̀ɖɛ̀
(2 Sámíò 22:1-51)
Ɖɛ nìà kɛ mɔ̀ wɛ́ɖɛ́ ɓɛ́ Dèɓé mɔ̀à Bounɓoɔ̀ gbo-nì-nyɔ̀ɔ̀ kɛɛ ɓèɖèìn ma Bounɓoɔ̀ gbo ti ɓɛ́ Bounɓoɔ̀ ɖǎ ma ɔ póìn sɔ̀ìn ɖé Sɔ́ɔ̀ xwaún ɔ kè sɔ̀ìn ɖé ɔ mú-nyɛ́-nyɔ̀ tɔ̀ɔ̀ ɓěɔ̀ xwaún wɛ̃. Wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.
1Óó Bounɓo, mɔ̀ mɔ̀à ní kpé-tò-nyɔ̀ kɛɛ,
ḿ ɖɛ̀ɓɛ̀ m̀ mú mìɔ.
2Bounɓoɔ̀ mɔ̀ ní dyí-gmɔ̀ìn-sɔ̀ɔ̌-kpò kè ní póìn-nyɔ̀, ké ɖé ɔ gbo mɔ̀ ní pèɖèìn-naín.
Ɔ mɔ̀ ní Gèɖèpɔ́ɔ̀ mɔ̀ sɔ́ɔ́-kpò kɔ̃̀ ɖeín ɓɛ́ ḿ vǐè kɛ,
ké ɔ mɔ̀ ní dyí-zĩ̀ìn-ɖɛ̀ kè ní gàa-zà-nyɔ̀ ɓɛ́ ɔ póìn ḿ wɛ̃.
Ɔ mɔ̀ ní dyí-gmɔ̀ìn-pà.
3Ti séín ɓɛ́ ḿ ɖá Bounɓoɔ̀ kɛɛ,
ɔ póìn ḿ sɔ̀ìn ɖé ní mú-nyɛ́-nyɔ̀ ɓě xwaún.
Ɓàìn-ɓàìn mɛ nì ɔ kɔ̃.
4Gĩɔ mɔ̀ ɖúú ké ɔ nì ma ḿ ɖɔ,
ké ɔ zi ma ḿ kɔ̃in kà dyíí-nì nìà kɛ.
5Gĩɔ gbǎ ma xwáɖá ɓó ḿ bìì,
ké ɔ po ma ḿ ɖúú ɓo.
6Ɖé ní fũ̀à-fṹá-tìɔ̀ múɛɛ, ḿ pòìn ma Bounɓo mɔ̀à Gèɖèpɔ́ɔ̀ kɛɛ kpéi.
Ɔ nì ma ɖé ɔ gbǒɔ̀ mú, ké ɔ wɔ̃́ ma ní kpé-po-wùɖùɔ̀.
7Púɛɛ, ɓóɖóɛ̀ hìɖì-kpàɔ̀ túò ma dyi, ké toɖo ɓěɔ̀ hìɖì-kpà túò ma dyi,
sepóɛɖé Bounɓoɔ̀ kpá ma dyoɖoún jè.
8Ké Bounɓoɔ̀ nyuɛ ké nyànà-sò kè nyɛ-mìɔ̀ ɔ kè nyɛ-kɛ̀nɛ̀ wáɖá ma ɓíɖíi.
9Ké Bounɓoɔ̀ fá ma dyɔɔ̀ wɔ̃, ké ɔ sí ma ɓíɖíi.
Ɔ nyuɛ ké ní-kpò kpɛ̃̀ ɖò kpɔ̃ ma dyi.
10Ké ɔ kpá ma fɔ̀ɔ̀-ɖɛ̀ ɓě mɔ̀à cɛ́ɖɔ̀ ɓě kɛɛ ɖò kɔ̃ún, ké ɔ wã ma,
ké ɔ dyììn ma ɖé dìì vɛ̀nɛ̀ ɖò mú wàɖà.
11Ké ɔ nyuɛ ké tíe-kpò kpɔ̃ ma ɔ ɖei.
Tíe-kpòɔ̀ mɔ̀ ma ní-kpò kpɛ̃̀, ké ɔ nì ma ɔ ɖei.
12Ké wɛ́ɖɛ́-wɛ́ɖɛ́ nì ma poɛń ɓó ɔ dyúa,
ké sɔ̃̀ɔ̀-kpò nì wáɖáuń sɔ̀ìn ɖé ní-kpò kpɛ̃̀ɔ̀ mú,
ké ɔ nyuɛ ké ɖɛ séín fã ma.
13Ké Bounɓoɔ̀ nyuɛ ké zɛ páná ma.
Ɖɛɓíɔ́ wùɖù ma ɖé dyɔún, ké wa wɔ̃́ ma ɔ wuɖuɔ̀.#18:13 Vɔ́sì nìà kɛ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé ɔ Híìbúɖúù-wùɖùɔ̀ kàmà múin wɔ̃́uń jè.
14Ké ɔ ɖoɓo ma wɛ́ɖɛ́-wɛ́ɖɛ́ kà sé-kpìì nìà kɛ,
ké ní mú-nyɛ́-nyɔ̀ ɓěɔ̀ gbɛ̀ìn ma dyi.
15Ti ɓɛ́ Bounɓoɔ̀ kpáìn ma ní mú-nyɛ́-nyɔ̀ ɓěɔ̀ dyoɖoún wɛ̃ɛ,
ɔ nyuɛ ké dìì vɛ̀nɛ̀ ɖò dyi ma,
ké dyóóɔ̀ ma ma, ké ɓóɖóɛ̀ hìɖì-kpàɔ̀ kò ma dyóɖóún dyi.
16Ti ɓɛ́ ḿ nì ma níɔ sèɛ̌n nyɛɛ,
Bounɓoɔ̀ sɔ̀ ma ɖé dyɔún, ké ɔ zà ma ḿ níɔ.
17Ɔ póìn ma ḿ sɔ̀ìn ɖé ní mú-nyɛ́-nyɔ̀ ɓěɔ̀ xwaún,
sepóɛɖé wa ɓéɖé ma gana mìɔ ké wa zi ḿ dyí.
18Ti ɓɛ́ fũ̀à-fṹá nì ma ḿ nyuɛń nyɛɛ, wa vɔ̃ ma ḿ gbo,
kɛɛ Bounɓoɔ̀ gmɔ̀ ma ḿ dyí.
19Ɔ póìn ma ḿ sɔ̀ìn ɖé nàdǐ mú,
sepóɛɖé ɔ hwòɖǒ dèìn ma ḿ múin.
20Kà ḿ nyu dyí sɛ́ɖɛ́ìn nyɛɛ, kǎà Bounɓoɔ̀ nyu ḿ pɛ́ɛ̀.
Kà ní xwaɔ̀ nyu mú hwɛ̀ɛ̀ kɛɛ, kǎà ɔ nyu ḿ mana kɔ̃ poɛ.
21Ḿ nyu ɔ wuɖuɔ̀ ní,
ké ḿ se ɔ kɔ̃ín pòìn.
22Ḿ kpɔ̃ ɔ gma séín ɓěɔ̀ dyi,
ké ḿ se ɔ gma ɓěɔ̀ kɔ̃ín pòìn.
23Ḿ se kɛɛ ɖò ɓéɖé ɓó ɔ dyúa.
Ḿ kpɔ̃ ḿ mìɔùn dyí, ké ḿ se nàmàǔn nyu.
24Ɔ jèɛɛ, Bounɓoɔ̀ po ḿ mana kɔ̃,
sepóɛɖé ḿ sɛ́ɖɛ́ìn dyí, ké ḿ hwɛ̀ mú ɓó ɔ dyúa jè.
25Bounɓoɔ̀ mɔ̀ jǎà Gèɖèpɔ́ɔ̀ ɓó jǎà-nyɔ̀ ɓě bìì,
ké ɔ nyu nyɔ ɓě se kɛɛ ɖò ɓéɖéɛɛ nɔ̀mɔ̀ dyíin dyí tee,
26ké ɔ nyu dyí-sɛ́ɖɛ́ìn-ɖɛ̀ ɓó nyɔ ɓě hwɛ̀ múɛɛ bìì,
kɛɛ ɔ dyoɖo dyi hwòɖǒ-kɔ̃in-nyìnììn-nyɔ̀ ɓěɔ̀ kɔ̃.
27Ɔ póìn nyɔ ɓě dyà wa mìɔùn ɓíɖíiɛ,
kɛɛ ɔ dyà nyɔ ɓě ɓúáìn wa mìɔùn dyíɛɛ ɓíɖíi.
28Bounɓo mɔ̀à ní Gèɖèpɔ́ɔ̀ kɛɛ nyí ḿ ce.
Ɔ zà ɖé ḿ gǎà tíe-kpò mú.
29Ɔ nyí ḿ gana, ɓɛ́ ḿ ké ní mú-nyɛ́-nyɔ̀ ɓěɔ̀ gbo vɔ̃,
ké ɔ nyí ḿ kpé, ɓɛ́ ḿ ké wa toún ɖu.
30Gèɖèpɔ́ɔ̀ kpeɖe sɛ́ɖɛ́ìn dyí,
ké ɔ wuɖuɔ̀ se kɛɛ ɖò ɓéɖé.
Ɔ mɔ̀ dyí-zĩ̀ìn-ɖɛ̀ ɓó nyɔ séín pèɖèìn ɖé ɔ gboɛɛ bìì.
31Bounɓoɔ̀ ɖòùn mɔ̀ Gèɖèpɔ́ɔ̀,
ké ɔ ɖòùn mɔ̀ ní dyí-gmɔ̀ìn-sɔ̀ɔ̌-kpò.
32Gèɖèpɔ́ɔ̀ mɔ̀ nyɔ nyí ḿ kpé,
ké ɔ zà ḿ nàdǐ bũ̌in.
33Ɔ nyuɛ ké ḿ fṹà xwai kà déɖé nìà kɛ,
ké ɔ póìn ḿ ɖé toɖo ɓě dya.
34Ɔ tɛ̀mɛ̀ìn ḿ to-vɔ̃-vɔ̃,
ké ɔ nyí ḿ gana, ké ḿ ɓɛ́ìn bàɖàsǐ-pɔ̀nɔ̀ kíɖíɛ.
35Ɔ nyí ḿ to-ɖu-ɖu,
ké ɔ ɖiaùn-sɔ̃̀ɔ̀ kpɔ̃ ḿ dyií dyi,
ké ɔ nyuɛ ké ní nyɛ́nɛ́ ɓúá dyí.
36Ɔ nyuɛ ké ḿ se zɛ̀nɛ̌,
ké ḿ taɓa ní mú-nyɛ́-nyɔ̀ ɓěɔ̀ ɓá dyúa.
37Ḿ kpá ní mú-nyɛ́-nyɔ̀ ɓěɔ̀ kíɖíí, ké ḿ dyɛ̀ìn wa.
Ḿ gã̀ wa kíɖíí dyi tee, ké ḿ hwɔ wa toɖoí dyi.
38Ḿ síìn wa kɔ̃in, ké wa ɖò se dyí sɔ̀ ɖe.
Wa wáɖá ɓó ḿ dyúa dyi.
39Bounɓoɔ̀ nyí ḿ kpé, ɓɛ́ ḿ ké to vɔ̃,
ké ní sɔ̃ nì ní mú-nyɛ́-nyɔ̀ ɓěɔ̀ kɔ̃in.
40Ɔ nyuɛ ké ní mú-nyɛ́-nyɔ̀ ɓěɔ̀ gbǔ ḿ dyúa,
ké ḿ gbɔɔ̀ wa mú.
41Ní mú-nyɛ́-nyɔ̀ ɓěɔ̀ ɖá ɓó gbo-kpá-kpá jè, kɛɛ nyɔ ké wa gbo kpáa ɖò se nì.
Wa ɖá Bounɓoɔ̀, kɛɛ ɔ se wa gɔ̃̌ jǔ.
42Ḿ wàìn wa dyi, ké wa nì kà púu-púu ɓɛ́ pìɔ̌ kpaà kɛɛ nìà kɛ.
Ḿ síìn wa kɔ̃in kà nyɔ síàìn bàɖà nìà ɖé hwìè gba kɛɛ kɔ̃in nyɛ.
43Ti ḿ mìɔùn nììn nyɔ ɓěɔ̀ vɔ̃ ma ḿ gboɛɛ, Bounɓoɔ̀ póìn ma ḿ,
ké ɔ nyu ḿ ɓóɖó-dù ɓě wuɖuí-kɔ̃̀-nyɔ̀ mú.
Nyɔ ɓě ɓɛ́ ḿ se ma dyí dyuò kĩ́ín nyɛɛ nì ḿ xwíɖíi.
44Ḿ dyi wùɖù nyɛ̀nɛ̀ɛ̀ ní, ɖíà ɓě taɓa dú hwuɖu ɓó ḿ dyúa,
ké wa nyu ní wuɖu.
45Wa séín peɖe fã̀à,
ké wa sɔ̀ ɖé waà to-pèɖèìn-naín ɓěɔ̀, ké wa dyà tɛɖɛɛ ɓó ḿ dyúa.
46Bounɓoɔ̀ mɔ̀ nì-nì Gèɖèpɔ́ɔ̀.
Ɓàìn-ɓàìn mɛ nì Bounɓo mɔ̀à ní dyí-gmɔ̀ìn-sɔ̀ɔ̌-kpòɔ̀ kɛɛ kɔ̃.
Ní mu Gèɖèpɔ́ɔ̀ ɓɛ́ ɔ póàìn ḿ wɛ̃ɛ zùo poùn.
47Ɔ mɔ̀ nyɔ zà ní kpa,
ké ɔ po ɓóɖó-dù ɓě ḿ xwíɖíi.
48Ɔ póìn ḿ sɔ̀ìn ɖé ní mú-nyɛ́-nyɔ̀ ɓěɔ̀ xwaún,
ké ɔ nyuɛ ké ḿ kɔ̃̀ wa wuɖuí.
Ɔ póìn ḿ sɔ̀ìn ɖé nyɔ-ɖɛ-gana-xwa-zàìn-nyɔ̀ ɓě xwaún.
49Ɔ jèɛɛ, ní mu Bounɓoɔ̀ ɓàìn ɖé ɓóɖó-dù séín nyɔ ɓěɔ̀ hwìɛ̀,
ké ní mu ɔ nyɛ́nɛ́ɔ̀ mú ɓèɖèìn.
50Ɔ nyí mɔ̄ mɔ̀à kã́áɔ̀ kɛɛ to-ɖu-ɖu vɛ̀nɛ̀ ɓě,
ké ɔ nyu mɔ̄ mɔ̀ nyɔ ɔ ɖǎà gãa kè ní gbǒ-xwíníín-nyɔ̀ ɓěɔ̀ nɔ̀mɔ̀ dyíin dyí kánáá pū.
Currently Selected:
Wɛ́ɖɛ́ 18: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
