Máfíò 4

Jízɛ̀ mú-dɔ̃̌-dɔ̃̌

(Máà 1:12-13; Ɖúù 4:1-13)

1Púɛɛ, Zùùɔ̀ kpa ma Jízɛ̀ ɖé gbǎùn-fúɖúáɔ̀ kɔ̃, ɓɛ́ Nɔɔ́-nàmàǔn ké ma ɔ mú dɔ̃̌. 2Jízɛ̀ hwèɖè ma wɔ̃ kɔ̃ ɓó dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ xwíníín. Ɔ ɖǎ ma ná nìɛɛ, púɛɛ, mɔ́ nyu ma ɔ ní. 3Ké Nɔɔ́-nàmàǔn dyi ma, ké ɔ cɛ̃ɛ ma ɔ gbo, ké ɔ ɖá, “Ɔ jǔ ké m̀ dyi Gèɖèpɔ́ɔ̀ Dyú-gààɔ̀ jǔ ní, nìí, cɛ̃ɛ sɔ́ɔ́-kpò ɓě nìà kɛ gbo, ɓɛ́ wa ké bɛɖɛɛ̀ mú zɛ̃̀ìn.”

4Kɛɛ Jízɛ̀ jǔ ma ɔ gɔ̃̌, ké ɔ ɖá, “Gèɖèpɔ́ɔ̀-cèè-ɖɛ̀ɔ̀ ɖá, ‘Nyɔ se cĩ́ dyììn ɖé ɖii-ɖɛ̀ ɖòùn mú, kɛɛ nyɔ cĩ́ dyììn ɖé wuɖu séín sɔ̀ìn ɖé Gèɖèpɔ́ɔ̀ wĩín nyɛɛ mú.’ ”

5Ké Nɔɔ́-nàmàǔn kpa ma Jízɛ̀ ɖé Hwɔɖɔ Hwɛ̀ǐn-hwɛ̀ǐnɔ̀ mú, ké ɔ dyáìn ma ɔ ɖéé ɖé Gèɖèpɔ́ɔ̀ gbǒɔ̀ dúún. 6Ké ɔ cɛ̃ɛ ma ɔ gbo, ké ɔ ɖá, “Ɔ jǔ ké m̀ dyi Gèɖèpɔ́ɔ̀ Dyú-gààɔ̀ jǔ ní, nìí, keè nɔ̄, ɓɛ́ m̀ ké ɓíɖíi kpá, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá,

‘Gèɖèpɔ́ɔ̀ mu ɔ ínjà ɓěɔ̀ tòùn.

Wa mu m̀ xwaún dyi ɓéɖéìn,

ɓɛ́ nì ɓo ní kɔ̃̀ ɖà sɔ́ɔ́-kpò ɖò dyí gbǒ.’ ”

7Hwɛ̀ ké Jízɛ̀ ɖá, “Gèɖèpɔ́ɔ̀-cèè-ɖɛ̀ɔ̀ cɛ̃ɛ ɖe, ké ɔ ɖá, ‘Ɓě ní dɔ̃̌ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú.’ ”

8Púɛɛ, Nɔɔ́-nàmàǔn kpa ma Jízɛ̀ ɖé toɖo zi dya tɔ̀mɔ̀ǔn ɖò dya, ké ɔ zàìn ma ɔ kã́á-ɓòɖò séín nì toɖo-kpàà kɔ̃ɛ kè waà kɔ́mɔ́-ɖɛ̀ ɓěɔ̀ da. 9Ké ɔ ɖá, “Ɖɛ séín ɓě nìà kɛɛ, ní mu wa m̀ nyíìn, ɔ jǔ ké m̀ dyi kɔ́-dù hwuɖu taɓa, ké m̀ dyi ḿ ɓiè ní.”

10Ké Jízɛ̀ cɛ̃ɛ ma ɔ gbo, ké ɔ ɖá, “Sɔ̀ ḿ bũ̌, Nɔɔ́-nàmàǔn. Gèɖèpɔ́ɔ̀-cèè-ɖɛ̀ɔ̀ ɖá, ‘Ɓě mɛ ɓiè Bounɓo mɔ̀à ɓěɛ̀ Gèɖèpɔ́ɔ̀ kɛ, ké ɔ ɖòùn kɔ̃̀ kũ̀à ɖé ɓě mɛ nyu.’ ”

11Púɛɛ, Nɔɔ́-nàmàǔn táà ma ɔ dyi, ké ɔ mu ma. Ké ínjà ɓěɔ̀ dyi, ké wa kpá ma Jízɛ̀ gbo.

Jízɛ̀ dè ɔ kũ̀àɔ̀ gbɔ ɖé Gáɖàɖíì-ɓòɖòɔ̀ mú

(Máà 1:14-15; Ɖúù 4:14-15)

12Ti ɓɛ́ Jízɛ̀ wɔ̃́ɔ ma kà ɓɛ́ wa ɖǎ ma Jɔ̃́ɔ́ kpɔɖɔ ɖeín poɛɛ, ɔ mu ma ɖé Gáɖàɖíì-ɓòɖòɔ̀ kɔ̃. 13Ɔ se ma Názɛ̀ɖɛ̀-hwɔ̀ɖɔ̀ɔ̀ mú cĩ́ ɖe, kɛɛ ɔ mu, ké ɔ cĩ́ ma ɖé Kɔ̀pánìà-hwɔ̀ɖɔ̀ɔ̀ mú. Ɔ mɔ̀ hwɔɖɔ ɖò nì ma ɖé Gáɖàɖíì Dòùnɓìǎɔ̀ wĩín, ɖé Zɛ́ɓíúɖɔ̀ùn-ɓòɖòɔ̀ kè Náfátàɖì-ɓòɖòɔ̀ bã̀àɔ̀ dyíɛ. 14Ɖɛ nìà kɛ kpá ma, ɓɛ́ ɖɛ ɓɛ́ kpáá-ɖɛ̀-cɛ̃-nyɔ̀ Àzédyà cɛ̃ zɔ̃̌ɔ̀ kɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,

15“Zɛ́ɓíúɖɔ̀ùn kè Náfátàɖìɛ̀ xwéɖé-dù ɓěɔ̀ nììn ɓóɖó ɓěɔ̀ gbɛ̌ɛ̀ɔ̀ sɔ̀ìn ɖé Mɛ́ɖɛ̀tɔ̀wéɖénìà-dyòǒɔ̀ wĩín,

ké ɔ nyini ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀.

Gáɖàɖíì-ɓòɖò kɔ̃̀ kɔ̃ ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ cĩ́à kɛɛ nì ɖé waà gbɛ̌ɛ̀ɔ̀ mú.

16Nyɔ ɓě ɓɛ́ wa cĩ́ ɖé tíe-kpò múɛɛ, wa ɖǎ ce vɛ̀nɛ̀ ɖò dyé.

Ceɔ̀ ɖǎ nyɔ ɓě ɓɛ́ wa cĩ́à ɖé tíe-kpò kpɛ̃̀ múɛɛ fã̀ìn.”

17Sɔ̀ìn ɓó tia gboɛɛ, Jízɛ̀ ɖú ma zio po kpàǐ, ké ɔ ɖá, “Ɓě táà ɓěɛ̀ nàmàǔn-kpèɖèɔ̀ dyi, sepóɛɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ ɖǎ dyi xwɛ̃́ìn.”

Jízɛ̀ ɖá zimii-ɖáɓá-nyɔ̀ hĩinyɛ

(Máà 1:16-20; Ɖúù 5:1-11)

18Ti ɓɛ́ Jízɛ̀ nì ma Gáɖàɖíì Dòùnɓìǎɔ̀ wĩin téɛń nyɛɛ, ɔ dyé ma ɖíí-gàà sɔ̃́. Wa mɔ̀ ma Sã́ɓò ɓɛ́ wa ɖáìn Píɖɛ̀ kɛ kè ɔ ɖíí-gàà Ã́dòɖò. Wa mɔ̀ ma zimii-ɖáɓá-nyɔ̀ ɓě, ké wa nì ma kpéɖé wáɖáuń ɖé dòùnɓìǎɔ̀ kɔ̃. 19Ké ɔ cɛ̃ɛ ma wa gbo, ké ɔ ɖá, “Ɓě sí ḿ kíɖíí. Ní muɛ nyuùn ɓɛ́ ɓě ké nyɔǔn kpɔ̃ kà ɓě kpɔ̃à zimii nyɛ.” 20Ké wa táà ma waà kpéɖé ɓěɔ̀ dyi wàɖà, ké wa sí ma ɔ kíɖíí.

21Ké ti wa mu ma kpã́ún wɛ̃ɛ, ɔ dyé ma ɖíí-gàà sɔ̃́ ɓě ɖò ɖe. Wa mɔ̀ ma Jĩ́ìn kè Jɔ̃́ɔ́. Wa mɔ̀ ma Zɛ́ɓìɖíìɛ̀ dyú-gàà ɓě. Wa kè wa ɓǎ Zɛ́ɓìɖíì nì ma ɓáɖáà ɖò mú, ké wa nì ma waà kpéɖé ɓěɔ̀ bũ̌in gmauń. Jízɛ̀ ɖá ma wa. 22Wàɖà cá kɛɛ, wa sè ma wa ɓǎ ɖé ɓáɖáàɔ̀ mú, ké wa sí ma Jízɛ̀ kíɖíí.

Jízɛ̀ wáɖá Gèɖèpɔ́ɔ̀-wùɖù ké ɔ tɛ̀mɛ̀ìn nyɔ ɓě ɖɛ ké ɔ kánáìn nyɔ ɓě dyi

(Ɖúù 6:17-19)

23Sɔ̀ìn ɓóɛ gboɛɛ, Jízɛ̀ mu ma ɖé Gáɖàɖíì-ɓòɖòɔ̀ dà séín. Ké ɔ tɛ̀mɛ̀ìn ma nyɔ ɓěɔ̀ ɖɛ ɖé Júù-nyɔ̀ ɓěɔ̀ cɔ́cì-gbò ɓěɔ̀ mú. Ké ɔ cɛ̃ ma bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ jè dyí. Ké ɔ kánáìn ma nyɔ ɓě ɓéɖé ma wɛ́-dù kò-kò ɓěɛɛ dyi. 24Ké Jízɛ̀ɛ̀ bɔ̃̌ ɓeìn ma ɖé Síwíɖíà-ɓòɖòɔ̀ dà séín dyi. Ké nyɔ ɓěɔ̀ kpa ma nyɔ ɓě ɓɛ́ wa ɓéɖé ma wɛ́-dù kò-kò ɓě ké wa nì wa puàǔn wɛ̃ɛ ɔ gbo. Wa mɔ̀ nyɔ ɓě ɓɛ́ zùù gbà nì ma mú kɛ kè nyɔ ɓě ɓɛ́ wa ɓéɖé ma sǐì-wɛ̀ kɛ ɔ kè nyɔ ɓě kɔ̃̀ wáká mɛ́ ma kɛ. Ké Jízɛ̀ kánáìn ma wa séín dyi nyɛ̀nɛ̀ɛ̀. 25Ké nyɔ kúɖúú ɓě sí ma ɔ kíɖíí sɔ̀ìn ɖé Gáɖàɖíì-ɓòɖòɔ̀ kɔ̃, kè sɔ̀ìn ɖé Dìkápòɖè Gbɛ̌ɛ̀ɔ̀ mú, kè sɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, kè ɖé Júɖìà-ɓòɖòɔ̀ mú, ɔ kè ɖé Jɔ́nì-nìɔ̀ ɖeín.

Currently Selected:

Máfíò 4: ƁB02

Highlight

Copy