Máfíò 3

Jɔ̃́ɔ́ nyɔ-níɔ-po-nyɔ̀ɔ̀ Gèɖèpɔ́ɔ̀-wùɖù wáɖá-wáɖá

(Máà 1:1-8; Ɖúù 3:1-18; Jɔ̃́ɔ́ 1:19-28)

1Ɓó tia ɓaɖaa, Jɔ̃́ɔ́ nyɔ-níɔ-po-nyɔ̀ɔ̀ dyi ma, ké ɔ po ma zio ɖé gbǎùn-fúɖúá nì ma ɖé Júɖìà-ɓòɖòɔ̀ kɔ̃ɛɛ kɔ̃. 2Ɔ ɖá, “Ɓě táà ɓěɛ̀ nàmàǔn-kpèɖèɔ̀ dyi, sepóɛɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ ɖǎ dyi xwɛ̃́ìn.” 3Jɔ̃́ɔ́ mɔ̀ nyɔ kɔ̃̀ jè kpáá-ɖɛ̀-cɛ̃-nyɔ̀ Àzédyà cɛ̃ zɔ̃̌ɔ̀, ti ɓɛ́ ɔ cɛ̃ɛ zɔ̃̌ɔ̀, ké ɔ dyi ma kà níiń,

“À wɔ̃́ nyɔ ɖòɛ̀ wuɖu ɖé gbǎùn-fúɖúáɔ̀ kɔ̃, ké nyɔɔ̀ ɖá,

‘Ɓě nyu hwìè ɖò ɓó Bounɓoɔ̀ bìì.

Ɓě nyu hwìè sɛ́ɖɛ́ìn dyí ɖò ɓó ɔ bìì.’ ”

4Ɖɔ Jɔ̃́ɔ́ po ma múɛɛ mɔ̀ sǒ-nì-gbu-kɔ̃únɛ̀ mí ɓɛ́ wa ɖaɓa ma ɖɔ múɛ, ké ɖɛ ɔ jìnììn ma gboɛɛ mɔ̀ kúɖúù-kpã̀. Ké ɖɛ ɔ ɖi ma kɛɛ mɔ̀ ma kpã̌ùn kè ɖo. 5Nyɔ ɓě mu ma ɔ gbo sɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè ɖé Júɖìà-ɓòɖò gànáɔ̀ kɔ̃ ɔ kè sɔ̀ìn ɖé gbɛ̌ɛ̀ séín ɓě nì ma ɖé Jɔ́nì-nìɔ̀ ɖeiɛɛ mú tee. 6Wa wɔ̃́ìn ma waà nàmàǔn ɓěɔ̀ mú, ké Jɔ̃́ɔ́ po ma wa níɔ ɖé Jɔ́nì-nìɔ̀ kɔ̃.

7Ti ɓɛ́ Jɔ̃́ɔ́ dyéɛ ma, ké Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ pàɖǎ nì ma dyiɛń, ɓɛ́ wa ké ma níɔ kpáa, ɔ cɛ̃ɛ ma wa gbo, ké ɔ ɖá, “Ɓě mɔ̀ sɛɛ̀ dyú ɓě kɛɛ, nyɛ́ po ɓě náún, ɓɛ́ ɓě ké Gèɖèpɔ́ɔ̀ dyoɖo nìà dyiɛń nyɛɛ dyúa gbǔɛ́? 8Ɓě mɛ nyu ɖɛ ɓě ɓɛ́ wa muɛ nyɔǔn dyí tɛ̀mɛ̀ìn kà ɓɛ́ ɓě ɖǎ ɓěɛ̀ nàmàǔn-kpèɖèɔ̀ dyi táà kɛ. 9Ɓě mɛ ɓɔ́ɔ hwìɖǐi poɛ̀n ɖé ɓě mìɔùn mú, ɓɛ́ ɓě ké níiń, ‘À mɔ̀ Ééɓòɖòhɛ̃́ɛ̀ nyúà-dyú ɓě.’ Ḿ cɛ̃ɛ ɓě gbo kà ɓɛ́ Gèɖèpɔ́ɔ̀ ɓɛ́ìn sɔ́ɔ́-kpò ɓě nìà kɛ dyí ɖúɛ, ɓɛ́ ɔ ké wa Ééɓòɖòhɛ̃́ɛ̀ nyúà-dyú ɓě mú nyuɛ. 10Gèɖèpɔ́ɔ̀ ɖǎ jùɛ̀ɔ̀ ti dyéìn, ɓɛ́ ɔ ké cu ɓěɔ̀ ɖéé ɖé waà gmɛ̀nɛ̀ɛ̀ ɓěɔ̀ gbo ɖàɓàìn. Ɔ mu cu séín ɓě ɓɛ́ wa se ɓo nɔ̀mɔ̀ dyíin tòɖòɛɛ ɖaɓaùn, ké ɔ mu wa dyéɖé poùn. 11Ḿ po ɓě níɔ, ɓɛ́ ɔ kéɛ nyɔǔn dyí tɛ̀mɛ̀ìn kà ɓɛ́ ɓě ɖǎ ɓěɛ̀ nàmàǔn-kpèɖèɔ̀ dyi táà kɛ. Kɛɛ nyɔ mɔ̀ nyɔ ɓɛ́ ɔ muà ɓó ḿ ɖeín dyí kɔùn wɛ̃ɛ, ɔ kpé ɓúá dyí ké ɔ zi níǐn kpéɔ̀ dyí. Ḿ se ɖɛ kpa ɓɛ́ ḿ ké ɔ bìì ɔ bǎ ɓéɖé dyɛ mɔ̀ùn. Ɔ mu ɓě níɔ poùn ɖé Zùù Hwɛ̀ǐn-hwɛ̀ǐnɔ̀ ɔ kè nyɛ mú. 12Ɔ ɓéɖé ɔ dùǎɔ̀ xwa, ké ɔ mu ɔ hwítìɔ̀ mú vũùn, ké ɔ mu ɔ hwítìɔ̀ ɖé sáɖáún dyí poìn. Kɛɛ ɔ mu hwítì-fèɖèɔ̀ fɔ̃ùn, ké ɔ nyɛɔ̀ se mɔ́ɔ mu fɔɔ.”

Jízɛ̀ níɔ-po-po

(Máà 1:9-11; Ɖúù 3:21-22)

13Púɛɛ, Jízɛ̀ sɔ̀ ma ɖé Gáɖàɖíì-ɓòɖòɔ̀ kɔ̃, ké ɔ mu ma ɖé Jɔ́nì-nìɔ̀ wĩín. Ké ɔ mu ma ɖé Jɔ̃́ɔ́ gbo, ɓɛ́ Jɔ̃́ɔ́ ké ma ɔ níɔ po. 14Jɔ̃́ɔ́ vɔ̃ ɓɛ́ ɔ ké ma ɔ ɓɔ́í po, ké ɔ ɖá, “Mɔ̀ ɓéɖé ɓɛ́ m̀ kéɔ́ ḿ níɔ poɛɛ, m̀ dyi ḿ gboò?”

15Kɛɛ Jízɛ̀ ɖá, “M̀ mɛ wɔ̃́ ɓɛ́ ɔ ké ná nì ɓó kàǔn, sepóɛɖé à dyiɛ kàa náa nyuín, nìí, ɔ sɛ́ɖɛ́ìn dyí, ké à mu ɖɛ séín ɓɛ́ Gèɖèpɔ́ɔ̀ mɔ́ à ké nyuɛɛ nyuùn.” Púɛɛ, Jɔ̃́ɔ́ wɔ̃́ ma.

16Ti ɓɛ́ Jízɛ̀ kpá ma níɔ nyɛ̀nɛ̀ɛ̀ kɛɛ, ɔ sɔ̀ ma níɔ̀ gbo. Wàɖà cá kɛɛ, dyɔɔ̀ kaà ma wɔ̃, ké ɔ dyé ma Gèɖèpɔ́ɔ̀ Zùùɔ̀ ɓíɖíi dyiɛ kà gbúɛ́ nìà kɛ. Ké Zùùɔ̀ dyi ma ɔ kɔ̃. 17Púɛɛ, wuɖu ɖò sɔ̀ìn ma ɖé dyɔún, ké wuɖuɔ̀ ɖá, “Nyɔ nìà kɛ mɔ̀ ní hwòɖǒ-kɔ̃-dè-dyùɔ̀. Ní hwòɖǒ dèìn ɔ múin.”

Currently Selected:

Máfíò 3: ƁB02

Highlight

Copy